- लामिछानेले अधिकांश आरोपमा इन्कारी बयान दिएको प्रहरीको भनाई
- पोखरामा थुनछेक बहसपछि अदालतले उनलाई थुनामै राख्ने वा बाहिरै बसेर मुद्दाको प्रतिवाद गर्न दिने भनेर आदेश गर्ने
- दुई अनुसन्धान सकिएपछिमात्र सहारा चितवन, स्वर्णलक्ष्मी सहकारी, काठमाडौं र सानो पाइला सहकारी, वीरगन्जमा रविको संलग्नताबारे अनुसन्धान गरी मुद्दा चलाउने प्रहरीको तयारी
काठमाडौं– राष्ट्रिय स्वतन्त्र पार्टी(रास्वपा)का सभापति रवि लामिछानेविरुद्ध अब थुनछेक बहस शुरु हुने भएको छ । रुपन्देहीमा सुप्रिम सहकारी ठगी प्रकरणमा बयान सकिएसँगै लामिछानेलाई पोखरा लगेर थुनछेक बहस गर्ने भएको हो ।
बुटवलको सुप्रिम सहकारीको रकम ठगी प्रकरणमा अनुसन्धान गर्न उनलाई मंगलबार पोखराबाट भैरहवा लगिएको थियो । तीन दिनमा झन्डै २३ घण्टा बयानपछि उनलाई बिहीबारै पोखरा पठाउने तयारी गरिएको थियो । तर साँझ उडान अनिश्चित भएपछि उनको पोखरा यात्रा शुक्रबारका लागि सरेको रूपन्देहीका प्रमुख प्रहरी उपरिक्षक रञ्जित सिंह राठौरले बताए ।
लामिछानेले अधिकांश आरोपमा इन्कारी बयान दिएको प्रहरीले जनाएको छ । पोखरामा उनीमाथि सूर्यदर्शन सहकारी ठगी प्रकरणमा अनुसन्धान चलिरहेको छ । कात्तिक २ गते काठमाडौंबाट पक्राउ परेका लामिछानेलाई पोखरामा पनि जिल्ला सरकारी वकिलको कार्यालयमा सरकारी वकिलकै रोहबरमा प्रहरीले बयान लिएको थियो ।
कास्की जिल्ला अदालतमा मुद्दा दायर भएपछि रविविरुद्ध थुनछेक बहस हुनेछ । सरकारी वकिल र रविका कानुन व्यवसायीको बहस सुनिसकेपछि अदालतले उनलाई थुनामै राख्ने कि बाहिरै बसेर मुद्दाको प्रतिवाद गर्न दिने भनेर आदेश गर्नेछ । कास्की अदालतको आदेशपछि रुपन्देही प्रहरीले रविविरुद्धको मुद्दा सरकारी वकिलमार्फत अदालतमा बुझाउनेछ ।
गीतेन्द्रबाबु राई ‘जिबी’ समूहका सहकारीको करिब ६५ करोड रुपैयाँ ठगी प्रकरणमा रवि मुछिएका हुन् । यी दुई अनुसन्धान सकिएपछि प्रहरीले सहारा चितवन, स्वर्णलक्ष्मी सहकारी, काठमाडौं र सानो पाइला सहकारी, वीरगन्जमा रविको संलग्नताबारे अनुसन्धान गरी मुद्दा चलाउने तयारी गरेको छ । कुन सहकारीको पहिले अनुसन्धान गर्ने विषयमा टुंगो नभइसकेको प्रहरीले जनाएको छ । यस्तै रविको सम्पत्ति र आर्थिक कारोबारमा केन्द्रित रहेर सम्पत्ति शुद्धीकरणको कसुरमा पनि अनुसन्धान भइरहेको छ ।
गल्ती गर्छ आफू, गाली गर्छ मलाई: प्रधानमन्त्री ओली
प्रधानमन्त्री केपी शर्मा ओलीले रास्वपा सभापति लामिछानेलाई आफूले थुप्रै मौका दिएको उल्लेख गर्दै उनी हिरासत पुग्नुमा आफ्नो कुनै दोष नरहेको बताएका छन् । राजधानीमा बिहीबार भएको कान्तिपुर कन्क्लेभमा प्रधानमन्त्री ओलीले बदमासी गर्नेहरुलाई आफूले बचाउन नसक्नेसमेत बताए ।
अदालतमा पुगिसकेको विषयमा प्रधानमन्त्रीबाट हस्तक्षेप हुनेबारे सोच्नै नसकिने उनको भनाई थियो । ‘बदमासी गरेकोलाई त म बचाउन सक्दिनँ । छानबिन गर्ने काम प्रहरीको हो । मुद्दा हेर्ने काम अदालतको । मबाट इन्टफेरेन्स हुन्नँ,’ ओलीले भने, ‘गल्ती गर्ने आफू, खुर्सानी खाने आफू पिरो भएपछि गाली गर्छ मलाई ।’
प्रधानमन्त्री ओलीले आफूले रविलाई टेलिभिजनमा काम दिएको र त्यहीबाट कराउन सिकेकोसमेत व्यङग्य कस्न भ्याए । टेलिभिजनको काम छाडेपछि पार्टी खोल्नसम्म पनि आफूले साथ दिएको ओलीको दाबी रह्यो ।
‘जबलेस रवि बाबु म कहाँ आउनुभयो । मसँग बोल्ने कला छ भन्नु भयो । मैले प्रधानमन्त्रीसँग सीधाकुरा चलाउने सुझाएँ । दुई चार लाख विज्ञापनबाट उठाउन पाए होला । उहाँले अलि कराउन सिकेको त्यही हो । पछि प्रचण्डले निकाल्नुभयो,’ ओलीले भने, ‘न्युज २४ मा उहाँले बसेर हैन उभेर मच्चीमच्ची बोल्न थाल्नुभयो । पछि पार्टी खोलौं भन्नुभयो । खोल भने । हाहु गर्नुभयो । मैले साथै दिएँ ।’
नेपाली कांग्रेसका सभापति शेरबहादुर देउवाले झैं ओलीले पनि सहकारीमा रविको संलग्नताबारे थाहपत्तो नभएको तर्क गरे । ‘सहकारीमा यत्रो गरेको छ भनेर मैले आशंकै गरेको थिइनँ । वासिङमेसिनमा पनि तीनपल्ट धोएकोजस्तो कुरा गर्छ,’ ओलीले भने । कांग्रेस सभापति देउवाले कांग्रेस बैठकमा रविबारे यस्तै भनाई राखेका थिए ।
आफूले समिति नबनाउँ भन्दा पनि छानबिन समितिमा रविकै जोड रहेको समेत ओलीको भनाई थियो । ‘पार्लियामेन्टमा समिति बनाउनुपर्छ भनेपछि मैले हुन्न भने । रविले त बनाइयोस् भन्नुभयो । प्रचण्डजीले पनि हुन्छ भन्नुभयो । म त हुन्न भनेको । उहाँको पार्टीको नेता भएकै समितिले नाम तोकेर सिफारिस ग¥यो । त्यो त ब्युरोक्रेसीको हातमा गयो । छानबिन अध्ययनको क्रम शुरु भएपछि उहाँलाई गिरफ्तार गर्नुपर्ने अवस्था सम्मानित अदालतले देख्यो । निर्दोष हुनुहुन्छ भने सफाइ पाउनुहुन्छ,’ ओलीले भने ।
यसैले अदालत नै प्रभावित हुने गरी प्रदर्शन नगर्नसमेत ओलीले रास्वपालाई आग्रह गरे । ‘न्यायाधीशलाई गाली गरेर झुट प्रचार गरेर आफ्नो मुद्दालाई भ्रमको भूमरीमा पार्ने प्रयास नगरेपनि हुन्छ,’ ओलीले भने, ‘न्यायालयको कामलाई दबाब र झुटको प्रचारबाट प्रभावित पार्न खोज्नु उचित होइन ।’
ओली नेपाली कांग्रेस र नेकपा एमालेका नेताहरुले प्रजातन्त्रका लागि जीउज्यान समर्पण गरेको उल्लेख गर्दै नयाँ पुस्ताले गाली गर्नमात्र सिकेको गुनासो गरे । ‘नयाँ पुस्ताका नाममा टुप्पाबाट पलाएकाहरूले तथ्यहीन आधारमा गाली गरेको सुहाउँदैन,’ उनले भने, ‘मलाई सराप्नेहरुको पनि जिन्दगीको काउनडाउन हुन्छ ।’
सबैजना प्रधानमन्त्री बन्न कुदेपछि देशमा राजनीतिक अस्थिरतातिर लागेको ओलीको तर्क थियो । ‘ससाना पार्टी प्रधानमन्त्री हुन कुद्या छ । अर्को भएको छ । अर्को च्याखे हालेको हाल्यै छ,’ माओवादी केन्द्रका अध्यक्ष पुष्पकमल दाहालप्रति लक्षित गर्दै ओलीले भने, ‘मेरो अब एक वर्ष ८ महिना छ । त्यसपछि शेरबहादुरजीले चुनावसम्मै लानुहुन्छ ।’
-1745656903.jpeg)