काठमाडौं– वैदेशिक रोजगारीमा जाने नेपाली कामदारले श्रमसम्बन्धी सबै सेवा भैरहवा र पोखराबाट पनि पाउने भएका छन् । श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जानका लागि चाहिने सबै संयन्त्र भैरहवा र पोखराको विमानस्थलको पायक पर्ने स्थानबाट सञ्चालन हुने जनाएको छ ।
श्रममन्त्री शरतसिंह भण्डारीको उपस्थितिमा सरोकारवाला संघसंस्था र कार्यालयहरूका प्रतिनिधिसहित मंगलबार बसेको बैठकले गरेको निर्णयअनुसार मन्त्रालयले वैदेशिक रोजगारीमा जान चाहिने सबै संयन्त्रलाई भैरहवा र पोखरामा स्थापना गरी कार्यान्वयन प्रक्रिया अघि बढाउने निर्णय गरेको छ । मन्त्रालयले एक विज्ञप्ति जारी गर्दै भैरहवाको गौतमबुद्ध अन्तर्राष्ट्रिय विमानस्थल र पोखरा क्षेत्रीय अन्तर्राष्ट्रिय विमानस्थलबाट वैदेशिक रोजगारीमा जाने व्यक्तिहरूलाई आवश्यक पर्ने सबै सेवासुविधा दिनेगरी सम्बन्धित विमानस्थलको पायक पर्ने स्थान र कार्यालयबाटै उपलब्ध गराउने उद्देश्यले यस्तो निर्णय गरिएको उल्लेख गरेको छ ।
मन्त्रालयले वैदेशिक रोजगारीमा जान चाहने व्यक्तिहरूले स्वास्थ्य परीक्षण, पूर्वप्रस्थान अभिमुखीकरण तालिम, बिमा, श्रम स्वीकृति र भिसासँग सम्बन्धित कामका लागि काठमाडौं आउनुपर्ने अवस्था अन्त्य गर्न हाल प्रदान गरिरहेको सेवा र सम्पादन गरिरहेका काम भैरहवा र पोखराबाट गर्नेगरी आवश्यक व्यवस्था मिलाउन सम्बन्धित संघसंस्थालाई निर्देशन दिएको छ । यस्तै सामाजिक सुरक्षा कोष, वैदेशिक रोजगार बोर्डको सचिवालयबाट प्रदान गरिने सेवाको सम्बन्धमा पनि सम्बन्धित कार्यालयलाई व्यवस्था मिलाउन मन्त्रालयले निर्देशन दिएको छ ।
यसैगरी श्रम स्वीकृतिलगायतका सेवालाई सरल र सहज बनाउन वैदेशिक रोजगार विभागले आवश्यक व्यवस्था मिलाउने बताइएको छ । सर्वपक्षीय बैठकबाट गन्तव्य मुलुकका ‘भिसा सेन्टर’ स्थापनाका लागि परराष्ट्र मन्त्रालयमार्फत अनुरोध गर्ने निर्णयसमेत भएको मन्त्रालयले उल्लेख गरेको छ । साथै वैदेशिक रोजगारसम्बन्धी संयन्त्रहरू प्रदेशमा लैजान ऐन, नियम, कार्यविधिमा बाधा अड्चन देखिए र त्यसलाई केही संशोधन वा निर्णय गर्नुपर्ने भए अध्ययन गरी तत्काल निर्णय गर्ने उल्लेख गरिएको । यसको कार्यान्वयनका लागि श्रम मन्त्रालयअन्तर्गत वैदेशिक रोजगारसम्बन्धी सेवाहरुलाई क्रमशः प्रदेशस्तरमा लैजान आवश्यक तयारी गर्ने निर्णय भएको पनि मन्त्रालयले जनाएको छ ।
सर्वपक्षीय सरोकारवालासमेतको उपस्थितिमा बसेको बैठकले गरेको यस्तो निर्णयबाट सेवाग्राहीलाई वैदेशिक रोजगारसम्बन्धी सेवा लिन काठमाडौं नै धाउनुपर्ने बाध्यता हट्ने मन्त्रालयका उपसचिव एवं सूचना अधिकारी कविराज उप्रेतीले बताए । उनका अनुसार वैदेशिक रोजगारीका लागि चाहिने सबै संयन्त्र स्थापना गरी सेवा प्रवाह गर्न सरोकारवालाहरु सहमत भएका छन् । श्रम मन्त्रालयले पोखरा र भैरहवास्थित अन्तर्राष्ट्रिय विमानस्थल सञ्चालनमा सहयोग पु¥याउने उद्देश्यले वैदेशिक रोजगारका सबै सेवाहरु सोही ठाउँबाट सञ्चालन गर्ने निर्णय गरेको उप्रेतीले जानकारी दिए । ‘यति भएपछि सेवाग्राहीलाई काठमाडौं नै धाउनुपर्ने अवस्था हुँदैन,’ उनले भने ।
यसअघिदेखि नै भैरहवा र पोखरामा प्रादेशिक श्रम कार्यालयमार्फत श्रम स्वीकृतिको कार्य गर्दै आए पनि वैदेशिक रोजगारीमा जान आवश्यक पर्ने संयन्त्रहरु अभिमुखीकरण तालिम, स्वास्थ्य परीक्षण, बिमा, भिसालगायतको सेवा लिन काठमाडौं नै आउनुपर्ने अवस्था विद्यमान छ । सरकारको पछिल्लो निर्णयले वैदेशिक रोजगारीमा जाने युवाहरु लाभान्वित हुने बताइएको छ । सरकारले अघिल्लो वर्षदेखि वैदेशिक रोजगार कार्यालय ताहाचल काठमाडौंबाहेक प्रादेशिकरुपमा विराटनगर, जनकपुर, पोखरा, बुटवल, सुर्खेत र धनगढीमा रहेका श्रम तथा रोजगार कार्यालयबाट अनलाइनमार्फत श्रम स्वीकृतिसम्बन्धी सम्पूर्ण सेवा प्रवाह गर्दै आइरहेको छ ।
