काठमाडौं– मलेसिया रोजगारीमा एकाधिकार (सिण्डिकेट) भित्र्याउन सक्रियमध्येका केही व्यवसायी सोमबार नेपाल वैदेशिक रोजगार व्यवसायी संघको कार्यालयमा पुगेपछि विवाद भएको छ।
मलेसियाको ‘विदेशी कामदारको एकीकृत व्यवस्थापन प्रणाली’ (एफडब्ल्युसिएमएस) मा सूचीकृत २५ संस्थाका सहायकको सूचीमा परेका २५० संस्थाका केही प्रतिनिधि सोमबार सिफलस्थित संघको कार्यालय पुगेका थिए। वैदेशिक रोजगार विभागले ती व्यवसायीहरुका लागि मलेसियाको पूर्वस्वीकृति रोक्का गरिदिएकोले उक्त रोक्का खोल्नका लागि आवश्यक पहल गरिदिन भन्दै संघको कार्यालय पुगेका थिए। मलेसियामा श्रमिक पठाउन नपाएपछि उक्त कारबाही फुकुवा गरिदिनपर्यो भन्ने उनीहरुको माग थियो।
तर उक्त प्रणालीमा प्रवेश गरेर गल्ती गर्ने अनि कारबाहीमा परेपछि संघ गुहार्ने भन्दै आक्रोशित व्यवसायीले प्रतिप्रश्न गरेपछि स्थिति केहिबेर तनावग्रस्त बनेको एक व्यवसायीले बताए।
गत भदौ २४ गते एफडब्ल्युसिएमएसमा सूचीकृत २५ व्यवसायीले थप २५० व्यवसायीलाई उक्त प्रणालीमा आबद्ध गराएका थिए। त्यसपछि विभागले सूचीकृत भएका सहायक संस्थाहरुकोसमेत पूर्वस्वीकृति बन्द गरिदिएको छ।
सहायक संस्थाको सूचीमा परेका २५० मध्ये कतिपय व्यवसायीले आफूलाई कुनै जानकारीविना एफडब्ल्युसिएमएसमा राखिएको दाबी गर्दै आएका छन्। तर ती व्यवसायीले मौखिकरुपमा आफूहरु निर्दोष छु भने पनि त्यसलाई पुष्टि गर्ने कुनै प्रमाण दिन नसकेको संघका तृतीय उपाध्यक्ष तथा सिण्डिकेटविरुद्धको संघर्ष समितिका संयोजक लक्ष्मण पौडेलले बताए। यदि इच्छाविपरीत सो प्रणालीमा नाम राखिएको भए त्यसरी राख्ने व्यवसायीविरुद्ध कारबाहीको प्रक्रिया अघि बढाउन सहयोग गर्नुपर्ने उनको भनाइ छ। यसरी झगडा गरेर समस्याको समाधान नहुने भएकाले आपसी छलफलबाट समाधान गरिनुपर्ने पौडेलले बताए।
‘२५० भित्र परेका व्यवसायीले निर्दोष छु भन्ने तर २५ व्यवसायीविरुद्ध न कुनै निकायमा उजुरी गरेको छ, न कतै निवेदन हालेको छ अनि कसरी विश्वास गर्ने ?,’ संयोजक पौडेलले भने, ‘यसरी वादविवाद गर्नेभन्दा पनि सौहार्द्रपूर्ण वातावरणमा छलफल गरेर समस्याको समाधान निकाल्नपर्छ। उहाँहरु यदि सिस्टमबाट निस्कन चाहनुभयो भने हामी सहयोग गर्न तयार छौं।’
समस्यामा परेका व्यवसायीहरु उक्त कारबाही फिर्ता गरिदिन भन्दै सोमबार विभागमासमेत पुगेको बुझिएको छ। सीमित व्यवसायीलाई मात्र मलेसियाको रोजगारीमा पहुँच दिन खोजिएपछि सरकारले मलेसिया सरकारसँग कूटनीतिक संवाद गरेर समस्याको हल गर्ने तयारी गरिरहेको छ।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)