काठमाडौं– नेपाली कांग्रेसमा सबैभन्दा शक्तिशाली नायबी शासन चलाउने पात्रका रुपमा परिचित पात्र हुन् डा. आरजु राणा देउवा । कांग्रेस सभापति शेरबहादुर देउवापत्नी भएकै कारण ‘भाउजु’ उपनामले पार्टीभित्र परिचित छिन् उनी । पार्टी सभापतिपत्नी भएपछि शक्ति नहुने कुरै भएन । मन्त्री कसलाई बनााउनेदेखि शक्तिशाली निकायका प्रमुखको नियुक्तिमा आरजु हाबी हुने नै भयो ।
अझ देउवाकै आडमा १४औं महाधिवेशनमा केन्द्रीय सदस्यमा निर्वाचित भएकी उनी समानुपातिक सूचीमा बसेर सांसद पनि भइसकेकी छन् । अघिल्लो निर्वाचनमा कैलाली–५ मा एमालेका नारदमुनि रानासँग हारेपछि केन्द्र फर्केर चुपचाप बसेकी आरजुको नायबी शासनविरुद्ध बेलाबेला असन्तुष्टहरुले आवाज उठाउने गर्छन् । डा. स्वर्णिम वाग्लेले आरजुको हेपाइ सहन नसकेर पार्टी छाडेको बताएका थिए । पार्टी छाड्दै गर्दा स्वर्णिमले डा. शेखर कोइराला, महामन्त्री गगन थापालगायतलाई मेसेज गर्दै भनेका थिए– देउवा–आरजु गिरोहको निरन्तर हेपाइ र अपमानले यो स्थिति ल्याएको हो । स्वर्णिम तनहुँ–१ बाट निर्वाचित भइसकेका छन् । कांग्रेसमा भाउजुको हेपाइ सहन नसक्नेहरुको लाइन लामै छ । डडेल्धुरा कांग्रेसका पूर्व सभापति कर्ण मल्लदेखि डा मिनेन्द्र रिजालसम्म पार्टीमा पीडित बनेका छन् उनका कारण ।
यता कांग्रेसले कारवाही गरेपछि स्वतन्त्रबाट निर्वाचित बनेका सांसद डा. अमरेशकुमार सिंहले आरजुको नायबीमाथि प्रश्न उठाएका छन् । शुक्रबारको संसद् बैठकमा अमरेशले आरजुलाई ‘पम्फादेवी’ नाम करार गरिदिए । २०६३ सालयता आरजुको भ्रष्टाचारमा रजाइँ चल्न थालेको आरोप अमरेशको थियो ।‘०६३ यता जो पम्फादेवी जन्मिएको छ । त्यो फम्फादेवीको कारबाहीका लागि अस्ति पनि गृहमन्त्रीलाई भनेको छु, कि पम्फादेवीको सम्पत्ति छानविन होस् ।
पम्फादेवीको कारोबार छानविन होस्,’ सिंहले प्रश्न गरे ‘र, यो धितोपत्र बोर्डको अर्को लाइसेन्स प्राइभेटलाई दिन खोजिरहेको छ, के दूरसञ्चार प्राधिकरण प्राइभेटलाई दिन मिल्छ ? सर्वोच्च अदालत प्राइभेटलाई दिन मिल्छ ? नेपाल सरकार प्रइभेटलाई दिन मिल्छ ? त्यसो भए प्रधानमन्त्रीसँग अनुरोध छ, उहाँको जिम्मेबारी नै प्राइभेटलाई दिउँ ।’ धितोपत्र बोर्डमा नयाँ अध्यक्ष नियुक्ती हुने तयारी चलेको बेलो अमरेशको यो भनाई आएको हो । बोर्डको अध्यक्ष नियुक्तीमा आरजु हाबी हुने आशंका गरिएको खबरहरु बाहिरिएका छन् ।
राजा वीरेन्द्रको शासनमा रानी ऐश्वर्यदेवीलाई भ्रष्टाचारको आरोप लाग्थ्यो । स्विस बैंकमा ऐश्वर्यले पैसा जम्मा गरेको आरोप लाग्थ्यो । त्यतिबेला समाचार लेख्दा रानीको नाम राख्न नसक्ने भएकोले पम्फादेवीको नाममा उनको विरोध हुन्थ्यो । पछि पम्फादेवीकै नाममा उनको विरोधमा समाचारहरु प्रकाशन हुन्थ्यो । यही शैलीमा आरजु भ्रष्टाचारमा उत्रिएको अमरेशको आरोप थियो । सरकारले भ्रष्टाचारीलाई कारबाही नगरिए जनताको माझमा यही नारा लगेर जाने चेतावनीसमेत दिएका छन् ।
‘देशको जनता गरिब हुने गरिबको छोराछोरी मलेसिया कतारमा ट्याक्स पठाउने यहाँ अर्बौ कुम्ल्याउने । सेक्युरिटी प्रिन्टिङ प्रेसको कुरा छ । म सभामुखलाई अनुरोध गर्छु त्यो स्टक एक्सचेन्जको रमेश अर्याललाई कारबाहीको दायरामा ल्याउनुपर्छ,’ अमरेशको जोड थियो, ‘नेप्से परिसुचकको गरिएको अध्ययन प्रतिवेदन २०७९ को छ । त्यो लागू नगर्ने । चोरबाटोबाट हिमालय रिइन्स्युरेन्सलाई जसरी प्राइभेटलाई लाइसेन्स दिने अर्बौ खाने । या खाने पम्फादेवीहरुलाई कारवाहीको दायरामा लान्छु या जनताको बीचमा यही नारा लिएर जान्छु ।’
सञ्चार माध्यममा ठाउँ नदिन अनुनय !
अमरेशको अभिव्यक्ति सामाजिक सञ्जालदेखि मिडियामा छाएपछि आरजु आक्रोशित बनेकी छिन् । मंगलबार आरजुले आफूमाथि कपोलकल्पित आरोप लगाएको दाबी गरेकी छिन् । ‘पछिल्ला केही दिनयता मेरो व्यक्तिगत र राजनीतिक चरित्रहत्या गर्ने दूषित मनसाय लिएर केही व्यक्तिहरुले मलाई लक्षित गरेर निराधार र कपोलकल्पित आरोप लगाउदै दुस्प्रचार गरिएकोप्रति मेरो गम्भीर ध्यानाकर्षण भएको छ,’ प्रेस विज्ञप्तिमार्फत आरजुले भनेकी छिन्, ‘हरेक व्यक्तिलाई आफ्नो विचार र अभिव्यक्ति स्वतन्त्रतापूर्वक राख्ने अधिकार छ, तर कसैलाई पनि कोही विरुद्ध आधारहिन गालि गलौज र लान्छाना लगाउने अधिकार छैन ।’
नियोजित रुपमा मेरो चरित्रहत्या गर्ने उद्देश्यका साथ केही व्यक्तिले संचार माध्यममा अन्तर्वार्ता दिँदै गाली बेइज्जतीमा उत्रनु खेदजनक रहेकोसमेत आरजुले बताएकी छिन् । अमरेशले प्रतिनिधि सभामा बोलेलगत्तै विभिन्न टेलिभिजनमा अन्तर्वार्ता दिँदै आरजुमाथि खनिएपछि प्रेस विज्ञप्तिमार्फत आरजुले प्रतिकार गरेकी हुन् । ‘कांग्रेसमा तालिवानहरुको जमात छ । भ्रष्टाचारको जननी भएको छ कांग्रेस,’ प्राइम टेलिभिजनसँग अमरेशले भनेका छन्, ‘नेपालमा नयाँ नयाँ पम्फादेवी जन्म भइरहेको छ ।’
यता आरजुले भने यस्तो विषयलाई सञ्चारमाध्यममा ठाउँ नदिन आग्रह गरेकी छिन् ।
‘हरेक जसो अन्तवार्तामा केही व्यक्तिहरु नियोजित रुपमै मेरोविरुद्ध व्यक्तिगत गालीगलौज गर्ने, आरोप लगाउने, चरित्रहत्या गर्ने कार्य गरिरहेकाले त्यस्ता आधारहिन, निराधार, तथ्यहीन र चरित्रहत्या गर्ने दुषित उद्देश्य बमोजिम आएका आरोपलाई स्थान नदिन पनि सबै आम संचारमाध्यमलाई आग्रह गर्दछु,’ आरजुले भनेकी छिन् ।
