- हङकङबाट तस्करी गरेर ल्याएको ६० किलो ७१६ ग्राम सुन तस्करीबारे सिआइबीको अनुसन्धान जारी
- सुन प्रकरणका विषयमा कुनै तथ्य प्रमाण, सूचना भए ब्युरोमा पठाएर सहयोग गर्न अनुरोध
- हङकङ, नेपाल र भारतबीच ‘त्रिदेशीय संगठित समूह’ भेटिएपछि यसबारे अनुसन्धानमा सहयोगका लागि इन्टरपोललाई पत्राचार
काठमाडौं– साउन ३ गते राजस्व अनुसन्धान विभागले बरामद गरेको सुनमा प्रहरीले थप सूचना सर्वसाधारणबाट अपेक्षा गरेको छ । नेपाल प्रहरीको केन्द्रीय अनुसन्धान ब्युरो (सिआइबी)ले सुन प्रकरणका विषयमा कुनै तथ्य प्रमाण, सूचना भए ब्युरोमा पठाएर सहयोग गर्न अनुरोध गरेको हो । ब्युरोका सूचना अधिकारी, प्रहरी उपरीक्षक नवराज अधिकारीले त्यस्ता सूचना, तथ्य वा प्रमाण यस कार्यालयमा प्रत्यक्षरुपमा आई उपलब्ध गराउन वा इमेलमार्फत पनि पठाउन सकिने बताए । सूचनाले अपराध अनुसन्धानमा सहयोग गर्ने पनि उनले बताए ।
यसरी प्राप्त भएको जानकारी वा सूचनाको स्रोत गोप्य रहने पनि उनले बताए । उनका अनुसार सुनका विषयमा कसैसँग केही सूचना, तथ्य वा प्रमाण भएमा ब्युरोको इमेल वा फोन नम्बरमा जानकारी दिन सकिने जनाएको छ ।
हङकङबाट तस्करी गरेर ल्याएको ६० किलो ७१६ ग्राम सुन तस्करीबारे ‘सिआइबी’ले अनुसन्धान गरिरहेको छ । राजस्व अनुसन्धान विभागले त्रिभुवन अन्तर्राष्ट्रिय विमानस्थलबाट बरामद गरेको सुनको अनुसन्धान गर्ने जिम्मेवारी साउन २१ मा सिआइबीलाई दिएको थियो । असार ३० मा हङकङकबाट काठमाडौं ल्याइएको सो सुन ‘रेडी ट्रेड प्रालि’ ले मगाएको हो । गिरोहले सुन भारत पठाउन खोजेको ब्युरोको निष्कर्ष छ ।
विभिन्न गिरोहले अवैधरुपमा भन्सार छली ल्याएको सुन प्रकरणका सम्बन्धमा केही दिन यता विभिन्न सञ्चारमाध्यममा प्रकाशित तथा प्रसारित भएका समाचारका सम्बन्धमा ब्युरोको ध्यानाकर्षण भएको पनि जनाइएको छ ।
एक महिनाअघि भन्सार छली ल्याइएको सुनको सूक्ष्मरुपमा अनुसन्धान गरिरहेको जनाइएको छ । यसभन्दा अगाडिका विभिन्न मितिमा भएका सुन तस्करी प्रकरणका सम्बन्धमासमेत ब्युरोबाट सूक्ष्मरुपमा अनुसन्धान भइरहेको ब्युरोले शुक्रबार एक सूचना जारी गरी जनाएको छ । ‘आमनागरिकको साथ, सहयोग र सहकार्यबाट अपराध अनुसन्धान सत्य र तथ्यमा पुग्ने हुँदा सो कार्यमा सकारात्मक सहयोगको अपेक्षा गर्दछौं,’ विज्ञप्तिमा भनिएको छ ।
ब्युरोले आफ्नो अनुसन्धान सकेर सरकारी वकिलको कार्यालयमा रायसहितको प्रतिवेदन बुझाएको छ । उक्त प्रकरणको मुद्दा अदालतमा लैजाने तयारी भइरहेको छ । उक्त प्रकरणमा १८ जना हिरासतमा छन् ।
गुह¥यो इन्टरपोल
सिआइबीले यस प्रकरणको जालोबारे थप अध्ययन गर्न अन्तर्राष्ट्रिय प्रहरी संगठन ‘इन्टरपोल’को सहयोग मागेको छ । हङकङ, नेपाल र भारतबीच ‘त्रिदेशीय संगठित समूह’ भेटिएपछि यसबारे अनुसन्धानमा सहयोगका लागि इन्टरपोललाई पत्राचार गरिएको ब्युरोका एक प्रहरी अधिकृतले बताए ।
इन्टरपोललाई आगअनुसन्धान अधिकृतहरूका अनुसार प्रहरी प्रधान कार्यालयले इन्टरपोल हङकङ र इन्टरपोल भारतलाई पत्राचार गरेको छ । सुन तस्करीमा संलग्न आरोपमा केन्द्रीय अनुसन्धान ब्युरो ‘सिआइबी’को हिरासतमा अहिले सात जना चिनियाँ नागरिक छन् । उनीहरुसँग नेपाली नागरिकतासमेत भेटिएको प्रहरीले जनाएको छ ।
