काठमाडाैं - फिफा विश्वकप प्रतियोगिताअन्तर्गत हिजो राति भएको खेलमा पोर्चुगल विजयी भएको छ । समूह ‘के’अन्तर्गतकोे पोर्चुगलले उज्वेकिस्तानलाई ५–० गोलअन्तरले पराजित गर्यो । क्रिस्टियानो रोनाल्डोले दुई गोल , नुनो मेन्डेस, अब्दवोहिद नेमातोव र राफाएल लीआले एक एक गोल गरी पोर्चुगललाई जिताएका हुन् ।
यो गोलसँगै रोनाल्डो विश्वकपमा गोल गर्ने दोस्रो सबैभन्दा पाका खेलाडी पनि बनेका छन् । रोनाल्डोले हालसम्म विश्वकपमा कुल १० गोल गरिसकेका छन् । रोनाल्डोको यो विश्वकपमा २४औं खेल थियो। जितसँगै पोर्चुगल समूह ‘के’को अंक तालिकामा चार अंकका साथ शीर्ष स्थानमा उक्लिएको छ । समूह चरणको आफ्नो पहिलो खेलमा पोर्चुगलले कङ्गोसँग बराबरी खेलेको थियो । समूह चरणमा लगातार दोस्रो हार बेहोरेको उज्वेकिस्तान अंक तालिकाको अन्तिममा छ ।
इंग्ल्यान्ड र घानाबीचमा खेल बराबरीमा
आज बिहान बोस्टन स्टेडियममा भएको समूह ‘एल’अन्तर्गतको खेलमा इंग्ल्यान्ड र घानाबीचको खेल गोलरहित बराबरीमा टुगिंएको छ । विश्वकप फुटबलमा इंग्ल्यान्डले घानासँग गोलरहित बराबरी खेलेपछि नकआउट चरणमा पुग्नका लागि समूह चरणको अन्तिम आफ्नो अन्तिम खेलसम्म कुर्नुपर्ने भएको छ ।
इंग्ल्यान्डले अधिकांश समय बलमाथि नियन्त्रण राखे पनि गोल गर्न सकेन। खेलभर धेरै अवसर सिर्जना गरे पनि इंग्लिस खेलाडीको फिनिसिङ कमजोर रहँदा टोली अंक बाँड्न बाध्य बन्यो।घानाले पनि काउन्टर आक्रमणमार्फत केही अवसर सिर्जना गरेको थियो । तर इंग्ल्यान्डका रक्षकहरूले सफल हुन दिएनन् ।यो बराबरीसँगै इंग्ल्यान्डले एक खेल बाँकी रहँदा नकआउट चरणमा पुग्ने अवसर गुमाएको छ। आक्रमणमा अपेक्षित प्रदर्शन गर्न नसके पनि इंग्ल्यान्डका रक्षक मार्क गुएहीले उत्कृष्ट प्रदर्शन गरे । इंग्ल्यान्डले खेलमा १९ प्रहार गरे पनि गोल निकाल्न सकेन ।
समूह चरणबाटै बाहिरियो पानामा
क्रोएसियाले पानामालाई १–० ले हराउँदै फिफा विश्वकप २०२६ मा नकआउट चरण पुग्ने सम्भावना कायमै राखेको छ । यो हारपछि पानामा भने समूह चरणबाटै बाहिरिएको छ । टोरन्टोमा बुधबार भएको समूह एलको खेलमा क्रोएसियाका आन्ते बुडिमिरले गरेको गोल नै निर्णायक गोल बन्यो । खेलको ५४औं मिनेटमा जोसिप स्टानिसिचको पासमा उनले गोल गरेका हुन् ।क्रोएसियाका कप्तान लुका मोड्रिचका लागि यो खेल विशेष रह्यो। उनले राष्ट्रिय टोलीबाट आफ्नो २ सयौं अन्तर्राष्ट्रिय खेल खेले। ४० वर्षीय मोड्रिचको यो ऐतिहासिक उपलब्धिलाई टोलीले जितसहित स्मरणीय बनायो।अन्तिम समयमा पानामाले बराबरी गर्ने प्रयास गरे पनि क्रोएसियाका गोलकिपर डे लिभाकोभिचले बचाउ गर्दै टोलीको अग्रता जोगाए ।यो जितसँगै क्रोएसियाले नकआउट चरण पुग्ने सम्भावना बलियो बनाएको छ। अब उसले अन्तिम खेलमा घानालाई हराउन सके अर्काे चरणमा प्रवेश गर्नेछ। पानामा भने लगातार दोस्रो हारपछि विश्वकपबाट बाहिरिएको छ।यस समूहमा समान ४ अंक जोडेका इंग्ल्याण्ड शीर्ष स्थानमा, घाना दोस्रो स्थानमा र तेस्रो स्थानमा रहेको क्रोएसियाको ३ अंक छ ।
नकआउट चरणमा कोलम्बिया
कोलम्बियाले डेमोक्रेटिक रिपब्लिक अफ कङ्गोलाई १–० ले हराउँदै फिफा विश्वकप २०२६ को नकआउट चरणमा स्थान पक्का गरेको छ । बुधबार ग्वाडालाजारामा भएको समूह ‘के’ को खेलमा कोलम्बियाका ड्यानियल मुन्जोजले ७६औं मिनेटमा गरेको गोल निर्णायक बन्यो। जुआन फर्नान्डो क्विन्तेरोको पासमा उनले गरेको प्रहार डिफेन्डरलाई छोएर गोलमा परिणत भएको थियो । खेलको सुरुआतदेखि नै कोलम्बियाले दबाब बनायो।
धेरै अवसर बनाए पनि गोल गर्न सकेन । मुन्जोजले खेलको सुरुमै गोल गर्ने मौका गुमाए। लुइस डियाजले पनि राम्रो अवसरमा गोल गर्न सकेनन् । तर अन्त्यतिर मुन्जोजले नै गोल गर्दै टोलीलाई जित दिलाए । त्यसपछि कंगाेले बराबरी गर्ने प्रयास गर्यो तर सफल भएन । यो जितसँगै ६ अंक जोडेको कोलम्बिया समूहमा केको शीर्ष स्थानमा रहँदै अन्तिम ३२ मा प्रवेश गरेको छ । अब टोलीले समूह चरणको अन्तिम खेल ४ अंकसहित दोस्रो स्थानमा रहेको पोर्चुगलसँग खेल्नेछ । १ अंक रहेको कंगाेले अन्तिम खेलमा अंकविहिन उज्बेकिस्तानसँग खेल्नेछ ।
