काठमाडौं– नेकपा एमालेको उद्योग व्यवसाय विशेष जिल्ला कमिटीको दोस्रो अधिवेशन सम्पन्न भएको छ । उक्त अधिवेशनमार्फत वैदेशिक रोजगार क्षेत्रमा नेतृत्व गरिरहेका व्यवसायीहरु विभिन्न पदमा निर्वाचित भएर बलियो उपस्थिति जनाएका छन् ।
जिल्ला कमिटीको सचिव पदका लागि नेपाल वैदेशिक रोजगार व्यवसायी संघका पूर्वअध्यक्ष रोहन गुरुङ र वर्तमान अध्यक्ष राजेन्द्र भण्डारीबीच नै प्रतिस्पर्धा भएको थियो । जसमा भण्डारी विजयी भए । उनले पदाधिकारीतर्फकै अत्यधिक १२४ मत ल्याउन सफल भए । भण्डारीका प्रतिस्पर्धी रहेका गुरुङले ५० मत प्राप्त गरे । सर्वसम्मत चयनका लागि प्रयास भए पनि सहमति जुट्न नसकेपछि एकै क्षेत्रका दुई व्यवसायीबीच सचिव पदमा प्रतिस्पर्धा भएको बताइएको छ ।
यसैगरी संघका प्रथम उपाध्यक्ष डिकबहादुर खत्री, द्वितीय उपाध्यक्ष सञ्जु गुरुङ, कोषाध्य सरिता घले जिल्ला कमिटी सदस्यमा निर्विरोध निर्वाचित भएका छन् । वैदेशिक रोजगार व्यवसायी मिलन कट्टेल, भिष्मराज शर्मा शिवाकोटी र लोकमणि मियाङ्बो लिम्बू पनि सदस्यमा निर्विरोध निर्वाचित भएका छन् । संघका पूर्वमहासचिवसमेत भइसकेका नरेश गेलाल खुला प्रतिस्पर्धामार्फत सदस्यमा विजयी भएका छन् ।
विभिन्न इलाका कमिटी मिलेर बन्ने विशेष जिल्ला कमिटीको अध्यक्ष भने गोलाप्रथाबाट छानिएको छ । अध्यक्षका प्रतिस्पर्धी गोविन्दप्रसाद घिमिरे र यमप्रसाद तिवारीले समान (८९/८९) मत पाएका थिए । गोलाप्रथाबाट घिमिरे अध्यक्षमा निर्वाचित भए । त्यस्तै उपाध्यक्षमा माधव भट्टराई, उपसचिवमा जीवन थापा मगर र महिला उपसचिवमा मनिषा सुब्बा निर्वाचित भएका छन् ।
