काठमाडौं- वैदेशिक रोजगारी व्यवसायीहरुको छाता संगठन नेपाल वैदेशिक रोजगार व्यवसायी संघ यतिबेला आन्तरिक विवादमा रुमलिएको छ । कार्यसमितिको एउटा पक्ष राजीनामा दिएर बाहिरिएपछि संघको नेतृत्व अलमलिएको अवस्थामा छ । संघका अध्यक्ष भुवनसिंह गुरुङले राजीनामा दिएकाहरुलाई फर्किन आग्रह गरिरहे पनि उनीहरु फर्किएका छैनन् । यसरी आन्तरिक विवादमा अल्झिँदा संघ कमजोर बनेको भन्दै व्यवसायीहरुले मिल्नका लागि दबाब बढाइरहेका छन् ।
यहीबीच आइतबार स्वतन्त्र वैदेशिक रोजगार व्यवसायी संघले सिफलस्थित नेपाल वैदेशिक रोजगार व्यवसायी संघको कार्यालयमा विशेष भेला आयोजना गरेर अध्यक्ष गुरुङको ध्यानाकर्षण गराएको छ । स्वतन्त्र व्यवसायी संघमा आबद्ध व्यवसायीहरुले चार बुँदे माग राख्दै २४ घण्टाभित्र माग सम्बोधन गर्नसमेत अल्टिमेटम दिएको छ । उक्त अवधिमा माग सम्बोधन नभए संघको विकल्प खोज्न बाध्य हुने चेतावनीसमेत व्यवसायीहरुले दिएका छन् ।
केही दिनयता सरकारले विभिन्न उजुरीका आधारमा म्यानपावर कम्पनीमा छापा मार्ने, अनुगमन गर्नेजस्ता कार्य अघि बढाएको छ । यस्तो अवस्थामा व्यवसाय गर्न कठिन हुँदा पनि संघको नेतृत्वले सरकारसँग समन्वय गर्न नसकेको व्यवसायीहरुको गुनासो छ ।
लियो इन्टरनेसनल कन्सलटेन्सी प्रालिका सञ्चालक कमल निरौला आपसी खिचातानीले संघ दुई टुक्रा भएको अवस्थामा मिलेर जाने या मार्गप्रशस्त गर्नुको विकल्प नभएको बताए । ‘वैदेशिक रोजगार व्यवसायीलाई हेर्ने सरकारी दृष्टिकोण सकारात्मक छैन । यता संघ दुई टुक्रा भएको छ । संघले व्यवसायीका कुरा उठाएर सरकारसँग डायलग गर्न सकेको छैन,’ उनले भने, ‘सक्नुहुन्छ भने कार्यसमितिका सम्पूर्ण २१ जना एक ठाउँमा आउनुहोस्, होइन भने बाटो खुला गर्नुहोस् ।’
त्यस्तै, एचएमटी ओभरसिज प्रालिका सञ्चालक तुलसीराम पुरीले संघको बाटो हेरेर बसे सबै व्यवसाय बन्द गर्नुपर्ने अवस्था देखिएको बताए । डर, त्रासमा व्यवसाय सञ्चालन गर्न नसकिने भएकाले कसरी अगाडि बढ्ने भनेर समिति गठन गर्नुपर्ने उनको भनाइ छ ।
‘सरकारले १० हजार रुपैयाँमा मान्छे पठा भन्छ, हामी पठाउन सक्दैनौं, यो क्लियर छ । सरकारले फोन, इमेलको भरमा छापा हानिरहेको छ,’ उनले भने, ‘यस्तो डर त्रास बोकेर हामी कति दिन व्यवसाय गर्ने ? संघको बाटो हेरेर बसे हप्ता–दश दिनभित्र सबैले व्यवसाय बन्द गर्नुपर्ने अवस्था भइसकेको छ । हामीले समस्या समाधान समिति गठन गरेर त्यसपछि के गर्ने भनेर लाग्नुपर्ने अवस्था छ ।’
संघबाट राजीनामा दिएकाहरुलाई संघमा फर्काउन पटक–पटक प्रयास गर्दा पनि असफल भएपछि भेला गर्न बाध्य भएको पुरीको भनाइ थियो । ‘हामीले असन्तुष्ट पक्षलाई संघमा फर्काउन १० पटकभन्दा बढी प्रयास गरिसक्यौं । उहाँहरु मान्नुभएको छैन,’ उनले भने, ‘अध्यक्षको कार्यशैलीले व्यवसायीको हितका लागि काम हुँदैन भन्नुहुन्छ । कुरा नमिल्ने भएपछि के गर्नेे भनेर भेला गरेका हौं ।’
संघका अध्यक्ष गुरुङलाई बुझाउने भनिएकोे ध्यानाकर्षणपत्रमा वैदेशिक रोजगार क्षेत्रलाई मर्यादित र व्यवस्थित बनाउन सरकारसँग समन्वय गरी अव्यावहारिक नीतिहरुलाई परिमार्जन गर्न भूमिका खेल्नुपर्ने, व्यवसायीको हकहित र धरौटी रकमको विषयमा व्यवसायमैत्री वातावरण निर्माणमा पहल गर्नुपर्ने, व्यवसायीबीचको मतभेदको अन्त्य गरी सबै व्यवसायीलाई एकढिक्का बनाएर मागहरुको सम्बोधन गर्नुपर्ने तथा सेवा शुल्कको वैधानिक परिमार्जन र वैदेशिक मागपत्र प्रमाणीकरणमा हुने ढिलाइ अन्त्य गर्न तत्काल कदम चाल्नुपर्ने माग राखिएको छ । कार्यक्रममा अध्यक्ष गुरुङलाई निमन्त्रणा गरिए पनि उपस्थित नभएको जनाइएको छ । ध्यानाकर्षणपत्रसहित २७२ जना व्यवसायीको हस्ताक्षर पनि समावेश गरिएको स्वतन्त्र वैदेशिक रोजगार व्यवसायी संघले जनाएको छ ।
संघ विभाजित छैनः अध्यक्ष गुरुङ
नेपाल वैदेशिक रोजगार व्यवसायी संघका अध्यक्ष भुवनसिंह गुरुङले संघ विभाजित भएको आरोपको खण्डन गरेका छन् । उनले असन्तुष्ट पक्षको राजीनामा अस्वीकृत भइसकेकाले संघ विभाजित नभएको दाबी गरे ।
बहुमत कार्यसमितिले राजिनामा अस्वीकृत गरेर बैठकका लागि आह्वान गर्दा पनि केही पदाधिकारीसहित नौ जना किन आइरहेका छैनन् भनेर उनीहरुले नै जवाफ दिनुपर्ने उनको भनाइ छ । ‘संघ कहाँ विभाजित भएको छ ? राजीनामा स्वीकृत÷अस्वीकृत गर्ने अधिकार अध्यक्षलाई हुन्छ होला नि,’ उनले प्रभावसँग प्रश्न गर्दै भने, ‘बहुमत कार्यसमितिको निर्णयबाट राजीनामा अस्वीकृत भएको चिठी पठाइसकेको छ । आधिकारिकरुपमा बैठकमा आह्वान गरेका छौं । किन आइरहनुभएको छैन भनेर उहाँहरु स्वयंले जवाफ दिनुपर्छ ।’
स्वतन्त्र व्यवसायी संघको आइतबारको कार्यक्रमको विषयमा आफूले ढिला जानकारी पाएकाले पुग्न नसकेको गुरुङले बताए । ‘नुन ओभरसिजमा अनुगमन भएको विषयमा ११ बजे पूर्वअध्यक्ष र घटक संस्थाहरुको छलफल कार्यक्रम थियो । तर व्यवसायीले १२ बजे हामी संघका आएको छौं भन्नुभयो । यताको मिटिङको कारणले संघमा जान नसकेको हो,’ उनले भने ।
-1787143572.jpg)
