काठमाडौं- शुभप्रवा सेभिङ एण्ड क्रेडिट को-अपरेटिभ लिमिटेडको १४औं वार्षिक साधारणसभा सम्पन्न भएकाे छ । पूर्वअर्थमन्त्री डा. युवराज खतिवडाको प्रमुख आतिथ्यता शनिबार आयोजित साधारणसभा संस्थाका अध्यक्ष विदुर बस्नेतको सभापतित्वमा सम्पन्न भएकाे हाे ।
साधारणसभामा सञ्चालक समितिको तर्फबाट प्रमुख कार्यकारी निर्देशक फडिन्द्रकुमार खड्काले वार्षिक प्रगति प्रतिवेदन तथा लेखा सुपरीवेक्षण समितिको तर्फबाट संयोजक सुन्दर खड्काले आर्थिक प्रतिवेदन प्रस्तुत गरेका थिए ।
प्रतिवेदन प्रस्तुत गर्दै प्रमुख कार्यकारी निर्देशक खड्काले सदस्यहरुको साथ, सहयोग र विश्वासले संस्थाको वित्तीय सूचकांकहरु थप मजबुद बन्दै गएको बताए । संस्थाको वित्तीय कारोबारलाई गुणात्मक विकास गरी आन्तरिक व्यवस्थापनलाई मजबुद बनाउँदै लगिएको उनले बताए । खड्काका अनुसार आर्थिक वर्ष २०७९/८०मा संस्थाको सेयर पुँजी आठ करोड ९३ लाख ५४ हजार रुपैयाँ कायम भएको छ । अघिल्लो आर्थिक वर्ष संस्थाको सेयर पुँजी आठ करोड ८७ लाख रुपैयाँ थियो ।
त्यस्तै आर्थिक वर्ष २०७९/८० मा संस्थाले ४८ करोड ८९ लाख ९६ हजार रुपैयाँ निक्षेप संकलन तथा ५४ करोड ६६ लाख रुपैयाँ कर्जा लगानी गरेकाे उनले जानकारी दिए । उक्त आवमा संस्थाको कूल आम्दानी ११ करोड ३१ लाख र खर्च १० करोड २९ लाख रुपैयाँ भएको प्रतिवेदनमा उल्लेख छ ।
संस्थाले यस आवमा एक करोड ६६ लाख रुपैयाँ सञ्चालन मुनाफा आर्जन गरेको छ । उक्त मुनाफा अघिल्लो वर्षको तुलनामा ५४.७४ प्रतिशतले बढी हो । संस्थाको कूल सम्पत्ति तथा दायित्व ७४ करोड २५ लाख ९४ हजार रुपैयाँ रहेको छ। संस्थाको दुवै प्रतिवेदन साधारणसभाबाट पारित गरिएको छ ।
चावहिलमा प्रधान कार्यालय रहेकाे यस संस्थाको न्युरोडमा सदस्य सेवा केन्द्र रहेको छ ।
