काठमाडौं– वैदेशिक रोजगार बोर्डले बोर्डअन्तर्गतका समितिलाई थप प्रभावकारी बनाउन नयाँ मापदण्ड कार्यान्वयनमा ल्याएको छ । बोर्डको ८९औं बैठकबाट पारित बोर्डअन्तर्गतका समितिको कार्यविभाजन र समितिलाई थप प्रभावकारी बनाउन लागू गरिएको बोर्डले जानकारी दिएको छ ।
‘वैदेशिक रोजगार बोर्डअन्तर्गतका समिति (गठन तथा सञ्चालन)सम्बन्धी मापदण्ड, २०८१’मा तीनवटा समिति र ती समितिको कार्यक्षेत्र उल्लेख गरिएको छ । जसमा नीति, कानुन एवं व्यवस्थापकीय समिति, तालिम तथा अध्ययन अनुसन्धान समिति र कल्याणकारी कार्य व्यवस्थापन समिति रहेका छन् ।
मापदण्डमा नीति, कानुन एवं व्यवस्थापकीय समितिलाई बोर्डको बैठक, बोर्डको नीतिगत तथा कानुनसम्बन्धी विषय, अन्तरनिकाय (स्वदेश तथा विदेश) समन्वय, बोर्ड सचिवालयको प्रशासन, योजना तथा अनुगमन शाखा र लेखा शाखाले गर्ने कार्यहरुको सम्पूर्ण विषय, बोर्डका निजी सम्पत्ति तथा जिन्सी व्यवस्थापनसम्बन्धी विषयहरुका सम्बन्धमा कार्य गर्ने गरी कार्यक्षेत्र तोकिएको छ ।
यस समितिले विभिन्न मुलुकसँग गरिने श्रम सम्झौतासम्बन्धी आवश्यक कार्य गर्ने, वैदेशिक रोजगार व्यवसायलाई सुरक्षित, व्यवस्थित र मर्यादित बनाउन तथा वैदेशिक रोजगारमा जाने कामदार र वैदेशिक रोजगार व्यवसायीको हकहितको संरक्षण गर्ने सम्बन्धमा अवलम्बन गर्नुपर्ने अल्पकालीन र दीर्घकालीन नीति तर्जुमा गर्नेलगायत कार्य गर्ने मापदण्डमा उल्लेख छ । वैदेशिक रोजगार ऐनको कार्यान्वयन सम्बन्धमा समष्टीगत रुपमा अध्ययन गरी सरकारलाई सुझाव दिने जिम्मेवारी पनि यस समितिलाई तोकिएको छ ।
वैदेशिक रोजगारसम्बन्धी कानु पुनरावलोकन गर्नुपर्ने देखिएमा सोको पुनरावलोकन गरी आवश्यक सुधारका लागि सुझाव दिने, सेवा शुल्क तथा प्रवद्र्धन खर्च निर्धारण गर्ने सम्बन्धमा परामर्श दिने, वैदेशिक रोजगार व्यवसाय सञ्चालन गर्न इजाजत प्राप्त संस्थाको अनुगमन गर्नेलगायत जिम्मेवारी पनि नीति, कानुन एवं व्यवस्थापकीय समितिलाई तोकिएको छ ।
यसैगरी तालिम तथा अध्ययन अनुसन्धान समितिलाई बोर्डको कार्यक्षेत्रभित्र पर्ने विभिन्न सीपमूलक तालिम तथा सोसँग सम्बन्धित विषय, बोर्ड सचिवालयको प्रशिक्षण तथा अध्ययन अनुसन्धान शाखाले सम्पादन गर्ने सम्पूर्ण कार्यहरुसँग सम्बन्धित विषय र बोर्डले आफूलाई तोकिएको कार्यहरु गर्ने उल्लेख छ ।
वैदेशिक रोजगारमा जाने कामदारलाई सीपमूलक तालिम प्रदानसम्बन्धी काम गर्ने, वैदेशिक रोजगारबाट फर्केका कामदारका लागि रोजगारमूलक कार्यक्रम सञ्चालन गर्ने, अन्तर्राष्ट्रिय श्रमबजारको अध्ययन गर्ने गराउने र नयाँ अन्तर्राष्ट्रिय श्रमबजारको खोजी गर्ने, विदेशबाट फर्केर आएका कामदारको सीप, पुँजी र निजले सिकेको प्रविधि उपयोग गरी राष्ट्र हितमा लगाउने कार्यक्रम तर्जुमा, कार्यान्वयन, अनुगमन र मूल्यांकनसम्बन्धी काम गर्ने जिम्मेवारी यस समितिलाई तोकिएको छ ।
साथै, वैदेशिक रोजगार अभिमुखीकरण तालिम दिने संस्था दर्ता गर्ने योग्यता तोक्ने, तालिमको पाठ्यक्रम तर्जुमा र स्वीकृत गर्ने, तालिम दिने संस्थाहरुको अनुगमन गर्ने, वैदेशिक रोजगारमा गएका कामदारको स्थिति अध्ययनलगायत जिम्मेवारी पनि यस समितिले गर्ने छ ।
यस्तै कल्याणकारी कार्य व्यवस्थापन समितिलाई वैदेशिक रोजगार कल्याणकारी कार्यसम्बन्धी विषयहरु, कामदारको स्वास्थ्यसम्बन्धी विषयहरु, बोर्ड सचिवालयको कल्याण, पुनस्र्थापना, पुनःएकीकरण तथा सञ्चार शाखाले गर्ने सम्पूर्ण विषयहरुका सम्बन्धमा बोर्ड तोकिएका कार्यहरु गर्ने गरी कार्यक्षेत्र तोकिएको छ ।
अंगभंग भई वा कामदारलाई स्वदेश फिर्ता गराउन, क्षतिपूर्ति दिन र त्यसरी फिर्ता आएका कामदार वा निजको परिवारलाई आर्थिक सहयोग प्रदान गर्ने, फौजदारी कसूरको अभियोग लागेको कसूरदारको प्रतिरक्षा तथा बहस पैरवीसम्बन्धी कार्य गर्ने, वैदेशिक रोजगारमा गएको अवस्थामा कामदारको मृत्यु भई शव अलपत्र परी नेपाल ल्याउन र निजको परिवारलाई आर्थिक सहयोग प्रदान गर्नेलगायत विषयमा यस समितिले काम गर्ने मापदण्डमा उल्लेख गरिएको छ ।
