- आव २०८२/८३ मा कूल सात लाख ९७ हजार ८०२ जना विदेसिएको तथ्यांक
काठमाडौं- गत आर्थिक वर्ष २०८२/८३ मा रोजगारीको खोजीमा झण्डै आठ लाख युवाले मुलुक छाडेका छन् । वैदेशिक रोजगार विभागको तथ्यांकअनुसार उक्त आवमा सात लाख ९७ हजार ८०२ जना युवा वैदेशिक रोजगारीमा गएका हुन् । यो संख्या संस्थागत तथा व्यक्तिगत श्रम स्वीकृति लिएर जानेहरुको हो ।
गत आवमा श्रम स्वीकृति लिएका कूल संख्यामा सात लाख दुई हजार १०१ जना पुरुष र ९५ हजार ७०१ जना महिला छन् । विभागको तथ्यांकअनुसार आघिल्लो आव २०८१/८२ तुलनामा गत आवमा रोजगारीमा जानेको संख्या ४१ हजार ४६४ ले घटेको छ । आव २०८१/८२ मा आठ लाख ३९ हजार २६६ जना श्रम स्वीकृति लिएर वैदेशिक रोजगारीमा गएका थिए ।
गत भदौ २३ र २४ को जेन-जी आन्दोलनपछि नेपालीहरुको प्रमुख रोजगार गन्तव्य संयुक्त अरब इमिरेट्स (युएई)ले केही महिना रोजगारी बन्द गर्नु र गत फागुनदेखि मध्यपूर्व तनावग्रस्त बन्दा वैदेशिक रोजगारीमा जानेको संख्यामा केही कमी आएको पाइन्छ । गत आर्थिक वर्षमा प्रत्येक दिन औसतमा दुई हजार १८५ जनाभन्दा धेरै विदेसिएका छन् । आव २०८१/८२ मा यस्तो संख्या दुई हजार २९९ जनाभन्दा धेरै थियो ।
गत आवमा चार लाख नौ हजार ४५६ जना युवाले रोजगारीको खोजीमा पहिलोपटक मुलुक छाडेका छन् । पहिलोपटक रोजगारीमा जानेमा तीन लाख ५० हजार ८९८ जना पुरुष र ५८ हजार ५५८ जना महिला छन् । उक्त अवधिमा इजाजतप्राप्त संस्था (म्यानपावर) मार्फत दुई लाख ७१ हजार २२३ जना रोजगारीमा गएका छन् । म्यानपावरमार्फत गएकाहरुमा दुई लाख ४४ हजार पाँच जना पुरुष र २७ हजार २१८ जना महिला छन् ।
त्यस्तै, व्यक्तिगत श्रम स्वीकृति लिएर एक लाख २९ हजार ३१७ जना गएका छन् । जसमध्ये ९९ हजार ५०६ जना पुरुष र २९ हजार ८११ जना महिला रहेका छन् । तथ्यांकअनुसार व्यक्तिगत श्रम स्वीकृति लिएर रोजगारीमा जाने महिलाको संख्या बढी छ । गत आवको अन्तिम महिना असारमामात्रै ६९ हजार ३६२ जना रोजगारीका लागि विभिन्न मुलुक गएका छन् । जसमा ६० हजार ४६७ जना पुरुष र आठ हजार ८९५ जना महिला छन् । उक्त एक महिनामा ३९ हजार ३०८ जना पहिलोपटक श्रम स्वीकृति लिएर गएका छन् । जसमा ३३ हजार ४३० जना पुरुष र पाँच हजार ८७८ जना महिला छन् ।
विभागका अनुसार असार महिनामामात्र २३ हजार १३४ जना पुरुष र तीन हजार १९१ जना महिला गरी कूल २६ हजार ३२५ जना संस्थागत श्रम स्वीकृति लिएर गएका छन् । त्यस्तै, १२ हजार २८० जना व्यक्तिगत श्रम स्वीकृतिमा विदेसिएका छन् । जसमा नौ हजार ७५३ जना पुरुष र दुई हजार ५२७ जना महिला छन् । ५८९ जना भने जिटुजीमार्फत दक्षिण कोरिया र इजरायलको रोजगारीमा गएका छन् ।
असारमा रोजगारीमा जाने दक्ष श्रमिकको संख्या ४० हजार ३२० जना रहेको छ । सीपयुक्त भएर जानेहरुमा ३४ हजार ६०९ पुरुष र पाँच हजार ७११ जना महिला छन् । रोजगारीका लागि १७ हजार ८३१ जना अदक्ष कामदार परदेसिएका छन् । जसमा १५ हजार ७५६ जना पुरुष र दुई हजार ७५ जना महिला छन् । साथै, १० हजार ६६१ जना अर्धदक्ष, ८६ जना उच्च दक्ष र ४६४ जना व्यावसायिक कामदार रोजगारीमा गएका छन् ।
प्रमुख गन्तव्य युएई
गत असारमा युवाहरु रोजगारीको खोजीमा १०० वटा मुलुक जाँदा सबैभन्दा धेरै युएई गएका छन् । मध्यपूर्वको तनावका कारण गत फागुनदेखि जेठसम्म मलेसिया प्रमुख श्रम गन्तव्य बन्दै आएकोमा खाडीको अवस्था सामान्य बन्दै जाँदा असारमा पुनः युएई नै प्रमुख गन्तव्य बनेको छ । उक्त महिनामा १३ हजार ३१८ जना पुरुष र दुई हजार ८०८ जना महिला गरी जम्मा १६ हजार १२६ जना युएई गएका छन् ।
युएईपछि धेरै श्रमिक मलेसिया गएका छन् । गत महिना १३ हजार ४७० जना मलेसिया गएको तथ्यांक छ । जसमा १३ हजार १५९ जना पुरुष र ३११ जना महिला छन् । त्यस्तै, कतारमा ११ हजार ६३२, साउदी अरबमा नौ हजार ३६२ र कुवेतमा तीन हजार १८५ जना गएका छन् ।
