काठमाडौं(प्रस)– त्रिभुवन विश्वविद्यालयले स्नातकोत्तर तहमा श्रम शिक्षाको अध्यपन सुरु गर्ने भएको छ । श्रमको सैद्धान्तिक तथा व्यवहारिक दुवै ज्ञान र सीप सिकाउने उद्देश्यले त्रिविले मानविकी तथा सामाजिक शास्त्र संकायमा श्रम शिक्षा अध्ययनका लागि पहिलो समूहको रूपमा ०७६ को शैक्षिक सत्रबाट विद्यार्थी भर्ना सुरु गर्न लागेको हो ।
श्रम शिक्षाको पाठ्यक्रम लामो समयदेखि श्रम र श्रमिकको क्षेत्रमा अध्ययन, अध्ययापन र अनुसन्धान गदै आएका र विश्वस्तरका श्रम विश्वविद्यालय, चाइना लेबर रिलेसन युनिभर्सिटी, ग्लोबल लेबर युनिभर्सिटी, जवहारलाल नेहरू विश्वविद्यालयको प्राध्यापकसँगको अन्तक्र्रियाबाट तयार हुने त्रिविले जनाएको छ । विश्व बजारमा दक्ष जनशक्ति नभइरहेको अवस्था र अधिकांश युवाहरू विदेशिनु पर्ने बाध्यात्मक अवस्था भएकाले दक्ष जनशक्ति उत्पादन गर्ने उद्देश्यले निकै लामो अध्ययनपछि यसको अध्यापन गराउन लागेको जनाएको त्रिविको भनाइ छ ।
त्यति मात्र होइन्, यसले विद्यार्थीहरूलाई कक्षामा सेमिनार, वर्कसप, कक्षाकोठा छलफल, सामूहिक कार्य, प्रस्तुतीकरण र प्रोजेक्ट वर्कको माध्यमबाट अब्बल बनाएर यसको प्राज्ञिक अध्ययन, अनुसन्धान, श्रमसम्बन्धी नीति निर्माण र कार्यान्वयनका पक्षमा काम गर्नेे दक्ष जनशक्ति उत्पादन गर्ने उद्देश्यसमेत राखेको त्रिविबाट जारी सूचनामा उल्लेख छ ।
स्नातकोत्तरमा श्रम शिक्षा अध्ययनका लागि मान्यताप्राप्त शैक्षिक संस्थाबाट कुनै पनि विषयमा स्नातक तह वा सो सरहको परीक्षा उत्तीर्ण गरेका र लिखित परीक्षाको साथै मौखिक परीक्षा उत्तीर्ण गरेकाले मात्र भर्ना हुन पाउने त्रिविले जनाएको छ ।
त्यसका लागि त्रिविका अनुसार ५ माघदेखि ४ फागुणसम्म १ हजार ५ सय रूपैयाँ दस्तुर तिरेर आवेदन भर्न सकिने छ । यसरी तोकिएको परीक्षा उत्तीर्ण भएर आएका विद्यार्थीहरूको यही चैत पहिलो साताबाट कक्षा सुरु हुनेछ ।
यसरी श्रम शिक्षा अध्ययन गरेका विद्यार्थीहरूलाई श्रमको क्षेत्रमा स्थापित विश्वविद्यालयहरू, राष्ट्र संघीय निकाय, ट्रेड युनियन, सरकारी तथा गैरसरकारी निकायका परियोजना तथा अनुसन्धान गर्ने संघ, संस्थाहरूसँग सम्पर्क, समन्वय तथा सहकार्य गर्ने काममा अवसर दिइने त्रिविले जनाएको छ ।
