काठमाडौं - श्रम, रोजगार तथा सामाजिक सुरक्षामन्त्री कृष्णकुमार श्रेष्ठले विदेशमा अलपत्र वा समस्यामा परेका नेपालीलाई संरक्षण गरी स्वदेश फर्काउने विषयलाई आफूले उच्च प्राथमिकतामा राखेर काम गरिरहेको बताएका छन् । मलेसियाबाट उद्धार गरी नेपाल ल्याइएको श्रमिकसँगको भेटमा आइतबार उनले उक्त कुरा बताएका हुन् ।
मन्त्री श्रेष्ठले उद्धार गरेर ल्याइएका श्रमिकहरू राखिएको आवासगृहमै पुगेर उनीहरूले भोगेका समस्याहरूबारे जानकारी लिएका थिए । उद्धार गरिएका श्रमिकहरूलाई बसुन्धारास्थित प्रवासी नेपाली समन्वय समितिको आवासगृहमा राखिएको छ । उनीहरूले विदेशी भूमिमा भोगेका समस्याको कारण र समाधानका उपायबारे मन्त्री श्रेष्ठसँग छलफल गरेको उनको सचिवालयले जानकारी दिएको छ ।
नेपाली श्रमिकहरूको न्यायमा पहुँच तथा क्षतिपूर्ति सुनिश्चित गर्न रोजगारदाता, सरकारी निकाय, श्रमिक र म्यानपावर कम्पनीलाई जिम्मेवार बनाउनुपर्ने मन्त्री श्रेष्ठले बताए । मलेसियामा लामो समय गैरकानुनी हैसियतमा बसेका, तलब भुक्तानी नपाएका, रोजगारीबाट निष्कासनमा परेका र जेलमा रहेका गरी १० जना श्रमिकलाई उद्धार गरी नेपाल ल्याइएको थियो ।
मन्त्री श्रेष्ठले विदेशमा नेपाली श्रमिकले भोगेको समस्या समाधानका लागि सम्बन्धित देशको सरकारसँग कुरा गर्ने पनि बताएका छन् । मन्त्री श्रेष्ठले उद्धार गरिएका श्रमिकहरूलाई नेपालमै स्वरोजगार बन्न र विदेश जानै परे सीप सिकेर तथा सबै प्रक्रिया बुझेर मात्रै जान आग्रह गरेका छन् । रोजगारदाता कम्पनी, श्रमिक पठाउने म्यानपावर कम्पनी तथा श्रमिकको आङ्खनै कमजोरीका कारण धेरै नेपाली विदेशमा समस्यामा पर्ने गरेको भन्दै सबै सचेत हुनुपर्ने मन्त्री श्रेष्ठको भनाइ थियो ।
