- गत साउनदेखि फागुनसम्मको अवधिमा विप्रेषण आप्रवाह ३७.७ प्रतिशतले वृद्धि भइ १४ खर्ब ४९ अर्ब ६५ करोड पुगेको छ
- फागुनमा मात्र एक खर्ब ८८ अर्ब ६४ करोड विप्रेषण भित्रिएको छ । अघिल्लो आर्थिक वर्षको सोही महिनामा एक खर्ब ५१ अर्ब १९ करोड विप्रेषण प्राप्त भएको थियो
- गत फागुन १६ गतेबाट सुरु भएको अमेरिका-इजरायल र इरानबिचको द्वन्द्वका कारण खाडी मुलुकको वैदेशिक रोजगारी बन्द भएको छ
काठमाडौं- फागुन महिनासम्मको विप्रेषण (रेमिट्यान्स) आप्रवाहमा खाडीमा जारी युद्धको असर नपरेको पाइएको छ । हाल खाडीको रोजगारी बन्द हुँदा रेमिट्यान्स घट्ने आँकलन गरिए पनि नेपाल राष्ट्र बैंकले बिहीवार सार्वजनिक गरेको देशको वर्तमान आर्थिक तथा वित्तिय स्थितिले मुलुक भित्रने रकममा प्रभाव नपारेको देखाएको छ ।
राष्ट्र बैंकको प्रतिवेदनका अनुसार चालु आर्थिक वर्ष २०८२/८३को आठ महिनामा १४ खर्बभन्दा बढी रेमिट्यान्स भित्रिएको हो । गत साउनदेखि फागुनसम्मको अवधिमा विप्रेषण आप्रवाह ३७.७ प्रतिशतले वृद्धि भइ १४ खर्ब ४९ अर्ब ६५ करोड पुगेको छ । अघिल्लो आर्थिक वर्षको सोही अवधिमा विप्रेषण आप्रवाह ९.५ प्रतिशतले बढेको थियो । फागुनमा मात्र एक खर्ब ८८ अर्ब ६४ करोड विप्रेषण भित्रिएको छ । अघिल्लो आर्थिक वर्षको सोही महिनामा एक खर्ब ५१ अर्ब १९ करोड विप्रेषण प्राप्त भएको थियो । गत फागुन १६ गतेबाट सुरु भएको अमेरिका–इजरायल र इरानबिचको द्वन्द्वका कारण खाडी मुलुकको वैदेशिक रोजगारी बन्द भएको छ । खाडीमा कार्यरतमध्ये कतिपयले रोजगारी गुमाएको, बेतलवी बिदामा बसेको, मूल्यबृद्धिका कारण दैनिक खर्च बढेकाजस्ता समस्या झेलीरहेको खबरहरु आएका छन् । श्रमिकको रोजगारी प्रभावित हुँदा मुलुकको विप्रेषण आप्रवाह घट्ने बताइए पनि गत महिनासम्म विप्रेषणमा कमी आएको छैन ।
यो आठ महिनामा दुई लाख ७३ हजार ५३६ जना संस्थागत र व्यक्तिगत रुपमा श्रम स्वीकृति लिएर पहिलोचोटि रोजगारीमा गएका छन् । त्यस्तै, श्रम स्वीकृति नवीकरण गरेर दुई लाख ५१ हजार ९८५ जना गएका छन् । यस अवधिमा कुल पाँच लाख २५ हजार ५२१ जना रोजगारीमा गएको देखिन्छ । जुन अघिल्लो आर्थिक वर्षको यसै अवधिको तुलनामा केही कम हो । अघिल्लो वर्षको फागुनमा पहिलोपटक तीन लाख १७ हजार ६८ र श्रम स्वीकृति नवीकरण गरेर दुई लाख १७ हजार ४०३ जना गरी कुल पाँच लाख ३४ हजार ४७१ जना गएका थिए । यस आर्थिक वर्षमा तीन महिनाभन्दा धेरै प्रमुख रोजगार गन्तव्य संयुक्त अरब इमिरेट्स (यूएई)को रोजगारी बन्द हुनु र गत फागुनबाट सुरु भएको युद्धका कारण रोजगारीमा जानेहरुको संख्यामा केही कमी आएको देखिन्छ ।
समीक्षा अवधिमा अमेरिकी डलरमा विप्रेषण आप्रवाह ३१.० प्रतिशतले वृद्धि भइ १० खर्ब १५ करोड पुगेको छ । अघिल्लो वर्ष यस्तो आप्रवाह ७.१ प्रतिशतले बढेको थियो । चालु आर्थिक वर्षको साउनमा एक खर्ब ७७ अर्ब ४१ करोड, भदौमा एक खर्ब ७४ अर्ब ६७ करोड, असोजमा दुई खर्ब एक अर्ब २२ करोड, कात्तिक एक खर्ब ३३ अर्ब ८२ करोड, मंसिरमा एक खर्ब ८३ अर्ब १८ करोड, पुसमा एक खर्ब ९२ अर्ब ६२ करोड र माघमा एक खर्ब ९८ अर्ब आठ करोड रेमिट्यान्स भित्रिएको छ । यस आर्थिक वर्षमा सबैभन्दा धेरै असोज र सबैभन्दा कम कात्तिकमा रेमट्यान्स आएको छ ।
राष्ट्र बैंकको प्रतिवेदनमा वैधानिक माध्यमबाट आएको रकम मात्र समावेश हुन्छ । पछिल्लो समय रोजगारीमा जानेहरुका साथै विदेशमै लामो समयसम्म बस्नेकोे संख्या बढ्नु, वैधानिक माध्यमबाट पैसा पठाउने प्रवृत्तिमा सुधार, सीपयुक्त भएर जानेहरु बढ्नु, वित्तिय साक्षेरताजस्ता कारणले केही वर्ष अघिको तुलनामा विपे्रषण आप्रवाह बढेको पाइन्छ ।
