काठमाडौं– वैदेशिक रोजगार विभागले वैदेशिक रोजगार ऐनविपरीत कार्य गर्ने दुईवटा म्यानपावर कम्पनीलाई कारबाही गरेको छ । विभागले सामाजिक सञ्जालमा भ्रमपूर्ण विज्ञापन गरेको भन्दै ओमेगा इन्टरनेसनल प्रालि र अक्सन इन्टरनेसनल (अवतार ह्युमन रिसोर्स) प्रालि लाई निलम्बन गरेको हो ।
यी दुवै कम्पनी विभागको स्वीकृतिविना सामाजिक सञ्जालमार्फत दक्ष नेपाली जनशक्तिलाई वैदेशिक रोजगारीमा पठाइदिने भन्दै सन्देहपूर्ण कारोबारमा संलग्न देखिएको जनाइएको छ । विभागले मंगलबार एक विज्ञप्ति जारी गरी वैदेशिक रोजगार ऐन २०६४ को दफा ६१ (७) बमोजिम निर्णय गरी सीपयुक्त दक्ष जनशक्तिलाई व्यक्तिगतरुपमा गन्तव्य मलुकमा पठाउने भन्दै शंकास्पद कार्य गर्ने ओमेगा इन्टरनेसनल र अक्सन इन्टरनेसनलाई निलम्बन गरेको जनाएको छ ।
उल्लिखित म्यानपावर कम्पनीहरुले विज्ञापन प्रकाशनपूर्व विभागबाट स्वीकृति नलिएका कारण निलम्बन गरी कारबाहीको दायरामा ल्याइएको विभागका निर्देशक एवं सूचना अधिकारी कविराज उप्रेतीले बताए । निलम्बनमा परेका म्यानपावर कम्पनीहरुले समाजिक सञ्जालमा भ्रमपूर्ण विज्ञापन प्रसारण गर्नेमात्र नभई शैक्षिक परामर्श दिने संस्थासमेत खोलेर ‘वर्किङ भिसा’को प्रलोभन देखाई सन्देहपूर्ण कारोबार गरिरहेको पाइएको उनले जानकारी दिए ।
ओमेगा इन्टरनेसनलले पूर्वस्वीकृतिविना सामाजिक सञ्जाल (फेसबुक)मार्फत नेपाली डाक्टरहरुलाई वैदेशिक रोजगारीका लागि कुवेत पठाइदिने भन्दै भ्रमपूर्ण विज्ञापन गरेको विभागले जनाएको छ । उक्त कम्पनीले केही दिनअघि सामाजिक सञ्जालमार्फत विज्ञापन गरी कुवेतमा सीपयुक्त जनशक्ति (डाक्टर)को माग रहेको भन्दै ८७५ जनाका लागि आवेदन माग गरेको थियो । आकर्षक सेवा सुविधासहित डाक्टरलाई मासिक आठ लाख देखि १२ लाख ७० हजार रुपैयाँसम्म तलब हुने विज्ञापनमा उल्लेख गरिएको छ । अनलाइनको माध्यमबाट अन्तर्वार्ता लिएर डाक्टर छनोट गर्ने बताइए पनि मागपत्रसमेत प्रमाणीकरण नभएको बुझिएको छ ।
ठूलो संख्यामा दक्ष जनशक्ति विदेश पठाउने तयारी गरिरहेको म्यानपावर कम्पनीहरुले मागपत्र प्रमाणीकरण र विभागबाट पूर्वस्वीकृति नलिई विज्ञापन गरेको पाइएपछि विभाग कारबाहीमा उत्रिएको हो । पछिल्लो समय वैदेशिक रोजगार ऐन २०६४ बमोजिम मापदण्ड विपरीत गतिविधि गर्ने म्यानपावर कम्पनीविरुद्ध विभागले कडा कदम चालेको छ ।
विभागले यसअघि सामाजिक सञ्जालमा विज्ञापन प्रकाशनपूर्व विभागबाट स्वीकृति नलिएको भन्दै इजाजतपत्र प्राप्त म्यानपावर कम्पनी क्यापिटल रिक्र्युटमेन्ट सर्भिसेज र इगल म्यानपावर कन्सल्ट्यान्टलाई जनही दुई लाख रुपैयाँ जरिवाना गरेको छ । यस्तै ऐनविपरीत गतिविधि गरेको र वैदेशिक रोजगारीमा पीडित भएकाहरुलाई क्षतिपूर्ति नदिएको कारण विभागले डि स्क्वायर ग्रुप र डिलक्स एचआर सोलुसन नामक दुईवटा म्यानपावर कम्पनीको इजाजतपत्र नै रद्द गरिदिएको थियो ।
विभागले वैदेशिक रोजगारीको नाममा सामाजिक सञ्जाल (फेसबुक, इन्स्टाग्राम, टिकटक)मा सूचना तथा विज्ञापन प्रकाशन गरी ठगी गर्ने घटना बढ्दै गएको भन्दै सचेत रहन सरोकावालाहरुमा आग्रह गर्दै आएको छ । त्यस्तै विभागको अनुमतिविना कुनै पनि माध्यमबाट वैदेशिक रोजगारसम्बन्धी विज्ञापन वा सूचना प्रकाशन गर्न नपाइने उल्लेख गरेको छ ।
पछिल्लो समय युरोपेली मुलुकमा आकर्षक तलब एवं सेवासुविधा प्राप्त हुने प्रलोभन देखाई सामाजिक सञ्जालमा हुने विज्ञापनको सूक्ष्म निगरानी गरिरहेको पनि विभागले उल्लेख गरेको छ । सामाजिक सञ्जालमा गैरकानुनी रुपमा वैदेशिक रोजगारीका विज्ञापनहरु आउन थालेपछि विभागले निगरानी गर्न सुरु गरेको सूचना अधिकारी उप्रेतीले बताए । उनका अनुसार भर्खरैमात्र सामाजिक सञ्जालमार्फत हुने अवैध सूचना तथा ठगी नियन्त्रणका लागि श्रम, रोजगार तथा सामाजिक सुरक्षा मन्त्रालयले एकजना उपसचिवको संयोजकत्वमा एउटा छुट्टै अध्ययन समिति पनि बनाएको छ ।
वैदेशिक रोजगारीका लागि जान इच्छुक नेपालीहरुलाई सामाजिक सञ्जालमा प्रकाशन/प्रसारण हुने भ्रमपूर्ण विज्ञापनमा विश्वास नगर्न पनि विभागले आग्रह गरेको छ । साथै प्रचलित ऐन कानुनविपरीत सामाजिक सञ्जालमा सूचना तथा विज्ञापन सम्प्रेषण नगर्न सचेत गराएको छ । त्यस्तो भ्रमपूर्ण सन्देश प्रवाह गरेमा कडा कारबाही गर्ने चेतावनीसमेत विभागले दिएको छ ।
