काठमाडौं – मलेसियाको निर्माण र सुरक्षा क्षेत्रमा आप्रवासी कामदारको अभाव भएको बताइएको छ । केहीसमय यता निर्माण क्षेत्रसहित सुरक्षा, उद्योग र कृषि क्षेत्रमा विदेशी कामदारको अभाव देखिएको भन्दै त्यहाँको सरकारले नयाँ भर्ना प्रक्रिया खुलाउने भएको छ ।
मलेसियाले विदेशी कामदारको अभाव भएपछि नयाँ श्रम स्वीकृति खुलाउन लागेको त्यहाँको सञ्चारमाध्यमहरुले जनाएका छन् । मलेसियामा पछिल्लो समय विशेषगरी निर्माण क्षेत्रमा काम गर्ने मजदुर र सुरक्षा गार्डहरुको अभाव हुँदै गएको ‘द स्टार’ले उल्लेख गरेको छ । रोजगारदाताहरुबाट आप्रवासी कामदारको माग बढ्दै जानु र श्रमबजारमा कामदारको अभाव देखिएपछि मलेसिया सरकार दबाबमा परेको उक्त सञ्चारमाध्यले उल्लेख गरेको छ ।
यद्यपि, विदेशी कामदारको अभाव पूर्ति गर्न आगामी नोभेम्बरदेखि रोजगारदाताहरुलाई विदेशी कामदारको कोटा दिने सरकारले तयारी गरेको बताइएको छ । यसअघि मलेसियाले अनैतिक गतिविधि बढेको र स्थानीय कामदारलाई नै श्रममा प्रोत्साहन गर्ने भन्दै गत मे ३१ देखि विदेशी कामदारको नयाँ भर्ना स्वीकृति रोकेको थियो । मलेसियामा २३ लाखभन्दा बढी विदेशी कामदार कार्यरत रहेको अनुमान गरिएको छ । जसमा ११ लाख विदेशी कामदार अवैधरुपमा काम गरिरहेको त्यहाँको गृह मन्त्रालयले जनाएको छ ।
विदेशी अवैध कामदारमाथि कडाइ गर्ने र स्थानीयलाई अवसर दिने नीति लिए पनि श्रमबजारमा कामदारको अभाव देखिएपछि नयाँ कामदार भर्ना खुलाउने निर्णयमा त्यहाँको सरकार पुगेको बताइएको छ । विदेशी कामदारको भर्ना तथा कोटा स्वीकृति गर्ने अधिकार मलेसियाको गृह मन्त्रालयले लिएको छ । तसर्थ मलेसियाली मानव संसाधन मन्त्रालयअन्तर्गत रहेको विदेशी कामदारको कोटा स्वीकृति गर्ने विदेशी कामदार व्यवस्थापन महाशाखा (बिपिपिए) लाई गृह मन्त्रालयमा गाभिएको उक्त सञ्चारमाध्यमले जनाएको छ ।
मलेसियाको नयाँ कामदार भर्ना लिने निर्णयले नेपाली कामदारलाई भने राहत हुनेछ । मलेसिया नेपालीहरुको प्रमुख श्रम गन्तव्य रहँदै आएको छ । यद्यपि, विदेशी कामदार नलिने नीतिले गत आर्थिक वर्षमा थोरै मात्र नेपालीहरु रोजगारीका लागि मलेसिया पुगेका थिए । अधिकांश नेपालीहरु मलेसियाको निर्माण, सुरक्षा, उद्योग, खानी तथा उत्खनन् कृषिलगायतका क्षेत्रमा रोजगारीका लागि जाने गरेका छन् ।
यसमध्ये पनि सेक्युरिटी गार्डका क्षेत्रमा नेपालीहरुले मलेसियामा छाप नै पारिसकेका छन् । मलेसियामा अघिल्लो वर्षदेखि नै न्यूनतम पारिश्रमिकसमेत वृद्धि गरेर १५ सय रिंगेट पुर्याएको छ । यसबाट पनि मलेसियामा नेपाली कामदारको आकर्षण बढेको पाइएको छ । हाल मलेसियामा चार लाखभन्दा बढी नेपाली काम गरिरहेको सरकारी अनुमान रहेको छ ।
