काठमाडौं– लामो समयदेखि सत्तारुढ दल नेपाल कम्युनिस्ट पार्टी (नेकपा)भित्र सभामुख चयन प्रक्रियामा अन्तरविवाद छ । यसैकारण तीनपटक लगातार प्रतिनिधि सभा बैठकसमेत स्थगित भइसकेको छ । तर, नेकपाका अध्यक्षद्वय केपी ओली र अर्का अध्यक्ष पुष्पकमल दाहालबीच सभामुख चयनबारे निरन्तर छलफलमा जुट्दै आएका छन् । यसैक्रममा बिहीबार सभामुख चयनको गाँठो फुकाउन दुई अध्यक्षबीच सहमति भएको छ ।
नेकपाभित्रै सभामुखको उम्मेदवार कसलाई बनाउने भन्नेमा अध्यक्षद्वयबीच सहमति नभएपछि केही दिनयता उनीहरूबीच संवादसमेत टुट्न पुगेको थियो । तर, पाँच दिनपछि प्रधानमन्त्रीसमेत रहेका अध्यक्ष ओली र अर्का अध्यक्ष दाहालबीच बिहीबार बालुवाटारमा करिब दुई घन्टा छलफल भएको थियो । सभामुख चयनबारे अध्यक्षद्वयबीच सकरात्मक छलफल भएको जनाइएको छ ।
नेकपाका एक नेताका अनुसार बिहीबारको छलफल सकारात्मक ढंगले अघि बढेको छ । उनका अनुसार शुक्रबार पुनः छलफलपछि निष्कर्ष निस्किने छ ।
प्रधानमन्त्री निकट स्रोतका अनुसार दुई अध्यक्षबीच भएको छलफलमा ६ माघअघि उपसभामुख डा.शिवमाया तुम्बाहाम्फेले राजीनामा गर्ने र नेकपाको तर्फबाट सभामुखका लागि उम्मेदवारी दर्ता गर्नेमा एकमत भएका छन् । पछिल्लोपटक ६ माघमा बस्ने गरी प्रतिनिधि सभा बैठक स्थगित गरिएको थियो । उक्त बैठकअगाडि नै सभामुखको उम्मेदवार तय गर्न नेकपालाई चुनौती भएको छ ।
सभामुखमा बढेको विवादले प्रधानमन्त्री तथा अध्यक्ष ओली र कार्यकारी अध्यक्ष दाहालबीच गएको आइतबारयता सवांदसमेत हुन सकेको थिएन । तर, बिहीबार भएको छलफलले सभामुख चयन प्रकरणमा उनीहरू सहमत भएको जनाइएको छ ।
प्रधानमन्त्री ओलीले सभामुखमा दलका उपनेता तथा पूर्वसभामुखसमेत रहेका सुवास नेम्वाङलाई अघि सार्दै आएका छन् भने अर्का अध्यक्ष दाहालले नेता अग्नि सापकोटालाई सभामुख बनाउने अडान लिँदै आएका थिए । यसअघि दुवै अध्यक्षले आफ्नो अडान नछाडेपछि सभामुख चयन अन्योलमा परेको थियो । सभामुख चयनकै विषयले गर्दा पटक–पटक प्रतिनिधि सभा बैठक सर्दै आएको छ । गत आइतबारका लागि बोलाइएको प्रतिनिधि सभा पनि अध्यक्षद्वय सभामुखबारे निष्कर्षमा पुग्न नसकेपछि ६ माघसम्मलाई बैठक स्थगित गरिएको थियो ।
यस्तै, नेकपाकै एकपक्षले उपसभामुख डा.तुम्वाहाङफेले राजीनामा गर्न ढिलाई गरेपछि सभामुख चयन ढिलाई भएको तथा संसद नै बन्धक बन्न लागेको भन्दै नेतृत्वलाई चाँडो निर्णयमा पुग्न दबाब दिँदै आएको छ । केही दिनअघि नेकपा सचिवालय बैठकले समेत उपसभामुख डा.तुम्बाहाम्फेलाई राजीनामा दिन लगाउने निर्णय गरेको थियो । तर, डा.तुम्बाहाम्फेले आफैँ सभामुख बन्ने दाउका साथ राजीनामा नदिने बताएपछि नेकपा अप्ठ्यारोमा परेको थियो । तर, पछिल्लो समय उपसभामुख डा.तुम्बाहाम्फेसमेत सकरात्मक देखिएकी छन् । उनले सभामुख उम्मेदवारी घोषणा गरिएको एक घन्टाभित्र राजीनामा दिने बताएकी छन् ।
