काठमाडौं– गत आर्थिक वर्ष २०८०/८१ को अन्तिम महिना अर्थात् असारमा वैदेशिक रोजगारीका लागि ५८ हजारभन्दा बढी नेपाली युवा विदेसिएका छन् । वैदेशिक रोजगार विभागले सार्वजनिक गरेको तथ्यांकअनुसार असार महिनामा ५८ हजार ७३६ जना नेपाली नयाँ तथा पुनः श्रम स्वीकृति लिएर रोजगारीका लागि विदेसिएका हुन् ।
विभागको तथ्यांकअनुसार नेपाली युवा १०२ वटा मुलुकमा श्रम स्वीकृति लिएर रोजगारीका लागि गएका छन् । असारमा विदेसिने नेपालीको संख्या गत जेठ महिनाको भन्दा १४ हजार १२५ जनाले कम रहेको छ । जेठमा ७२ हजार ८६१ जनाले वैदेशिक रोजगारीका लागि श्रम स्वीकृति लिएका थिए । यसरी जाने श्रमिकको संख्या अघिल्लो वैशाख महिनामा ७० हजार ६३७ थियो ।
गत आवको सुरुआती महिनादेखि (वैशाखबाहेक) संयुक्त अरब इमिरेट्स (युएई) नेपालीहरुको पहिलो गन्तव्य बन्न सफल भएको । असार महिनामा युएई जान १८ हजार २०० जनाले श्रम स्वीकृति लिएका छन् । गत जेठमा युएई जान २० हजार ४२४ जनाले श्रम स्वीकृति लिएकोमा असारमा यो संख्या घटेको छ । त्यस्तै साउदी अरब दोस्रो स्थानमा परेको छ । असारमा साउदी जान १२ हजार २७२ जनाले श्रम स्वीकृति लिएका छन् । यसैगरी असारमा कतार जान १० हजार ३० जनाले श्रम स्वीकृति लिएका छन् । तेस्रो स्थानमा परेको कतार जाने नेपालीको संख्या प्रत्येक महिना हाराहारी नै रहे पनि अघिल्ला महिनाहरुभन्दा यसपटक घटेको विभागको तथ्यांकले देखाएको छ ।
यसैगरी पाँचाै स्थानमा रहँदै आएको कुवेत चौथो स्थानमा उक्लिएको छ । कुवेतमा तीन हजार २५३ जना नेपाली श्रमिक रोजगारीका लागि पुगेका छन् । प्रत्येक महिना कुवेत जाने श्रमिकहरुको संख्यामा त्यस्तो धेरै उतारचढाव देखिएको छैन । त्यस्तै नेपालीहरुको पाँचौं गन्तव्य युरोपेली मुलुक क्रोएसिया भएको छ । यहाँ जान असारमा दुई हजार २६६ जनाले श्रम स्वीकृति लिएका छन् ।
गत आव सुरु भएयता कतार र साउदी जाने नेपालीको संख्या हराहारीजस्तो देखिए पनि युएई जाने संख्यामा भने उल्लेख्य वृद्धि भएको विभागको तथ्यांकले देखाएको छ । त्यस्तै अघिल्लो आवमा नेपालीहरुको पहिलो गन्तव्य रहेको मलेसियामा गत आवको अन्तिम महिना असारमा जम्मा एक हजार ४६४ जनामात्र गएको विभागको तथ्यांकले देखाएको छ ।
यसैगरी रोमानिया दुई हजार १४८, जापान एक हजार १०२, बहराइन ९२८, मोरिसस ८७८, साइप्रस ७४२, माल्दिभ्स ६०७, ओमानका लागि ४०५ र कंगो जान ४०३ जनाले श्रम स्वीकृति लिएका छन् । त्यस्तै असार महिनामा इपिएस प्रणालीबाट दक्षिण कोरिया जाने नेपालीको संख्या एक हजार १३७ रहेको छ ।
यसैगरी विभागबाट कूल श्रम स्वीकृति लिनेमध्ये पुनः श्रम स्वीकृति लिने १९ हजार ९८९ जना छन् भने पहिलोपटक विदेश जान श्रम स्वीकृति लिनेको संख्या ३८ हजार ७४७ जना रहेका छन् । गत आवको अन्तिम महिनामा श्रम स्वीकृति लिनेमध्ये छ हजार ६११ जना महिला श्रमिक रहेको विभागले उल्लेख गरेको छ । पछिल्लो समय वैदेशिक रोजगारीका लागि युरोपेली मुलुकमा जान श्रम स्वीकृति लिने नेपालीको संख्या उल्लेख्यरुपमा बढ्दै गएकोसमेत विभागको तथ्यांकले देखाएको छ ।
धेरै श्रमिक गएका मुलुक
युएई– १८,२००
साउदी– १२,२७२
कतार– १०,०३०
कुवेत– ३,२५३
क्रोएसिया– २,२६६
रोमानिया– २,१४८
मलेसिया– १,४६४
कोरिया– १,१३७
जापान– १,१०२
बहराइन– ९२८
