काठमाडौं – परराष्ट्र मन्त्रालयले युद्धग्रस्त मुलुकहरूमा सुरक्षासम्बन्धी काममा नेपाली नागरिकलाई भर्ना हुन अनुमति दिने नेपाल सरकारको नीति नभएको जनाएको छ । केही मित्रराष्ट्रहरूको राष्ट्रिय सेनामा नेपाली नागरिक भर्ना हुने परम्परागत रूपमा सम्झौता भएकोबाहेक अन्यमा सेना भर्नासम्बन्धी कुनै नीति नभएको मन्त्रालयले प्रस्ट पारेको छ ।
मन्त्रालयले मंगलबार विज्ञप्ति जारी गर्दै सामाजिक सञ्जाल र सार्वजनिक सञ्चार माध्यममा नेपाली नागरिकहरु विदेशी सेनामा भर्ना भएका भन्ने समाचारको सम्बन्धमा ध्यानाकर्षण भएको उल्लेख गरेको छ । ‘कसैको झुक्यानमा परी वा गलत सूचनाका आधारमा युद्धग्रस्त मुलुकहरूमा सुरक्षासम्बन्धी काममा नजानुहुन सबैमा अनुरोध गरिन्छ,’ विज्ञप्तिमा भनिएको छ ।
उल्लिखित कार्यमा संलग्न हुँदा आइपर्ने जोखिम र उद्दारमा हुने कठिनाइप्रति सजग रहनसमेत मन्त्रालयले आग्रह गरेको छ । रुस–युक्रेन युद्ध जारी रहेकै अवस्थामा पछिल्लो समय विभिन्न माध्यमबाट नेपालीहरु रुसमा पुग्ने र त्यहाँको सेनामा भर्ती भएका समाचारहरु बाहिरिएपछि मन्त्रालयले विज्ञप्ति जारी गरेको हो ।
मन्त्रालयले गत शुक्रबार पनि नेपाली नागरिकहरुलाई वैदेशिक रोजगारीका लागि पर्यटक वा भिजिट भिसामा थाइल्याण्ड र म्यानमारमा नजान आग्रह गरेको थियो । आकर्षक रोजगारीका लागि गएका नेपाली बन्धक बनेको भन्दै श्रम स्वीकृतिविना उल्लिखित मुलुकमा नजान सचेत गराएको छ ।
मन्त्रालयले ट्राभल एडभाइजरी जारी गर्दै रोजगारीका लागि विदेश जानुअघि सरकारका सम्बन्धित कार्यालय र विदेशस्थित नियोगमा सम्पर्क गरेर रोजगारदाता कम्पनीबारे बुझ्न पनि आग्रह गरेको छ ।
-1752335779.jpg)
