काठमाडौं– वैदेशिक रोजगार विभागअन्तर्गतको इपिएस कोरिया शाखाले गलत सूचनाप्रति सजग रहन र भ्रममा नपर्न सरोकारवालालाई आग्रह गरेको छ । केही व्यक्ति वा समूहले इपिएस कोरिया शाखाको लेटरप्याडमा तत्काल नेपालबाट कुनै पनि कामदार कोरिया नभित्र्याउनेसम्बन्धी अत्यन्त जरुरी सूचना भनी गलत (फेक) सूचना निकाली अतिरञ्जित र भ्रम छर्ने कार्य गरेको पाइएकाले त्यस्तो भ्रममा नपर्न शाखाले आग्रह गरेको हो ।
शाखाले मंगलबार एक सूचना जारी गर्दै इपिएसको लोगो एवं लेटरप्याडसमेत सामाजिक सञ्जालमा राखी भ्रामक र नक्कली सूचना प्रेषित गरी कानुनविपरीतका गतिविधि गरिरहेको हुँदा विश्वास नगर्न सम्बन्धित सबैलाई सचेत गराएको छ । सामाजिक सञ्जालमा विभिन्न पेज बनाई भ्रामक विषय लेखी समाचार बनाएर जथाभावी पोस्ट गर्ने र सत्य तथ्य नबुझी अरुलेसमेत सेयर गरेको पाइएकाले त्यसो गर्नु कानुनविपरीतको कार्य भएको शाखाले उल्लेख गरेको छ ।
यस्तै सरकारी लेटरप्याड कीर्ते गर्ने र गलत सूचना प्रावहलगायतका गैरकानुनी कार्यमा संलग्नहरुलाई विद्युतीय (इलेक्ट्रोनिक) कारोबार ऐन, २०६३ तथा नियमावली २०६४ बमोजिम साइबर अपराधमा हदैसम्मको कैद र जरिवानासहित सजायका लागि प्रहरीको साइबर ब्युरोमा लेखी पठाइसकिएको शाखाले जनाएको छ । साथै, कुनै पनि आधिकारिक जानकारीका लागि सम्बन्धित व्यक्तिले इपिएस कोरिया शाखाको वेबसाइट वा राष्ट्रियस्तरको दैनिक पत्रिकामा प्रकाशित गर्ने सूचना हेर्न अनुरोध गरिएको छ ।
शाखाले नेपाल सरकार र दक्षिण कोरिया सरकारबीच भएको सम्झौताबमोजिम इपिएसमार्फत २००८ देखि हालसम्म करिब ९० हजारभन्दा बढी नेपाली कामदार कोरिया गइसकेको जनाएको छ । गत आर्थिक वर्ष २०७९÷८० मा २२ हजार १९२ नेपाली कोरिया जान सफल भएको भन्दै शाखाले इपिएसमार्फत कोरिया प्रवेश गर्ने १६ मुलुकमध्ये नेपाल सर्वोत्कृष्ट रहेको उल्लेख गरेको छ ।
