रौतहट- रौतहटको फतुवा बिजयपुर नगरपालिकाले अपाङ्गता भएका व्यक्तिलाई घरमै पुगेर नागरिकता वितरण गरेका छन् । नगरपालिकाले वडा नं. ९ निवासी पूर्ण अपांगता भएका रोहित अधिकारीलाई घरमै पुगेर नागरिकता वितरण गरिएको हो ।
अपाङ्गता भएका व्यक्तिहरूको सहज पहुँच र सम्मान जनक सेवा प्रवाह सुनिश्चित गर्ने उद्देश्यले नगरपालिकाले पूर्ण अपाङ्गता भएकालाई घरमै पुगेर नागरिकता वितरण गरिएको छ । यो उल्लेखनीय कार्य ईलाका प्रशासन कार्यालय चन्द्रपुरका प्रमुख र कर्मचारीहरूको सक्रिय पहलमा सम्पन्न भएका हुन् । सम्बन्धित कानुनी प्रक्रिया पुरा गरेपछि, अधिकारीलाई घरमै गएर नागरिकता प्रदान गरिएको हो ।
वडाध्यक्ष राकेश यादव (पप्पु) ले जानकारी गराए अनुसार, ‘अपांगता भएका नागरिकहरू सरकारी सेवा लिनमा पछि नपुन्, भन्ने सोचले यो पहल गरिएको हो। यो केवल सेवा होइन, सम्मानको अभिव्यक्ति पनि हो ।’ स्थानीय जनप्रतिनिधि, प्रशासनिक अधिकारीहरू तथा अन्य सरोकारवालाहरूको समन्वय र सहकार्यले यो कार्य सफल भएको जनाइएको छ । सबै सहयोगी पक्षलाई धन्यवाद दिँदै, वडाध्यक्ष यादवले भविष्यमा पनि यस्तो समावेशी अभ्यासलाई निरन्तरता दिने प्रतिबद्धता व्यक्त गरे ।
यो प्रयासले सामाजिक उत्तरदायित्व र समावेशी शासन प्रणालीको सशक्त सन्देश दिएको छ । साथै, अपाङ्गता भएका नागरिकहरूलाई राज्यका सेवा तथा सुविधामा पहुँच सुनिश्चित गराउने दिशामा एक सकारात्मक र अनुकरणीय उदाहरण समेत प्रस्तुत गरेको छ ।
