काठमाडौं– पछिल्ला केही वर्षहरुमा सीपयुक्त दक्ष कामदार रोजगारीका लागि विदेश जाने क्रम बढेको छ । वैदेशिक रोजगारीका लागि जान चाहने युवाले सीप सिकेर विदेशिन थालेपछि दक्ष कामदारको संख्या बढेको वैदेशिक रोजगार विभागको तथ्यांकले देखाएको छ ।
विगत पाँच वर्षमा वैदेशिक रोजगारीका लागि जाने सीपयुक्त दक्ष कामदारको संख्या वृद्धि हुँदै गइरहेको विभागको तथ्यांक छ । आर्थिक वर्ष २०७५/७६ मा पाँच लाख आठ हजार ८२८ जना श्रम स्वीकृति लिनेमध्ये एक लाख ९६ हजार ६०१ जनाले सीप सिकेर दक्ष कामदारको रुपमा विदेश गएका थिए । जसमा नौ हजार १४८ जना महिला रहेका थिए । सँगगसँगै उच्च दक्ष २१०, प्रोफेसनल ७८७, अर्धदक्ष ४२ हजार ७८४ र अदक्ष कामदार दुई लाख ८५ हजार ४४५ जना रहेका थिए ।
त्यस्तै आर्थिक वर्ष २०७६/७७ मा तीन लाख ६८ हजार ४३३ जनाले श्रम स्वीकृति लिएको भए पनि विभागले के कति दक्ष कामदार वैदेशिक रोजगारीमा गए त्यसको तथ्यांक सार्वजनिक गरेको छैन । साथै, उच्च दक्ष, प्रोफेसनल, अर्धदक्ष, अदक्ष कामदारको पनि तथ्यांक उल्लेख गरिएको छैन ।
त्यसयता आर्थिक वर्ष २०७७/७८ मा कोरोना महामारीका कारण विदेश जानेको संख्या एक लाख ६६ हजार ६९८ मा सीमित बनेको देखिन्छ । जसका कारण ७० हजार ४२६ जना दक्ष कामदार रोजगारीका लागि विदेशिएको विभागले उल्लेख गरेको छ । यद्यपि, संख्यात्मक हिसाबको तुलनामा उक्त आवमा विदेश जाने नेपाली दक्ष कामदारको संख्यामा बढोत्तरी नै हुने देखिन्छ । उक्त आवमा उच्च दक्ष ६१, प्रोफेसनल २४६, अर्धदक्ष २५ हजार ५८३ र अदक्ष कामदार ८० हजार ३८२ जना गएको देखिन्छ ।
त्यस्तै आर्थिक वर्ष २०७८/७९ मा छ लाख ३० हजार ९० नेपालीले श्रम स्वीकृति लिएकामा दुई लाख ९१ हजार ८८९ जना दक्ष कामदार रहेका छन् । जसमा २३ हजार ४३३ जना महिला थिए । उक्त आवमा उच्च दक्ष १२५, प्रोफेसनल ६८०, अर्धदक्ष ५४ हजार ३२८ र अदक्ष कामदार दुई लाख ८३ हजार ६८ जनाले वैदेशिक रोजगारीका लागि श्रम स्वीकृति लिएका तथ्यांक छ ।
त्यस्तै वैदेशिक रोजगारीको इतिहासमा नै अहिलेसम्म सबैभन्दा बढी नेपाली विदेशिएको आर्थिक वर्ष २०७९/८० मा पाँच लाख छ हजार ७४६ जना दक्ष कामदार रहेको विभागले जनाएको छ । जसमा ४३ हजार ५४२ महिला रहेका छन् । यस वर्ष वैदेशिक रोजगारीका लागि जान पौने आठ लाख नेपालीले श्रम स्वीकृति लिएका छन् । श्रम स्वीकृति लिनेमध्ये उच्च दक्ष २५७, प्रोफेसनल एक हजार १५३ अर्धदक्ष ६० हजार ५५५ र अदक्ष कामदारको संख्या दुई लाख २ हजार ६१६ रहेको छ ।
विभागको पाँच वर्षको तथ्यांकलाई हेर्दा वैदेशिक रोजगारीमा सीप सिकेर जाने नेपालीहरुको संख्या वर्षैपिच्छे बढ्दै गइरहेको देखिएको छ । विदेश जाने दक्ष कामदारहरुको संख्या उल्लेख्य मात्रामा वृद्धि हुँदै गएका कारण अदक्ष कामदारहरुको संख्या घट्दै गएको विभागको तथ्यांकले देखाएको छ ।
-1752335779.jpg)
