- श्रमिक पठाउने प्रक्रिया १० दिनभित्र सक्न व्यवसायीलाई संघको अनुरोध
काठमाडौं- वैदेशिक रोजगार व्यवसायीहरुले व्यवसाय बन्द गरेर सरकारलाई दबाब दिने तयारी गरेका छन् । वालेन्द्र शाह नेतृत्वको सरकारले ठगी नियन्त्रणको नाममा व्यवसायीमाथि कारबाही बढाएको भन्दै व्यवसायीहरु व्यवसाय बन्द गर्ने तयारीमा जुटेका हुन् ।
चाँडै पत्रकार सम्मेलन गरेर व्यवसायीको भेला बोलाउने र व्यवसाय बन्द गर्ने निर्णय भएको छ । अहिलेको अवस्थामा यसरी सरकारलाई सहयोग गर्छौं । सम्पूर्ण व्यवसायीलाई हाल श्रमिक पठाउने प्रक्रियाको अन्तिम चरणमा रहेका सबै श्रमिकहरूको प्रस्थान यथासम्भव आगामी १० दिनभित्र सम्पन्न गरिसक्नुहुन अनुरोध गर्दछौं ।
हिराबहादुर डाँगी
महासचिव, नेपाल वैदेशिक रोजगार व्यवसायी संघ
वैदेशिक रोजगार व्यवसायीहरुको छाता संगठन नेपाल वैदेशिक रोजगार व्यवसायी संघको सोमबार बसेको पदाधिकारी बैठकले यस्तो निर्णय गरेको संघले जानकारी दिएको छ । संघका महासचिव हिराबहादुर डाँगीले सम्पूर्ण व्यवसायीलाई वैदेशिक रोजगारीमा श्रमिक पठाउने प्रक्रिया १० दिनभित्र सम्पन्न गर्न अनुरोध गर्ने निर्णय गरिएको बताए । कानुनको पालना गर्दै व्यवसाय सञ्चालन गर्न व्यवहारतः जटिल र चुनौतीपूर्ण अवस्था सिर्जना भएकोले छिट्टै व्यवसायीहरुको भेला बोलाएर व्यवसाय बन्द गरिने उनको भनाइ छ ।
‘चाँडै पत्रकार सम्मेलन गरेर व्यवसायीको भेला बोलाउने र व्यवसाय बन्द गर्ने निर्णय भएको छ । अहिलेको अवस्थामा यसरी सरकारलाई सहयोग गर्छौं,’ महासचिव डाँगीले भने, ‘सम्पूर्ण व्यवसायीलाई हाल श्रमिक पठाउने प्रक्रियाको अन्तिम चरणमा रहेका सबै श्रमिकहरूको प्रस्थान यथासम्भव आगामी १० दिनभित्र सम्पन्न गरिसक्नुहुन अनुरोध गर्दछौं ।’
संघले हालको जटिल अवस्थालाई समयानुकूल बनाउन वैदेशिक रोजगार ऐन तथा नियमावली संशोधन, वैज्ञानिक एवं व्यावहारिक सेवा शुल्क व्यवस्थापन, श्रमिकको लागत खर्च निर्धारण, एकाधिकारको अन्त्य, हवाई भाडादर समायोजन, वैदेशिक रोजगारमा जाने श्रमिकलाई उपलब्ध गराइने भनिएको विनाधितो वा सहुलियतपूर्ण कर्जाको प्रभावकारी कार्यान्वयन, तथा नगदरहित कारोबारका लागि डिजिटल संयन्त्रको व्यवस्थालगायतका विषयहरूलाई सम्बोधन गराउन निरन्तर सम्बन्धित निकायहरूसँग पहल गर्दै आएको जनाएको छ । तर, सरकारले व्यवसायीमाथि अनावश्यक दुःख दिने नियतले कारबाही बढाएको विरोधमा व्यवसाय बन्द गर्न लागिएको बताइएको छ ।
पछिल्लो समय वैदेशिक रोजगार विभागले गरेको कारबाहीको शृंखलाबाट समस्यामा परेको व्यवसायीहरुले बताउँदै आएका थिए । गत असार २७ गते भारतीय विमानस्थलबाट श्रमिक पठाएको भन्दै विभागले ५९८ वटा व्यवसायीलाई कारबाही गरेपछि उनीहरु थप आक्रोशित बनेका छन् ।
