- चालु आर्थिक वर्षको छ महिनामा तीन लाख ४३ हजारले लिए श्रम स्वीकृति
- गत वर्ष सोही अवधिमा श्रम स्वीकृति लिनेको संख्या चार लाख १४ हजार
- गत आर्थिक वर्षभरि पहिलो स्थान ओगटेको मलेसिया चालु आवको छ महिनासम्म चौथो स्थानमा
काठमाडौं– वैदेशिक रोजगारीमा जाने नेपालीको संख्या यो वर्ष घटेको छ । चालु आर्थिक वर्षको छ महिनाको अवधिमा वैदेशिक रोजगार विभागबाट श्रम स्वीकृति लिएर जानेको संख्या अघिल्लो वर्षको सोही अवधिको तुलनामा झण्डै ७१ हजारले घटेको पाइएको हो ।
वैदेशिक रोजगार विभागका सूचना अधिकारी तथा निर्देशक कविराज उप्रेतीका अनुसार विभागबाट चालु आर्थिक वर्ष २०८०/८१ को पहिलो छ महिना (साउनदेखि पुस मसान्तसम्म)मा श्रम स्वीकृति लिएर वैदेशिक रोजगारीमा जाने नेपालीको संख्या तीन लाख ४३ हजार पुगेको छ । जबकि अघिल्लो आर्थिक वर्ष २०७९/८० को सोही अवधिमा चार लाख १४ हजारले श्रम स्वीकृति लिएर वैदेशिक रोजगारीमा गएको तथ्यांक छ । जसअनुसार चालु आवमा श्रम स्वीकृति लिनेको संख्या अघिल्लो वर्षको भन्दा ७१ हजार न्यून हो ।
विभागका सूचना अधिकारी उपे्रतीका अनुसार पुस महिनामा ६५ हजार ८१३ नेपालीले वैदेशिक रोजगारीमा जान विभागबाट श्रम स्वीकृति लिएका छन् । यो संख्या नयाँ श्रम स्वीकृति लिने र नवीकरण गर्ने दुवैको हो । चालु आर्थिक वर्षको पहिलो छ महिनामा वैदेशिक रोजगारीमा जानेको संख्या घटेको देखिए पनि साउन र भदौभन्दा मंसिर र पुसमा संख्या बढेको वैदेशिक रोजगार विभागको तथ्यांकमा उल्लेख छ ।
चालु आवमा मलेसिया रोजगारीमा समस्या देखिएका कारण श्रम स्वीकृति लिनेको संख्या घट्न पुगेको सरोकारवालाको भनाइ छ । वैदेशिक रोजगार व्यवसायीहरुका अनुसार मलेसियामा कामदार पठाउने क्रम घटेसँगै समग्र संख्यामा प्रभाव परेको हो । उनीहरुको भनाइलाई पुष्टि गर्ने तथ्यांकसमेत रहेको छ । वैदेशिक रोजगार विभागले मासिक रुपमा सार्वजनिक गर्ने तथ्यांकलाई हेर्दा चालु आर्थिक वर्षको सुरुआतदेखि नै मलेसिया जाने कामदारको संख्या घट्दै आएको छ । यो क्रम पछिल्लो महिना पुसमा पनि यथावत् रहेको छ । गत आर्थिक वर्षभरि पहिलो स्थान ओगटेको मलेसिया छ महिनासम्म पनि चौथो स्थानमै रहेको छ । मलेसिया जान आठ हजार ९१ जनाले मंसिरमा श्रम स्वीकृति लिएका छन् ।
पुसमा श्रम स्वीकृति लिएर वैदेशिक रोजगारीमा जानेमा सबैभन्दा धेरै संयुक्त अरब इमिरेट्स (युएई) जाने रहेका विभागले जनाएको छ । चालु आवको सुरुआती महिनादेखि नै युएई नेपाली श्रमिकहरुको पहिलो गन्तव्य बन्न सफल भएको छ । विभागको तथ्यांकअनुसार युएईका लागि १६ हजार ३८५ जनाले श्रम स्वीकृति लिएका छन् । गत मंसिर महिनामा युएई जाने नेपालीको संख्या १८ हजार ४९३ रहेको थियो । यस्तै पुसमा रोजगारीका लागि साउदी अरेबिया जान १४ हजार ३०७ जनाले श्रम स्वीकृति लिएका छन् । दोस्रो स्थानमा परेको साउदी जाने नेपालीको संख्या मंसिरको भन्दा ७१९ जना बढी रहेको छ ।
त्यसैगरी तेस्रो स्थानमा रहेको कतारमा १३ हजार १४ जना श्रम स्वीकृति लिएर पुगेका छन् । यसअघि मंसिर महिनामा कतार जाने नेपालीको संख्या १४ हजार १५२ रहेको थियो । चालु आव सुरु भएयता कतार र साउदी जाने नेपालीको संख्या बराबरी जस्तो देखिए पनि युएई जाने संख्यामा उल्लेख्य वृद्धि भएको विभागको तथ्यांक छ ।
यसैगरी यस्तै पाँचांै स्थानमा परेको कुवेतमा तीन हजार ५१८ जना नेपाली श्रमिक रोजगारीका लागि पुगेका छन् । कुवेत जाने श्रमिकहरुको संख्या पनि क्रमशः बढेको छ । उल्लिखित पाँच मुलुकले नै नेपालको वैदेशिक रोजगारीको ठूलो हिस्सा (झण्डै ८० प्रतिशतभन्दा बढी) ओगटेको विभागको तथ्यांकबाट देखिएको छ ।
यसैगरी जापान एक हजार १९९, रोमानिया एक हजार ५८, बहराइन ९९४, ओमान ६८३, माल्दिभ्स ६२१, क्रोएसिया ५५८, मोरिसस जान ४८१ र साइप्रसका लागि ३५७ जनाले श्रम स्वीकृति लिएका छन् । त्यस्तै मंसिर महिनामा इपिएस प्रणालीमार्फत दक्षिण कोरिया जाने नेपालीको संख्या एक हजार ४२५ रहेको छ ।
-1752335779.jpg)
