काठमाडौं– चालु आर्थिक वर्षको आठ महिनामा रोजगारीका लागि विदेशिने नेपालीमध्ये साढे ७१ प्रतिशत सीपयुक्त (दक्ष) रहेको पाइएको छ । वैदेशिक रोजगार विभागले सार्वजनिक गरेको तथ्यांकअनुसार चालु आवको साउनदेखि फागुन मसान्तसम्म सीप सिकेर विदेश जाने नेपाली श्रमिकको संख्या तीन लाख ३५ हजार ५९६ जना रहेको छ । यो उक्त अवधिमा रोजगारीका लागि विदेशिने कूल श्रमिक संख्याको ७१.६८ प्रतिशत हो ।
विभागको तथ्यांकअनुसार चालु आवको आठ महिनामा श्रम स्वीकृति लिएर विदेशिनेको संख्या चार लाख ६८ हजार १३५ जना रहेको छ । जसमध्ये ५२ हजार २६७ जना महिला रहेका छन् । उक्त अवधिमा सीप सिकेर विदेशिने महिलाको संख्या भने ३२ हजार १०७ जना रहेको छ ।
सीप सिकेर विदेशिने नेपाली साउन महिनामा ३८ हजार ७४५ जना थिए । भदौमा ३५ हजार ८१०, असोजमा ३८ हजार ७३८, कात्तिकमा ३० हजार ८३२, मंसिरमा ४९ हजार ८५, पुसमा ४८ हजार १६१, माघमा ४५ हजार ६४८ र फागुनमा ४७ हजार ५७७ जना सीपयुक्त श्रमिक विदेशिएको विभागको तथ्यांकमा देखिन्छ ।
समीक्षा अवधिमा ३८ हजार २५२ जना अर्धदक्ष श्रमिक रोजगारीका लागि विदेशिएका छन् । पेसागत दक्षता हासिल गरेका एक हजार १२६ जनाले वैदेशिक रोजगारीका लागि श्रम स्वीकृति लिएका छन् । फागुन मसान्तसम्मको आठ महिना अवधिमा विशिष्ट दक्षता (विशेषज्ञता) हासिल गरेका ४१७ जना पनि विदेशिएका छन् ।
यस अवधिमा ठूलो संख्यामा अदक्ष श्रमिक पनि रोजगारीका लागि विदेशिएको विभागको तथ्यांकमा उल्लेख गरिएको छ । फागुन मसान्तसम्म ९३ हजार ७७४ जना अदक्ष (कोरा) श्रमिक विदेशिएका छन् । यो उक्त अवधिमा श्रम स्वीकृति लिएर विदेशिनेको २८ प्रतिशत हो ।
गत आव २०७९÷८० मा विशिष्ट दक्षता हासिल गरेका श्रमिकका रुपमा २५७ जना, पेसागत दक्षता भएका श्रमिक एक हजार १५३ र सीपयुक्त दक्ष श्रमिक पाँच लाख छ हजार ५४६ जना रोजगारीका लागि विदेशिएका थिए । यस्तै गत वर्ष ६० हजार ५५५ जना अर्धदक्ष र दुई लाख दुई हजार २१६ जना अदक्षका श्रमिकका रुपमा विदेश गएका थिए ।
सरकारले रोजगारमूलक सीप विकास तालिम सञ्चालन कार्यविधि, २०७५ लागू गरेयता सीप सिकेर विदेश जाने श्रमिकको संख्या बढ्दो क्रममा रहेको विभागका महानिर्देशक डण्डुराज घिमिरेले बताए । उनका अनुसार पछिल्ला आर्थिक वर्षहरुमा वैदेशिक रोजगारीमा जाने अदक्ष श्रमिकको संख्या क्रमशः घट्दै गइरहेको छ । ‘सीप विकास तालिम अनिवार्य हुँदाहुँदै पनि यसको कार्यान्वयनमा कठिनाइ भएका कारण अझै पनि ठूलो संख्यामा अदक्ष श्रमिक रोजगारीका लागि विदेश गइरहेका छन्,’ महानिर्देशक घिमिरेले भने ।
