काठमाडौं– नेपाल वैदेशिक रोजगार व्यवसायी संघका तृतीय उपाध्यक्ष रोशन कटुवालले पदबाट राजीनामा दिएका छन् । उनले यही पुस १० गते अध्यक्ष राजेन्द्र भण्डारीसमक्ष राजीनामा बुझाएको पुष्टि गरे । संघ नेतृत्वप्रति असन्तुष्टि जनाउँदै कटुवालले राजीनामा दिएका हुन् ।
संघको चुनाव नजिकिँदै गर्दा तृतीय उपाध्यक्षको राजीनामा आउनुलाई अर्थपूर्णरुपमा हेरिएको छ । संघको चुनाव आगामी फागुन २ गते हुँदै छ । कटुवाल आगामी नेतृत्वका प्रत्यासीसमेत हुन् । कटुवालले गत चुनावमा आफूले उठाएका सवालहरुमा काम गर्न नपाएका कारण पदत्याग गरेको बताए । ‘काम गर्न नपाएपछि संघमा बसिरहनुको अर्थ रहेन, त्यसैले राजीनामा दिएको हुँ,’ कटुवालले प्रभावसँग भने ।
उनले गत निर्वाचनमा ‘भलाइ कोष’को अवधारणा अघि सारेका थिए । सोही अनुसार ५० लाख रुपैयाँ नगद र ५० लाख रुपैयाँको बिमा अवधारणासहित कोष स्थापना गरिएको थियो । उक्त कोषले म्यानपावर व्यवसायीमाथि आइपर्ने दुर्घटना, मृत्युजस्ता समस्यामा क्षतिपूर्ति दिने जस्ता योजना बने । आफूले सम्पूर्ण व्यवसायीको सुरक्षा र हितका लागि ल्याएको उक्त योजनालाई संघले ओझेलमा पारेको उनको आरोप छ ।
‘सबै म्यानपावर व्यवसायी पैसावाल छैनन् । बर्सेनि सयौंलाई विदेश पठाउने तर आफू भने साधारण बिरामी पर्दा उपचार गराउन नसक्नेसमेत छन्,’ कटुवाल भन्छन्, ‘व्यवसायी स्वयं र उनीहरुबाट आश्रित परिवारलाई सहायता होस् भनेर उक्त कोषको अवधारणा ल्याइएको हो ।’वैदेशिक रोजगार व्यवसाय र व्यवसायीको हितमा ल्याइएको कोषको अवधारणालाई आफू कामको सिलसिलामा विदेश गएका बेला कार्यवाहकको सहायता लिएर तुहाउने प्रयास भएको भन्दै उनले असन्तुष्टि पोखे । यही कारण आफू पदमा बसिरहनु औचित्यहीन भएको कटुवालको भनाइ छ ।
‘मेरो अनुपस्थितिमा पनि कोषको काम अगाडि बढोस् भनेर साधारण सदस्य रहेका वैकुण्ठ पौडेललाई कार्यवाहक तोकेको थिएँ । तर उनलाई प्रयोग गरेर कार्यसमितिले पास गरिसकेको ५० लाखको कोषलाई ११ लाखमा झार्ने प्रस्ताव साधारणसभाबाट पारित गर्ने तयारी गरिएको छ तर साधारणसभा हुन नसक्दा काम रोकिएको छ,’ कटुवालले भने । संघले कोषको ३० प्रतिशत हिस्सा व्यवसायीबाहेक अन्य क्षेत्रको उत्थानमा पनि प्रयोग गर्ने तयारी गरेकोमा उनले नेतृत्वसँग असहमति जनाएका हुन् ।
आफू कोषमा रहँदा सम्पूर्ण व्यवसायीलाई एक ढिक्का पारेर राखेको उनको तर्क छ । अर्कोतर्फ, जो व्यवसायीले इमानदारपूर्वक सरकारको फ्रि–भिसा, फ्रि–टिकटलाई कार्यान्वयनमा ल्याइरहेका छन् त्यस्ता व्यवसायीलाई प्रोत्साहनस्वरुप संघको तर्फबाट सम्मानलगायतका कार्यक्रम बनाउनुपर्छ भन्दा संघले कुनै चासो नदेखाएको कटुवालको गुनासो छ । व्यवसायीको हितमा काम गर्ने संघ बनाउन आउँदो चुनावबाट नेतृत्व लिन आफू तयार रहेको उनी बताउँछन् ।
