काठमाडौं – नेपाल वैदेशिक रोजगार व्यवसायी संघको टोलीले नवनियुक्त प्रधानमन्त्री केपी शर्मा ओलीलाई बधाई तथा शुभकामना दिएको छ । संघका अध्यक्ष राजेन्द्र भण्डारीको नेतृत्वमा गएको व्यवसायीहरुको प्रतिनिधिमण्डलले बुधबार सिंहदरबारमा पुगी प्रधानमन्त्री ओलीलाई बधाई तथा शुभकामना दिएको हो ।
प्रधानमन्त्री ओलीलाई बधाई तथा शुभकामना दिँदै वैदेशिक रोजगारीको क्षेत्रमा व्यवसायीले भोग्दै आएका केही जटिल समस्या समाधान गर्नेबारे जानकारी गराइएको संघका महासचिव मेघनाथ भुर्तेलले बताए । ‘हामीले त्यस्तो माग लिएर गएका थिएनौं, त्यो समय मागपत्र प्रस्तुत गरेर बस्ने समय पनि थिएन,’ उनले भने, ‘तर जटिल समस्याको रुपमा रहेको १०० जना पठाउन नसकेका म्यानपावरहरुको नवीकरणका लागि श्रम मन्त्रालयसँग सहजीकरण गराइदिन मौखिकरुपमै आग्रह गर्यौं ।’
प्रधानमन्त्री ओलीले व्यवसायी र वैदेशिक रोजगारसँग सम्बन्धित समस्याहरुबारे जानकार रहेकाले यसको निराकरणका लागि आवश्यक पहल गरिदिने बताएको महासचिव भुर्तेलले जानकारी दिए । यस विषयमा नवनियुक्त श्रम, रोजगार तथा सामाजिक सुरक्षामन्त्री शरतसिंह भण्डारीलाई पनि जानकारी दिने र समस्या समाधानको लागि आग्रह गरिने उनले बताए ।
संघले औपचारिकरुपमा केही दिनमै मन्त्री भण्डारीलाई बधाई तथा शुभकामना दिने र वैदेशिक रोजगारको क्षेत्रमा व्यवसायीले खेप्नुपरेको समस्या समाधानका लागि पहल गरिदिन आग्रह गर्ने तयारी गरेको महासचिव भुर्तेलले बताए ।
