काठमाडौं– श्रम, रोजगार तथा सामाजिक सुरक्षा मन्त्रालयले सञ्चालनमा ल्याएको ‘श्रमाधान कल सेन्टर’मा गुनासो राख्ने सेवाग्राहीको संख्या बढ्न थालेको छ । श्रम मन्त्रालयले गत वैशाख १६ गते श्रमाधान कल सेन्टर (सञ्चालन तथा व्यवस्थापन) कार्यविधि जारी गर्दै कार्यान्वयनमा ल्याएपछि गुनासो तथा उजुरी दिने सेवाग्राहीको संख्या बढ्न थालेको हो ।
वैदेशिक रोजगारीमा रहेका श्रमिकको गुनासो सुन्न यसअघि श्रम मन्त्रालयमा नै कल सेन्टर सञ्चालनमा रहे पनि त्यसको प्रभावकारिता नभएको भन्दै श्रममन्त्री डोलप्रसाद अर्यालले कार्यविधि जारी गरेर श्रमाधान कल सेन्टर सञ्चालनमा ल्याएका थिए । हाल वैदेशिक रोजगार बोर्डमार्फत कल सेन्टर सञ्चालन हुने गरेको छ । बोर्डमा कल सेन्टर राखिएसँगै स्वदेश तथा विदेशबाट गुनासो तथा उजुरी दिने र श्रमसम्बन्धी जिज्ञासा राख्ने नेपालीको संख्या ह्वात्तै बढेको बताइएको छ ।
विगतमा दैनिकजसो ७०÷८० जनाको मात्रै गुनासो तथा उजुरी आउने गरेकामा अहिले सरदर ३०० भन्दा बढी आउने गरेको श्रमाधान कल सेन्टरकी सुपरभाइजर सरिना महर्जनले बताइन् । ‘पछिल्लो रेकर्डअनुसार ३०० भन्दा बढी नै गुनासो तथा उजुरी आउने गरेका छन्,’ उनले भनिन्, ‘अहिले सेवाग्राहीको चापले गर्दा कल सेन्टरको व्यस्तता बढेको छ ।’ सेवाग्राहीका गुनासा तथा समस्याहरू जतिसक्दो चाँडो सम्बोधन गर्नेगरी काम भइरहेको उनले जानकारी दिइन् ।
श्रमाधान कल सेन्टरमा सेवाग्राहीको चाप बढ्दै गएपछि स्रोत साधन र जनशक्तिसमेत अभाव देखिएको छ । अहिले १० जना कर्मचारी र चारवटा कम्प्युटरको भरमा काम गर्नुपर्दा सेवाग्राहीको गुनासो तथा उजुरी व्यवस्थापनमा कठिनाइ भइरहेको बोर्डले जनाएको छ । दैनिकरुपमा सेवाग्राहीको चाप बढ्न थालेपछि एउटा कोठाबाट सञ्चालन हुँदै आएको कल सेन्टरलाई दुई वटा कोठामा विस्तार गर्न लागिएको बोर्डले जनाएको छ । साथै, बोर्डले नै दुई जना कर्मचारी थपेर सेवा दिन थालेको बोर्डका निर्देशक एवं प्रवक्ता टीकाराम ढकालले बताए ।
उनका अनुसार २४सै घण्टा सञ्चालनमा रहने कल सेन्टरमा स्वदेश तथा विदेशबाट जतिबेला पनि गुनासो राख्न र उजुरी दिन सक्ने व्यवस्था मिलाइएको छ । त्यसका लागि दैनिक तीन सिफ्टमा तीन–तीन जनाको दरले कर्मचारी व्यवस्थापन गरिएको प्रवक्ता ढकालले बताए । ‘यसरी कल सेन्टरमा गुनासो राखेपछि तत्काल सुनुवाइ हुन्छ भन्ने सन्देश गएको छ,’ उनले भने, ‘रेकर्ड हेर्दा स्वदेशभन्दा पनि विदेश जान चाहने र गएका नेपालीहरुले नै आफ्ना गुनासो राख्ने गरेका छन्, त्यसमा पनि सबैभन्दा बढी ठगीका घटनासँग सम्बन्धित छन् ।’
सेवाग्राहीले कल सेन्टरमा भौतिकरुपमा मात्र नभई सबै प्रकारका विद्युतीय माध्यम प्रयोग गरेर प्रत्यक्ष वा अप्रत्यक्षरुपमा आफ्ना समस्या, गुनासो, जिज्ञासा, सुझाव एवं उजुरी दिनसक्ने व्यवस्था गरिएको छ । त्यस्तै सामाजिक सञ्जाल (फेसबुक, ह्वाट्सएप, भाइबर, इमो, इन्स्टाग्राम, इमेल, एक्सलगायतबाट पनि गुनासो दर्ता गराउन सकिने बोर्डले जनाएको छ ।
