विश्वकप लिग-२ मा नेपाली टिमले हालसम्म हासिल गरेको नतिजा उत्साहप्रद नै भएता पनि सन्तोष मान्नुपर्ने अवस्था भइसकेको छैन । नेपालको अझै थुप्रै प्रतिस्पर्धा बाँकी छन् । आगामी विश्वकपजस्तो प्रतिष्ठित प्रतियोगितामा नेपालको प्रतिनिधित्व सुनिश्चित गराउन क्यानले विशेष योजनासहित अघि बढनुपर्ने देखिएको छ । नेपाली क्रिकेट खेलाडीहरुले लगातार घरेलु तथा अन्तर्राष्ट्रिय प्रतियोगिता खेल्दै आएता पनि तत्काल विश्राम पाउने अवस्था रहेको छैन । यसरी क्रिकेट खेलाडीहरुको अनवरत मिहेनत तथा व्यस्ततासँग मुलुकको प्रतिष्ठा पनि गाँसिएको छ ।
नेपाली पुरुष राष्ट्रिय क्रिकेट टिमले ‘टि-ट्वाण्टी’ विश्वकपमा सहभागी भएलगत्तै अर्को विश्वकपमा छनोटका लागि दाबेदारी प्रस्तुत गर्ने क्रम जारी राखेको छ । सन् २०२७ मा दक्षिण अफ्रिका, जिम्बाबे तथा नामेबियाको संयुक्त आयोजनामा आइसिसी पुरुष विश्वकप क्रिकेट प्रतियोगिताको १४औं संस्करण आयोजना हुँदै छ । सोही प्रतियोगितामा प्रवेशका लागि काठमाडौंमा भएको छनोट प्रतिस्पर्धामा नेपालले खेलका कूल चार खेलमध्ये तीन खेलमा विजय हासिल गर्दै विश्वकप सहभागिताको सम्भावनाको ढोका खोल्ने प्रयास गरेको हो । उक्त विश्वकप लिग-२ अन्तर्गत त्रिकोणात्मक शृंखलामा नेपालले हासिल गरेको नतिजालाई उत्साहजनक मानिएको छ ।
नेपाल, ओमान र संयुक्त अरब इमिरेटस (युएई) बीच भएको ५० ओभरको ओडिआई फम्र्याटको उक्त शृंखलामा नेपालले युएईलाई दुवै खेलमा हराएको थियो । त्यस्तै पहिलो खेलको पराजयको बदला लिँदै ओमानलाई विश्वकप लिग-२ को १०३औं खेलमा ८१ रनको विशाल अन्तरले पराजित गर्दै नेपालले शृंखलाको प्रतिस्पर्धा टुंग्याएको थियो । सन्तुलित प्रदर्शन नै नेपालको विजयको मुख्य कारण बन्न पुग्यो । नेपालको ब्याटिङको तुलनामा कसिलो बलिङ उल्लेखनीय थियो । त्यस्तै नेपाली टिमको फिल्डिङ पक्ष पनि प्रशंसायोग्य थियो । नेपाल टिमको मंगलबारको विजयमा आशिफ शेखको ९४ रन तथा गुलसन झाको पाँच विकेटको महत्वपूर्ण योगदान रहेको थियो । यसअघि काठमाडौंमै भएको अभ्यास खेलमा पनि ‘नेपाल ए’ टिमले ओमानको राष्ट्रिय टोलीलाई ११५ रनले हराएर मनोबल उच्च बनाएको थियो ।
विश्वकप लिग-२ मा सहभागी रहेका आठ टोलीमध्ये शीर्ष स्थानमा पुग्ने चार टोली विश्वकपमा छनोट हुने व्यवस्था रहेको छ । त्यसपछि परेका अन्य चार टिमले भने विश्वकप छनोटका लागि ‘प्ले-अफ’ प्रतियोगिता खेल्नुपर्ने छ । नेपालले विश्वकप छनोटका लागि हालसम्म खेलेका २४ खेलमध्ये आठ वटामा जितेर समूहको अंक तालिकामा सातौं स्थानमा रहेको छ । नेपालले १४ वटा खेलमा पराजय भोगिसकेको छ ।
नेपालको हालसम्म कूल अंक १८ रहेको छ । आठ मुलुकका टिमको उक्त समूहमा अमेरिका ३६ अंकसहित शीर्ष स्थानमा रहेको छ । त्यसपछि स्कटल्याण्ड ३४, ओमान ३१ र नेदरल्याण्डस् २६ अंकसहित शीर्ष चारमा रहेका छन् । नेपालले अंक तालिकामा तेस्रो स्थानमा रहेको टिम ओमानलाई पराजित गर्नु महत्वपूर्ण उपलब्धि मानिएको छ । नेपालले विश्वकप छनोटकै सिलसिलामा फेरि आफ्नै गृहमैदानमा दाबेदार रहेका अन्य दुई टिमसँग खेल्ने अवसर पाउने भएको छ । नेपालले यही वैशाख २९ गते र जेठ ४ गते काठमाडौंमा स्कटल्याण्डसँग प्रतिस्पर्धा गर्दै छ भने जेठ २ गते र ८ गते अमेरिकासँग खेल्ने कार्यक्रम रहेको छ । ती प्रतिस्पर्धा यसपटक सम्पन्न खेलहरुभन्दा केही कठिन हुने आँकलन गरिएको छ ।
आइसिसी पुरुष क्रिकेट विश्वकप लिग-२ एक दिवसीय अन्तर्राष्ट्रिय (ओडिआई) प्रतियोगिता हो, जसलाई आगामी सन् २०२७ मा आयोजना हुने विश्वकप क्रिकेट प्रतियोगितामा छनोटको दोस्रो तहको आधार मानिएको छ । उक्त प्रतियोगितामा इण्टरनेसनल क्रिकेट काउन्सिलका आठ एसोसिएट राष्ट्रका टिमहरुले विश्वकप छनोटका लागि प्रतिस्पर्धा गर्दै छन्, जसमा ती टिमले २४ त्रिदेशीय शृंखला खेलिरहेका छन् । यसअन्तर्गत प्रत्येक टोलीले ३६ वटा एक दिवसीय खेल खेल्नुपर्ने छ । सन् २०२६ भरि नै यी खेल हुने कार्यक्रम रहेकोले हाल सातौं स्थानमा रहेको नेपाल माथिल्लो स्थानमा उक्लन सक्ने सम्भावना अझै रहेको छ ।
दिपेन्द्रको दुःखेसो
विगत केही समयदेखि नेपाली क्रिकेट टिमका खेलहरु मुलुकभित्र वा मुलुकबाहिर भएको बखत पनि नेपाली दर्शकहरुको उपस्थिति उल्लेखनीयरुपमा हुँदै आइरहेको छ तर यसपालि कीर्तिपुरमा खेल हेर्न नेपाली दर्शकहरु उपस्थिति कमी भएकामा नेपाली टिमका उपकप्तान दिपेन्द्रसिंह ऐरीले गुनासो नै व्यक्त गरेका थिए । उपकप्तान ऐरीले विगतजस्तै यसपटक पनि सशक्त खेल प्रदर्शन गरेका थिए । उनले युएईविरुद्ध लिएको शतक यसपालिको उल्लेखनीय उपलब्धि मान्न सकिन्छ । यसअघि अमेरिका, भारतलगायतका मुलुकमा नेपाली टिमको खेल हुँदा नेपाली दर्शकहरुको उपस्थिति अन्तर्राष्ट्रियस्तरमै चर्चित हुन पुगेको थियो । तर यसपालि फ्लड लाइटको प्रकाशमा सञ्चालन गरिएको खेलमासमेत दर्शकहरुको उपस्थितिमा कमी आएपछि उपकप्तान ऐरी खुसी देखिएनन् ।
नेपाली टिमका खेलाडीहरुले यसपालि खेल हेर्न बढी दर्शकहरु आउने अपेक्षा गरेका थिए । धेरै दर्शक रंगशाला आएमा खेलाडीहरुलाई हौसला मिल्ने उपकप्तान ऐरीको धारणा रहेको छ । नेपालको धेरैजसो प्रतिस्पर्धा युएई, ओमानजस्ता मुलुकहरुसँग भएकाले पनि यसपटक दर्शकहरु घटेको अनुमान गरिएको छ । यस्तै नेपाली खेलाडीहरुको प्रदर्शन अपेक्षा गरिएजस्तो नहुनुजस्ता कारणले पनि दर्शकहरुको उपस्थितिमा कमी आएको हो । हरेक क्रिकेट प्रतियोगिता काठमाडौंमै केन्द्रित नरहेर उपत्यकाबाहिरसमेत आयोजना गर्न सकिएमा दर्शक संख्या बढाउन सकिने सम्भावनालाई पनि नकार्न सकिँदैन ।
सन्दिपको सफलता
ओमानविरुद्धको अन्तिम खेलमा अन्तिम विकेट लिन सफल नेपाली लेगस्पिनर सन्दिप लामिछानेले यसपालि सबैजसो खेलमा विकेट लिएर आफ्नो खेल कौशल प्रदर्शन गरेका थिए । विश्वस्तरीय क्रिकेटमै आफ्नो पहिचान बनाउन सफल लामिछाने क्रिकेट खेलाडीहरुको विश्व वरीयताक्रममा छलाङ मार्नसमेत सफल भएका छन् । उनले ‘टि-ट्वाण्टी’ अन्तर्राष्ट्रियमा २५औं स्थान तथा एकदिवसीय अन्तर्राष्ट्रियमा तीन स्थान सुधार गरेका छन् । उनी ‘टि-ट्वाण्टी’ आईको बलिङ वरीयतामा ५३औं स्थानमा उक्लिन सफल भएका छन् भने ओडिआई वरीयतामा ५८औं स्थानमा पुगेका छन् । उनको नाममा अर्को नयाँ कीर्तिमान कायम हुनु मुलुककै क्रिकेट इतिहासमा थप उपलब्धि मान्न सकिन्छ । उनले विश्वकप लिग-२ अन्तर्गत १०० विकेट लिएर पहिलो बलर बन्ने सौभाग्य प्राप्त गरेका छन् ।
उनले विश्वकप लिग-२ मा शतक कटाउने पहिलो बलर बनेर इतिहास रचेका छन् । अन्तर्राष्ट्रिय एक दिवसीय क्रिकेटमा कम खेलमै धेरै विकेट लिने नेपाली बलरहरुमा उनी अग्रणी खेलाडी हुन् । अन्तर्राष्ट्रिय फ्रेञ्चाइज क्रिकेटमार्फत नेपाललाई विश्व क्रिकेटमा चिनाउने लामिछाने इण्डियन प्रिमियर लिगमा खेल्ने पहिलो नेपाली खेलाडी हुन् । विभिन्न अन्तर्राष्ट्रिय ‘टि-ट्वाण्टी’ लिगहरुमा उनले व्यावसायिक खेलाडीका रुपमा खेलिसकेका छन् । यसपालिको प्रतियोगितामा लयमा देखिएका लामिछानेले नयाँ कीर्तिमान कायम गरेपछि सामाजिक सञ्जालमा सबै क्रिकेटप्रेमीहरुप्रति आभार प्रकट गर्दै आफू भविष्यमा नेपाल र नेपाली जनताहरुलाई गौरवान्वित बनाउन प्रयासरत रहने धारणा व्यक्त गरेका थिए ।
पाका खेलाडीको पुनरागमन
यसपालि नेपालका मुख्य प्रशिक्षक स्टुवार्ट लले पुराना अनुभवी खेलाडीलाईसमेत पुन टिममा भित्र्याएर राम्रो मूल्यांकन गरेका छन् । आवश्यकताअनुसार बेलाबेलामा खेलाडीहरुको फेरबदल गर्नाले टिमलाई मजबुत बनाउन सहयोग पुग्न जाने छ । नेपाली राष्ट्रिय टिममा सबैभन्दा पाका खेलाडी बनेर विनोद भण्डारीको पुनरागमन हुनु प्रशिक्षकको उचित मूल्यांकन मान्न सकिन्छ । खेलाडी भण्डारीको ३६ वर्षको उमेर नेपाली राष्ट्रिय टिममा पुनरागमन भएको हो । उनले नेपालको तर्फबाट विभिन्न अन्तर्राष्ट्रिय प्रतिस्पर्धामा आफ्नो सहभागिता जनाइसकेका छन् । पछिल्लोपटक दुई वर्षअघि राष्ट्रिय टिमबाट खेलेका उनले घरेलु प्रतियोगिताहरुमा भने निरन्तरता दिइरहेका थिए ।
अर्जुनको डेब्यु
नेपाली टिममा लामो समयदेखि सीमित खेलाडीहरुको बर्चस्व भएको आरोप खेप्दै आइरहेको नेपाल क्रिकेट संघ क्यानले आइसिसी विश्वकप लिग-२ को सिलसिलामा भरपर्दा खेलाडीका रुपमा स्थापित हुनसक्ने सम्भावना भएका अर्जुन कुमाललाई डेब्यु गराएको छ । २० वर्षीय ब्याट्सम्यान कुमाललाई युएईविरुद्धको खेलमा कप्तान रोहित पौडेलले डेब्यु क्याप दिएर राष्ट्रिय टिममा स्वागत गरेका थिए । हालै पिएम कम क्रिकेट प्रतियोगितामा सर्वाधिक ५०४ रन बनाएर उनले आफ्नो खेल क्षमता प्रदर्शन गरेका थिए । उनले यसअघि यु-१९ राष्ट्रिय टिमबाट मुलुकका लागि अन्तर्राष्ट्रिय प्रतिस्पर्धा गरिसकेका थिए । ओमानविरुद्धको खेलमा खेलाडी कुमारले दोस्रो विकेटका लागि आशिफ शेखसँग गरेको १२३ रनको साझेदारी महत्वपूर्ण रह्यो ।
रंगशाला सुरक्षित
कीर्तिपुरस्थित क्रिकेट रंगशाला नवीकरण होला कि नहोला भनेर क्रिकेटप्रेमीहरु अन्योलमा रहिरहेको बेला त्रिभुवन विश्वविद्यालयले क्यानलाई क्रिकेट रंगशालाको जग्गा ३५ दिनभित्र खाली गरिदिन पठाएको पत्रले झन चिन्ता थपेको थियो । तर अब खेलकुद मन्त्रालयकोसमेत कार्यभार सम्हालेका नेपाल सरकारका प्रवक्ता सस्मित पोखरेलले कीर्तिपुर क्रिकेट मैदान नभत्काइने जानकारी दिएपछि अन्योल समाप्त भएको छ । त्रिभुवन विश्वविद्यालय र क्रिकेट संघ (क्यान)बीच नयाँ सम्झौता गरिने भएको छ । गत वर्षमात्र पुनर्निर्माण गरिएको कीर्तिपुर रंगशालामा करिब १० हजार दर्शक बस्नका लागि सिटको व्यवस्था गरिनुका साथै राति पनि खेल सञ्चालनका लागि पहिलोपटक फ्लड लाइट जडान गरिएपछि राष्ट्रिय तथा अन्तर्राष्ट्रिय प्रतियोगिता हुँदै आइरहेका छन् ।
महिला टिम पनि पछ्याउँदै
नेपालमा पुरुष क्रिकेट टिमको व्यस्तता र सफलतालाई महिला टिमले पनि पछ्याइरहेका छन् । पछिल्लोपटक रुवाण्डामा सम्पन्न ‘आइसिसी ओमन्स टि-ट्वाण्टी’ अन्तर्राष्ट्रिय प्रतियोगितामा नेपाली टिम दोस्रो भएर आफ्नो सक्षमता प्रमाणित गरेको छ । अन्तिम खेलमा नेपालले इटलीलाई आठ विकेटको विशाल अन्तरले पराजित गरेको थियो । नेपालले यसअघि पनि इटलीलाई हराएको थियो । नेपाली महिला टिमको अर्को महत्वपूर्ण सफलता भनेको रुवाण्डालाई उनीहरुकै गृहमैदानमा दुईपटक हराउन सफल भएको थियो । प्रतियोगिताको उपाधि विजेता अमेरिकासँग नेपाल दुवै खेलमा हारेको थियो । नेपाल भानुआटुसँग एक खेलमा हारेको थियो भने एक खेलमा पराजित गर्न सफल भएको थियो ।
अन्त्यमा,
विश्वकप लिग-२ मा नेपाली टिमले हालसम्म हासिल गरेको नतिजा उत्साहप्रद नै भएता पनि सन्तोष मान्नुपर्ने अवस्था भइसकेको छैन । नेपालको अझै थुप्रै प्रतिस्पर्धा बाँकी छन् । आगामी विश्वकपजस्तो प्रतिष्ठित प्रतियोगितामा नेपालको प्रतिनिधित्व सुनिश्चित गराउन क्यानले विशेष योजनासहित अघि बढनुपर्ने देखिएको छ । नेपाली क्रिकेट खेलाडीहरुले लगातार घरेलु तथा अन्तर्राष्ट्रिय प्रतियोगिता खेल्दै आएता पनि तत्काल विश्राम पाउने अवस्था रहेको छैन । यसरी क्रिकेट खेलाडीहरुको अनवरत मिहेनत तथा व्यस्ततासँग मुलुकको प्रतिष्ठा पनि गाँसिएको छ ।
मुलुकको प्रतिनिधित्व गर्दै यी खेलाडीहरुले विभिन्न प्रतियोगितामा जितेका उपाधिहरुबापत सरकारले प्रतिबद्धता व्यक्त गरेअनुसारको आर्थिक पुरस्कार समयमै उपलब्ध गराउन प्राथमिकता दिनुपर्दछ । नेपालबाट खेलाडीहरु बर्सेनि विदेशमा पलायन भइरहेको वर्तमान अवस्थामा सरकारले मुलुकमा खेलेर पनि बाँच्न सकिने अवस्था सुनिश्चित गर्ने यथोचित् कार्यक्रम ल्याउन अब ढिलो गर्न नहुने महसुस गरिएको छ ।
नेपालमा अहिले विगतको तुलनामा क्रिकेटमा अहिले लगानी बढिरहेको छ । संघदेखि स्थानीय तहसम्म क्रिकेटमा गतिविधि बढ्दै गएकाले यस्तो वातावरण बन्दै गएको मान्न सकिन्छ । क्रिकेटप्रति बढ्दै गएको आकर्षणलाई अझ व्यवस्थित गर्न नेपाल क्रिकेट संघलगायत विभिन्न तहका पदाधिकारीहरु लागिपर्नुपर्ने हुन्छ । नेपालमा यस वर्ष पनि थुप्रै विभिन्न घरेलु क्रिकेट प्रतियोगिता आयोजना हुँदै छ । यसैक्रममा नेपालमा व्यावसायिक खेलकुद प्रतियोगितामध्ये सबैभन्दा सफल मानिएको नेपाल प्रिमियर लिगको सिजन-३ को घोषणा छिट्टै गरिने भएको छ । व्यावसायिक क्रिकेटको विकासका लागि नै आगामी जेठ ९ गतेदेखि सुनसरीमा कोशी प्राइड लिग क्रिकेट प्रतियोगिता सुरु हुँदै छ ।
खेलाडीहरुको स्तर निर्धारण गरी पारिश्रमिक दिइने उक्त प्रतियोगिताको तेस्रो संस्करण निजी क्षेत्रको सक्रियतामा हुन लागेको हो । यसमा सहभागी प्रत्येक टिमले राष्ट्रिय टिमबाट तीन खेलाडीलाई खेलाउन पाउने नियम रहेको छ । नेपाल क्रिकेट संघको यही वैशाख २७ र २८ गते विराटनगरमा आयोजना हुने वार्षिक साधारणसभाले सन् २०२६ को वार्षिक कार्ययोजना तथा बजेट पारित गर्दै छ । नेपालको क्रिकेटलाई समयोचित विकास गर्नका लागि स्कूलदेखि नै प्रशिक्षण सञ्चालन गर्नु जरुरी भइसकेको छ ।
