काठमाडौं - संयुक्त अरब इमिरेट्स (युएई)स्थित नेपाली दूतावासले एक वर्षको कार्यसम्पादन विवरण सार्वजनिक गरेको छ । दूतावासले गत आर्थिक वर्ष २०८०/८१ मा सम्पादन भएका प्रमुख सेवाहरुको तथ्यांकीय विवरण सार्वजनिक गरेको हो ।
दूतावासले प्रमुख कार्यसम्पादन विवरण महिनैपिच्छे सार्वजनिक गर्दै आइरहेको बताउँदै वर्षिकरुपमा एकमुष्ठ कार्यसम्पादनको विवरण सार्वजनिक गरेको जनाएको छ । एक वर्षको अवधिमा दूतावासले ४६ हजार ४०४ पासपोर्ट नवीकरणका लागि संकलन भएको उल्लेख गरेको छ भने ४३ हजार ७१८ वटा पासपोर्ट नवीकरण पश्चात वितरण गरिएको जनाएको छ ।
त्यस्तै ७०२ जनालाई भिसा प्रदान गरिएको छ भने ४४ जनाको जन्मदर्तासमेत गरिएको छ । यसैगरी दुई हजार १३५ जनाको ट्राभल डकुमेन्ट बनाइएको विवरणमा उल्लेख छ । दुई हजार ८४ जनाको कागजात प्रामाणीकरण गरिएको छ । साथै, रोजगारीका लागि संस्थागतरुपमा आएको दुई हजार ९७२ वटा मागपत्र प्रमाणीकरण भएको दूतावासले जनाएको छ । एक हजार ६७१ वटा समूहगत भिसा प्रमाणीकरण गरेको दूतावासले विभिन्न कारणले मृत्यु भएका नेपालीहरुको २३१ वटा शव व्यवस्थापन गरेको बताएको छ ।
यस्तै एक वर्षमा विभिन्न माध्यमबाट आएका सात हजार ५३४ वटा गुनासा तथा उजुरीहरुको सम्बोधन गरेको उल्लेख छ । वर्षभरिमा क्षतिपूर्ति र इन्स्योरेन्सबापत ३४ लाख ४६ हजार ५०० एइडी अर्थात् झण्डै १२ करोड ६० लाख ७८ हजार रुपैयाँ खर्च भएको दूतावासले जनाएको छ ।
