काठमाडौं– मलेसिया सरकारले आगामी वर्ष (सन् २०२५)को फेब्रुअरीदेखि लागू हुनेगरी कामदारहरुको न्यूनतम पारिश्रमिक बढाउने भएपछि त्यहाँ काम गर्ने नेपाली लाभान्वित हुने भएका छन् । हाल कामदारले प्रतिमहिना न्यूनतम पारिश्रमिक (तलब) १५ सय रिंगेट पाउँदै आएकोमा यसलाई बढाएर १७ सय रिंगेट बनाउने सरकारी घोषणाले ठूलो संख्यामा मलेसियामा काम गरिरहेका नेपालीहरु लाभान्वित हुने भएका हुन् ।
मलेसिया सरकारले सन् २०२५ को बजेट भाषणमार्फत कामदारको तलब प्रतिमहिना न्यूनतम १७ सय रिंगेट पु¥याउने घोषणा गरेसँगै त्यहाँ काम गर्ने नेपालीहरुमा पनि उत्साह देखिएको छ । ‘मलेसिया सरकारले विदेशी कामदारलाई राहत हुनेगरी परिश्रमिक बढाउने निर्णय गर्नुले म र मजस्ता थुप्रै नेपाली दाजुभाइलाई फाइदा पुग्छ, बढेको तलबले छोराछोरीको स्कुलको फि तिर्न सहयोग हुने छ,’ काभ्रे घर भएका जगतमान लामाले समाजिक सञ्जाल फेसबुकमा लेखेका छन् ।
बढेको तलबले व्यक्तिलाई मात्र फाइदा हुँदैन, यसको फाइदा राज्यलाई पनि हुन्छ । देशमा भित्रिने रेमिट्यान्स बढ्छ, जसले विदेशी मुद्रा सञ्चितिमा सहयोग पुग्छ ।
मेघनाथ भुर्तेल
महासचिव, नेपाल वैदेशिक रोजगार व्यवसायी संघ
त्यस्तै दोलखाका सुवास पोखरेलले पनि मलेसिया आएको तीन वर्षपछि तलब बढ्दै छ भन्ने खबरले खुसी लागेको बताएका छन् । ‘मलेसिया आएको तीन वर्षपछि तलब बढ्दै छ, खुसी लागेको छ, म जस्ता धेरै विदेशी कामदारलाई यसले फाइदा नै हुन्छ, समाजिक सुरक्षालगायतका सुविधामा नेपाल सरकारले पहल गरिदिए अझ राम्रो हुने थियो,’ उनले सामाजिक सञ्जालमा लेखेका छन् । समाजिक सञ्जालमा लामा र पोखरेलजास्ता धेरै जना नेपालीले मलेसिया सरकारले वृद्धि गर्न लागेको पारिश्रमिक छिट्टै कार्यान्वयनमा आउने विश्वास व्यक्त गर्दै खुसी साटेका छन् ।
मलेसिया सरकारले उपलब्ध गराएको विवरणअनुसार त्यहाँ करिब तीन लाख ५० हजार नेपाली कामदार कार्यरत रहेको मलेसियास्थित नेपाली दूतावासले जनाएकोे छ । तर, हालसम्म कति नेपाली कामदार मलेसियामा काम गरिरहेका छन् भन्ने तथ्यांक नेपाल सरकार वा सम्बन्धित निकायसँग नरहेको सरकारी अधिकारीहरुको भनाइ छ । यद्यपि मलेसियामा काम गर्ने नेपालीको यकीन तथ्यांक नभए पनि ५० हजारको हाराहारीमा अवैधरुपमा नेपालीहरु रहेको विभिन्न अध्ययनले देखाएका छन् ।
मलेसियाले स्थानीय तथा विदेशी दुवै कामदारको हकमा लागू हुने गरी न्यूनतम तलबमा वृद्धि गर्न लागेकाले हामीजस्ता स्रोत मुलुकका कामदारले बढी लाभ पाउनसक्ने श्रम तथा आप्रवासनविज्ञ रामेश्वर नेपालले बताए । ‘सन् २०१८ को अक्टोबरमा नेपाल र मलेसियाबीच भएको श्रमसम्बन्धी सम्झौताअनुसार पनि नेपाली कामदारको हकमा मलेसिया सरकारले लागू गर्ने न्यूनतम तलब पाउनुपर्छ,’ उनले भने, ‘मलेसियाको श्रम कानुन र नेपालसँग भएको श्रम सम्झौताअनुसार पनि त्यस्तै हुनुपर्छ र विगतलाई हेर्दा कार्यान्वयन पनि भइरहेको देखिन्छ, यसले नेपाली कामदारलाई राहत नै हुन्छ ।’ तर, अवैधरुपमा रहेका नेपाली कामदारले वृद्धि भएको तलबबाट लाभ लिन कठिन हुन सक्ने उनको भनाइ छ ।
पछिल्लो झण्डै एक वर्षदेखि नेपालबाट मलेसिया जाने नेपाली कामदारको संख्यामा ठूलो कमी आएको छ । सन् २०२४ का लागि विदेशी कामदारको कोटा पूरा भएको भन्दै त्यहाँको सरकारले नयाँ कामदार भर्ना लिन रोक लगाएको कारण नेपालीहरु रोजगारीका लागि जान पाएका छैनन् । यद्यपि जति नेपाली मलेसिया रोजगारीमा छन् उनीहरुले वृद्धि हुने तलबबाट लाभ लिनसक्ने भन्दै परिवारिकरुपमा पनि खुसी छाउने नेपाल वैदेशिक रोजगार व्यवसायी संघका महासचिव मेघनाथ भुर्तेलले बताए ।
‘बढेको तलबले व्यक्तिलाई मात्र फाइदा हुँदैन, यसको फाइदा राज्यलाई पनि हुन्छ,’ उनले भने, ‘देशमा भित्रिने रेमिट्यान्स बढ्छ, विदेशी मुद्रा सञ्चितिमा सहयोग पुग्छ ।’ मलेसियाले आगामी वर्षबाट पुनः नेपाली कामदार लैजान सुरु गर्ने तयारी गरिरहेको महासचिव भुर्तेलले बताए । न्यूनतम तलब वृद्धि हुनुले मलेसिया रोजगारीमा आकर्षण बढ्ने देखिएको उनको भनाइ छ । यसअघिदेखि नै आकर्षक रोजगार गन्तव्य भएकाले आगामी दिनमा पनि नेपालीहरुका लागि सुरक्षित रहने उनले बताए ।
