काठमाडौं– इजरायलको गाजा पट्टीमा प्यालेस्टाइनी लडाकु समूह हमासले गरेको आक्रमणपछि असुरक्षित अवस्था सिर्जना भए पनि रोजगारीका लागि इजरायलमा रहेका थुप्रै नेपालीले स्वदेश फर्किने चासो देखाएका छैनन् । हमासको आक्रमणबाट १० जना नेपालीले ज्यान गुमाउँदा सुरुआती चरणमा असुरक्षित महसुस गर्दै स्वदेश फर्किन हतारिएकाहरु यतिखेर चासो देखाउन छाडेका हुन् ।
इजरायलको तेल अभिभस्थित नेपाली राजदूतावासका अनुसार आक्रमणको सुरुआती समयमा असुरक्षाका कारण आत्तिएर स्वदेश फर्कन अनलाइनमार्फत नाम दर्ता गराएका नेपालीहरू विस्तारै सम्पर्कमा आउन छाडेका छन् । रोजगारीको क्रममा इजरायलमा रहेका नेपालीहरुलाई असुरक्षित महसुस भए स्वदेश फिर्ताको लागि दूतावासले अनलाइनमार्फत आफ्नो नाम दर्ता गराउन सूचना जारी गरेको थियो ।
नेपाल फर्कन अनलाइनमा नाम दर्ता गराएका नेपालीहरुको उद्धारका लागि पहल गरे पनि उनीहरु पुनः सम्पर्कमा नआएको दूतावासका प्रथम सचिव अर्जुन घिमिरेले बताए । जसका कारण मंगलबार भारतले आफ्नो उद्धार विमानमा नेपालीका लागि २० वटा सिट उपलब्ध गराए पनि १८ जनामात्रै फर्किएका उनले बताए ।
‘यत्रो विपत्को समयमा निरन्तर दिइएको सूचनाका बाबजुद पनि जम्मा १८ जना नेपालीमात्रै फर्किएका छन्,’ घिमिरेले भने, ‘हामीलाई छिमेकी मुलुक भारतको उद्धार विमानमा दिइएको २० सिट पनि भर्न सकेनौं ।’ यसबाट स्वदेश फर्किन चाहेका नेपालीहरुमा मनस्थिति परिवर्तन हुँदै गएको देखिएको उनको भनाइ छ ।
दूतावासले आक्रमण सुरु भएको तेस्रो दिनदेखि नेपाल फर्किन चाहनेको विवरण माग गर्दै अनलाइनमार्फत आफ्नो नाम दर्ता गर्न आग्रह गरेको थियो । यसरी नाम दर्ता गराएकामध्ये पहिलो चरणमा २५४ जना नेपाली स्वदेश फर्किसकेका छन् । मंगलबार थप १८ जनालाई भारतीय विमानको सहयोगमा दिल्ली हुँदै नेपाल ल्याइएको छ ।
रोजगारीको शिलशिलामा इजरायलका विभिन्न स्थानमा रहेका अधिकांश नेपालीहरुले अनलाइनमा नाम दर्ता गराएको दूतावासले जनाएको छ । नाम लेखाएका अधिकांश नेपालीहरु तत्काल स्वदेश नफर्किने मनस्थितिमा पुगिसकेको बताइएको छ । यद्यपि, स्वदेश फर्कन चाहनेहरुलाई राजदूतावासबाट सुरु गरिएको अनलाइन रजिस्ट्रेसन फाराम अनिवार्यरुपमा भर्न आग्रह गरिएको छ ।
इजरायलमा विषम् परिस्थिति सिर्जना भएपछि आफ्नो नागरिकको खोजी गर्ने क्रममा चार हजार ५०० नेपाली केयर गिभरको रुपमा कार्यरत रहेको परराष्ट्र मन्त्रालयले जनाएको छ । पछिल्लो समय झण्डै एक हजार २०० नेपाली जिटुजी सम्झौता गरेयता सरकारी तवरबाट रोजगारीका लागि इजरायल पुगेको वैदेशिक रोजगार विभागको तथ्यांकले देखाएको छ ।
-1752335779.jpg)
