काठमाडौं- नेपालकै अग्रणी इन्टरनेट सेवा प्रदायक वर्ल्डलिंक कम्युनिकेसन्स लिमिटेडले साना तथा मध्यम व्यवसायका लागि नयाँ बिज २४ व्यवस्थापित ताररहित इन्टरनेट सेवा सञ्चालनमा ल्याएको छ। कम्पनीका अनुसार बिज २४ नेपालमा उपलब्ध व्यवस्थापित ताररहित इन्टरनेट सेवा हो।
यसले व्यवसायिक परिसरका विभिन्न क्षेत्रमा समान तथा भरपर्दो ताररहित इन्टरनेट पहुँच उपलब्ध गराउनुका साथै बादल प्रविधिमार्फत आफ्नो सञ्जाल व्यवस्थापन गर्न सकिने सुविधा प्रदान गर्छ। ग्राहकका प्राविधिक समस्या छिटो समाधान गर्न प्राथमिकता सहयोग सेवासमेत उपलब्ध गराइने कम्पनीले जनाएको छ।
साना तथा मध्यम व्यवसायका सञ्चालकसँगको प्रत्यक्ष छलफल तथा स्थलगत रूपमा गरिएको विभिन्न चरणको परीक्षणपछि बिज२४ तयार पारिएको वर्ल्डलिंकले जनाएको छ। वर्ल्डलिंकका बिक्री प्रबन्धक सतीश कृष्ण राजभण्डारीका अनुसार नेपालका धेरै साना तथा मध्यम व्यवसाय अझै पनि घरायसी प्रयोजनका लागि प्रयोग हुने इन्टरनेट जडानमा निर्भर छन्।
यसका कारण कार्यालय वा व्यवसायिक परिसरका केही स्थानमा ताररहित इन्टरनेटको सङ्केत नपुग्ने, व्यवसाय सञ्चालनका महत्वपूर्ण समयमा इन्टरनेटमा समस्या आउने तथा सञ्जालको अवस्थाबारे पर्याप्त जानकारी नहुनेजस्ता समस्या देखिने गरेका छन्।
“यिनै चुनौतीको समाधानका रूपमा बिज २४ ल्याइएको हो,” राजभण्डारीले भने, “यसले व्यवसायलाई थप भरपर्दो, व्यवस्थित र व्यवसायिक स्तरको इन्टरनेट पहुँच प्रदान गर्छ।” उनका अनुसार चिकित्सालय, रेस्टुरेन्ट, साना तथा मध्यम आकारका पसल, स्टुडियो र सहकार्य कार्यालयलगायत विभिन्न व्यवसायका आवश्यकतालाई ध्यानमा राखेर बिज२४ तयार पारिएको हो।
व्यवसायको आवश्यकताअनुसार व्यवस्थापित ताररहित इन्टरनेट
बिज २४ ले व्यवसायिक परिसरको हरेक क्षेत्रमा समान र भरपर्दो ताररहित इन्टरनेट पहुँच उपलब्ध गराउने गरी सञ्जाल निर्माणमा सहयोग गर्ने कम्पनीले जनाएको छ।
एउटै राउटरमा मात्र निर्भर हुनुको सट्टा व्यवसायको भौतिक संरचना, क्षेत्रफल र आवश्यकताअनुसार उपयुक्त ताररहित इन्टरनेट समाधानको योजना तथा सुझाव उपलब्ध गराइने वर्ल्डलिंकको भनाइ छ।
कम्पनीका अनुसार यस सेवाले व्यवसाय सञ्चालकलाई आफ्नो ताररहित इन्टरनेट सञ्जाललाई बादल प्रविधिमार्फत व्यवस्थापन गर्न सहज बनाउनेछ। साथै, सञ्जालसम्बन्धी समस्या पहिचान तथा समाधानमा प्राथमिकता सहयोग सेवाले समेत सहयोग पुर्याउने अपेक्षा गरिएको छ।
वर्ल्डलिंकले बिज २४ लाई विशेषगरी आफ्नो व्यवसाय सञ्चालनका लागि स्थिर, भरपर्दो र व्यवस्थित इन्टरनेट पहुँच आवश्यक पर्ने साना तथा मध्यम उद्यमलाई लक्षित गरेको जनाएको छ।
