नेपालजी पहिलाबाटै कहिले यता र उता जोडिने जस्तो देखिए पनि अहिलेको समीकरणभन्दा बाहिर उहाँ जानु हुन्न ।
पुष्पकमल दाहाल
प्रधानमन्त्री
काठमाडौं– प्रधानमन्त्री बन्न छटपटीमा रहेका माधव नेपाल नेतृत्वको नेकपा (एकीकृत समाजवादी) केन्द्रीय सत्ता गठबन्धनबाट बाहिरिने अवस्थामा पुगेको छ । प्रधानमन्त्रीसमेत रहेका नेकपा (माओवादी केन्द्र)का अध्यक्ष पुष्पकमल दाहाल र एमाले अध्यक्ष केपी शर्मा ओली प्रधानमन्त्री बनाउन तयार नभएपछि चिढिएका नेपाल कांग्रेससहितको विपक्षी दलहरूले बनाउने भनिएको वैकल्पिक गठबन्धनमा जाने भएका छन् । दलका प्रमुख सचेतक मेटमणि चौधरीले प्रधानमन्त्री दाहाल सत्तामोहमा मात्रै फसेको र ओली भने महाषड्यन्त्रकारी नेता भएको भन्दै गठबन्धनमा रहिरहन नसक्ने स्पष्ट पारे ।
उनका अनुसार मधेस प्रदेशमा उपेन्द्र यादव नेतृत्वको जसपाका मुख्यमन्त्री सरोजकुमार यादवले विश्वासको मत दिएर नेकपा एस कांग्रेससहितको विपक्षी दलहरूको कित्तामा पुग्नेछ । चौधरीले प्रधानमन्त्री दाहाल र ओलीको आलोचना गर्दै प्रभावसँग भने, ‘सत्ता स्वार्थका लागि प्रचण्डले जे गर्दा पनि हुने, ओलीले जालझेल र षड्यन्त्र रचेर हामीलाई जहिल्यै भित्तामै पु¥याउँदा हुने अनि हामीले पनि जता सहज हुन्छ त्यतै सहकार्य गर्दा नहुने हुन्छ र ?’
मधेसमा जसपालाई कांग्रेस, नेकपा एस र लोसपाले साथ दिएको अवस्थामा सरकार टिक्नेछ । किनभने यी दलहरूको सांसद संख्या आवश्यक बहुमतका लागि पर्याप्त छ । बुधबारमात्रै कांग्रेस सभापति शेरबहादुर देउवा निवास बूढानीलकण्ठमा देउवासँगै, नेकपा एसका अध्यक्ष नेपाल, जसपा अध्यक्ष उपेन्द्र यादव, लोसपा अध्यक्ष महन्थ ठाकुरलगायत नेताहरू सम्मिलित बैठक बस्यो । त्यही बैठकले मधेसमा यादवको दल जसपाको सरकारलाई टिकाउने सहमति गरेको थियो । त्यसका लागि मुख्यमन्त्री सरोजकुमार यादवलाई विश्वासको मत दिन सत्तापक्षीय दल नेकपा एसका अध्यक्ष नेपालसँगै अन्य विपक्षी दलका नेताहरू तयार भए ।
सत्ता स्वार्थका लागि पुष्पकमलले जे गर्दा पनि हुने, ओलीले जालझेल र षड्यन्त्र रचेर हामीलाई जहिल्यै भित्तामै पुर्याउँदा हुने अनि हामीले पनि जता सहज हुन्छ त्यतै सहकार्य गर्दा नहुने हुन्छ र ?
मेटमणि चौधरी
प्रमुख सचेतक, नेकपा एकीकृत समाजवादी
‘राजनीतिक संस्कार र इमानदारिताको कसीमा ओली र प्रचण्डभन्दा धेरैगुणा देउवाजीसहितका नेताहरू सही छन्’, प्रमुख सचेतक चौधरीले भने, ‘हामी अहिलेसम्म प्रचण्ड जता गए, त्यतात्यतै गएर साथ दिएका होइनौँ र ? यति अस्थिर नेतालाई किन जहिल्यैै बोक्ने ?’सुदूरपश्चिम प्रदेश सरकारका मुख्यमन्त्री दीर्घ सोडारीलाई एमालेको असहयोग छ । हालसम्म सोडारीको सरकारमा एमालेले मन्त्री पठाएकै छैन । यसले गर्दा पनि माधव नेपाल ओलीसँग रुष्ट छन् । अर्कातिर, वर्तमान गठबन्धनबाट एक वर्ष भए पनि प्रधानमन्त्री हुने चाहना नेता नेपालको हो । तर, ओली र दाहालले चाहेका छैनन् ।
यसपछि प्रधानमन्त्रीको अफर गरिसकेको कांग्रेस पार्टीको कित्तामा उभिने पक्षमा नेकपा एस देखिएको हो । त्यसो भएको अवस्थामा वर्तमान सत्ता गठबन्धन दलहरू मिलेर बनेको बागमती सरकार संकटमा पर्ने देखिएको छ । लुम्बिनी सरकारलाई धक्का लाग्न सक्ने ठानिएको छ । सुदूरपश्चिममा पनि नेकपा एस कांग्रेससहितको दलसँग सहकार्य गरेर सरकार गठन गर्न सक्ने अवस्थामा छ । यसरी प्रदेश सरकारहरूमा पनि माधव नेपालको नेकपा एस केन्द्रीय गठबन्धनबाट अलग भए असर पर्ने स्पष्ट छ ।
२१ फागुनमा एमालेसहितको गठबन्धन बन्दै गर्दा कांग्रेसले भत्काउने प्रयास गरेको थियो । वैकल्पिक सत्ता गठबन्धन निर्माण गरेर अघि बढ्न भरमग्दुर कदम चालेको थियो । तर, उपेन्द्र नेतृत्वको जसपा विभाजनपछि वैकल्पिक गठबन्धन बनाउने देउवा, नेपाल र यादवको सपनामा तुषारापात भयो । यद्यपि, बुधबार भएको बूढानीलकण्ठको जमघटले फेरि वैकल्पिक गठबन्धन बनाउने कार्यले गति लिने ठानिएको छ ।
प्रधानमन्त्री दाहालले भने नेता नेपाल सत्ता गठबन्धनबाट नबाहिरिने ठोकुवा गरेका छन् । बिहीबार विराटनगरमा पत्रकारहरूसँग कुराकानी गर्दै प्रधानमन्त्री दाहालले भने, ‘नेपालजी पहिलाबाटै कहिले यता र उता जोडिने जस्तो देखिए पनि अहिलेको समीकरणभन्दा बाहिर उहाँ जानु हुन्न ।’दाहालले नेपाल प्रमुख प्रतिपक्षी दल कांग्रेससहितको बैठकमा सहभागी हुनुलाई आफूले असहज रूपले नलिएको बताए । ‘माधवजी प्रमुख प्रतिपक्षी दल कांग्रेससहितको बैठकमा सहभागी हुनुलाई मैले त्यति असहज ठानेको छैन’, उनले भने, ‘मेरो बिहान मात्रै कुरा हुँदा माधवजीले यो समीकरणभन्दा बाहिर छैन र हुँदैन भन्ने कुरा क्लियर गर्नुभएको छ ।’
उनले मधेसमा केन्द्रीय सत्ता गठबन्धनअनुसारकै सरकार बन्ने दाबीसमेत गरेका छन् । सोहीअनुसार बिहीबार एमाले, माओवादी र जनमत पार्टीबीच मधेसमा सरकार गठन गर्ने समझदारी भएको छ । जुन समझदारीको आधारमा नेकपा एस र लोसपाले पनि सहयोग गर्ने अपेक्षा यी तीन दलको छ । मधेस संसदमा यी तीन दलको सरकार गठनका लागि आवश्यक बहुमत पुग्ने अवस्था भने छैन । यसले गर्दा माधव नेपाल कांग्रेससहितको विपक्षी दलतिर ढल्किँदा प्रधानमन्त्री दाहालसँगै ओलीलाई झस्को परेको छ । नेकपा एमालेकी उपाध्यक्ष अष्टलक्ष्मी शाक्यले भने सुदूरपश्चिममा त्यहाँका मुख्यमन्त्री सोडारीलाई समर्थन गर्न र अहिलेको गठबन्धनबाट प्रधानमन्त्री बन्ने निश्चित गराउन नेपालले दबाब दिएको अर्थमा बुझेकी छिन् ।
‘माधव कमरेडको सत्तामोह भनिसाध्ये छैन । उहाँ जे पनि गर्नुहुन्छ । नेकपा हुँदा उहाँले जेजे गर्नुभयो, छर्लङ्गै छ’, उनले भनिन्, ‘सायद अहिले उहाँ प्रधानमन्त्री हुने र सुदूरपश्चिममा आफ्नो दलका मुख्यमन्त्री सोडारीलाई साथ दिइयोस् भनेर एमालेमाथि दबाब बढाउँदै हुनुहुन्छ ।’संघीय सरकारमा मागेजति मन्त्री नपाएको झोंक माधव नेपाललाई छ । राष्ट्रियसभा अध्यक्ष र उपाध्यक्षमध्ये दुवै पद नपाएकोमा पनि नेपाल असन्तुष्ट छन् । जसले गर्दा उनी कांग्रेससहितको गठबन्धनमा गएर प्रधानमन्त्री हुने लिप्त चाहनासहित अघि बढेको देखिएको छ ।
-1752335779.jpg)
