काठमाडाैं – काठमाडाैं सोह्रखुट्टेमा बाउन्सरमाथि खुकुरी प्रहार गरेको आरोपमा पक्राउ परेका आठ जनालाई प्रहरीले सार्वजनिक गरेको छ ।
जिल्ला प्रहरी परिसर काठमाडाैं ले आज बिहीबार पत्रकार सम्मेलन गरी गएकाे असोज २५ गते काठमाडाैंकाे सोह्रखुट्टेमा बाउन्सरमाथि खुकुरी प्रहार गर्ने आठ जनालाई ज्यान मार्ने उद्योग गर्न नहुने कसुरमा पक्राउ गरी सार्वजनिक गरेको हो ।
काठमाडाैं महानगरपालिका–२६ गल्कोपाखाकाे हनुमान चोक नजिकै एक समूहले दुई जना पुरुषलाई धारिलो हतियार, इँटा, रक्सीकाे बोतल लगायतले प्रहार गरी गम्भीर घाइते बनाएर फरार भएका थिए ।
फरार भएका आठ जनालाई काठमाण्डाै प्रहरीको अनुसन्धानमा प्रक्राउ गरी सार्वजनिक गरिएको जिल्ला प्रहरी परिसर काठमाडाैंका प्रमुख एवम् प्रहरी वरिष्ठ उपरीक्षक (एसएसपी) भरत बोहराले जानकारी दिएका हुन् ।
पक्राउ पर्नेमा काठमाडाैंकाे गोकर्णेश्वर बस्ने जीवन तामाङ, दोर्जे शेर्पा, विनोद तामाङ, विकास श्रेष्ठ, राजेन्द्र खत्री, प्रदीप तामाङ र दीपेन लामा छन् । एसपी बाेहराले मोटरसाइकल भाडामा दिने चाबहिल बस्ने २६ वर्षीय करण डंगोललाई पनि पक्राउ गरिएको बताए ।
प्रहरी वरिष्ठ उपरीक्षक बोहराले अनुसन्धानका क्रममा उनीहरूलाई काठमाडाैंका विभिन्न ठाउँमा लुकिछिपी बसेको अवस्थामा पक्राउ गरिएको बताए । पक्राउ पर्नेहरूको साथबाट खुकुरी तीन थान, प्र ३० ०२–०१० प ३७६५ नम्बरको मोटरसाइकल, प्र ३० २–०११ प ४६४७ नम्बरको मोटरसाइकल, घटनास्थलमा फेला परेका इँटा र च्यातिएर रक्तामे भएका कपडालगायत सामग्री बरामद भएको उनले जानकारी दिए ।
काठमाडाैं जिल्ला अदालतले पक्राउ परेकाहरूलाई सात दिन हिरासतमा राखेर अनुसन्धान गर्न पनि अनुमति दिएको एसपी बाेहराले बताएका छन् ।
