काठमाडौं– कोरोना संक्रमित बढ्दै गएपछि उपत्यका लकडाउन गर्ने काठमाडौं जिल्ला प्रशासनले निर्णय गरेको छ । आज मध्यराती १२ बजेदेखि उपत्यकाका तीनै जिल्लामा निषेधाज्ञा लागू हुने भएको हो । निषेधाज्ञामा अत्यावश्यकबाहेक सेवा सञ्चालन नहुने भएकाले एक प्रकारको लकडाउन नै हो ।
उपत्यका तीनै जिल्लाका प्रमुख जिल्ला अधिकारी र सुरक्षा प्रमुखहरूको बैठकले १० भदौसम्म निषेधाज्ञामा जाने निर्णय गरेको हो । जिल्ला प्रशासन कार्यालय काठमाडौंमा बसेको बैठकले निषेधाज्ञा लागू गर्न गृह मन्त्रालयलाई सिफारिस बैठकमा सहभागी एक सुरक्षा अधिकारीले जानकारी दिए ।
उपत्यकामा कोरोना संक्रमण दिन प्रतिदिन बढ्दै गएपछि एक साताका लागि निषेधाज्ञा लागू गर्न लागिएको हो ।
सरकारले निषेधाज्ञा लागू गर्ने अधिकार प्रमुख जिल्ला अधिकारीलाई दिएपनि केन्द्रीय राजधानी भएकाले गृह मन्त्रालयको स्वीकृतिमा निषेधाज्ञा लागू गर्न लागिएको हो । निषेधाज्ञामा अत्यावश्यक सेवाबाहेक अन्य व्यवसाय बन्द हुनेछन् । यातायात पनि अत्याबश्यकबाहेक पूर्ण रूपमा बन्द हुनेछ ।
नेपालमा मंगलबार कोभिड–१९ को संक्रमण अहिलेसम्म सबैभन्दा बढी फेला परेका छन् । स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले मंगलबार एकैदिन सबभन्दा बढी एक हजार १६ जनामा संक्रमित फेला परेको जानकारी दिए ।
संक्रमितमध्ये काठमाडौं उपत्यकाका २०५ जना रहेका छन् । विभिन्न ४० प्रयोगशालामा १३ हजार ४६१ जनाको गरिएको पिसीआर परीक्षणमा एक हजार १६ जनामा संक्रमण भएको पाइएको हो ।
यसअघि एकैदिन ७४१ जनामा संक्रमण देखिएको थियो ।
मंगलबार देखिएका सक्रमितसँगै नेपालमा २८ हजार २५७ जनामा संक्रमित पुगेका छन् । नेपालमा पहिलोपटक गत ९ माघमा चीनको वुहान शहरबाट आएका एक विद्यार्थीमा संक्रमण देखिएको थियो । उनका अनुसार सक्रिय संक्रमित १० हजार ५६३ जना रहेका छन् ।
यसैगरी मंगलबार ८५ जना संक्रमित जितेर घर फर्किएका छन् । अहिलेसम्म १७ हजार ५८० जना संक्रमित निको भई घर फर्किसकेको उनले बताए । अहिलेसम्म ६२.२ प्रतिशत संक्रमित निको भई घर फर्किसकेका छन् । मंगलबारसम्म पाँच लाख ४२ हजार ८६६ जनाको पिसीआर परीक्षण गरिएको मन्त्रालयले जनाएको छ । हाल मुलुकभरि क्वारेन्टिनमा १३ हजार ९३६ जना रहेका छन् ।
यस्तै, पछिल्लो समय नेपालमा कोरोनाबाट मृत्यु हुनेको संख्या समेत बढ्दै गएको छ । मन्त्रालयका प्रवक्ता डा. गौतमले पछिल्लो २४ घण्टामा संक्रमणबाट ७ जनाको मृत्यु भएको जानकारी दिए । उनका अनुसार काभ्रे, नवलपरासी, कास्की, मोरङ, धनुषा र बाँकेका एक÷एक जना पुरुष तथा तनहँुका एक जना महिलाको संक्रमणको कारण मृत्यु भएको छ । अहिलेसम्म ११४ जनाको कोरोनाबाट मृत्यु भएका छन् ।
-1745656903.jpeg)