काटमाडाैं- नयाँ प्रधानमन्त्रीको शपथ १३ चैतमा हुने भएकाे हाे । निर्वाचन आयोगले बिहीबार राष्ट्रपतिसमक्ष मतपरिणामकाे प्रतिवेदन पेस गरेसँगै रास्वपाका शीर्ष नेताहरू छलफलमा जुटेका थिए । छलफलमा १३ चैतमा वरिष्ठ नेता बालेन्द्र शाहलाई प्रधानमन्त्री नियुक्ति र शपथ गर्नेगरी सहमति गरेका हुन् ।
राष्ट्रिय स्वतन्त्र पार्टी (रास्वपा) ले नयाँ सरकार गठनको प्रक्रिया थालेकाे छ । शीर्ष नेताहरू बालेन्द्र शाहको नेतृत्वमा नयाँ सरकार गठनको छलफलमा जुटेका छन् । बिहीबार बेलुका रास्वपाका सभापति रवि लामिछाने, वरिष्ठ नेता शाह तथा उपसभापतिद्वय डीपी अर्याल र स्वर्णिम वाग्लेबीचको छलफलले १३ चैतमा नयाँ प्रधानमन्त्री नियुक्ति गर्ने विषयमा सहमित जनाएका हुन् ।
१३ गते नै मन्त्रिपरिषद् पनि गठन गर्नेगरी छलफल भए पनि आकार र व्यक्तिबारे भने टुंगो लाग्न बाँकी रहेकाे एक नेताले बताए । रास्वपाले विधान संशोधन गरेर बालेनलाई संसदीय दलको नेता बनाउने बाटो खोल्ने तयारी गरेको छ । चुनाव अघि रास्वपाले बालेनलाई संसदीय दलको नेता र भावी प्रधानमन्त्रीको उम्मेदवार बनाउने घोषणा गरेको थियो । शाहकै नेतृत्वमा सरकार गठनको तयारी भइरहेकाे छ ।
एकल बहुमत प्राप्त गरेपछि रास्वपाले एकल सरकार बनाउँदैछ । सरकारमा सहभागी हुने अर्थ, गृहसहितका प्रभावशाली मन्त्रालयमा कसलाई पठाउने भन्नेमा शीर्ष नेताहरू छलफलमा जुटेका हुन् । अर्थमा वाग्ले र गृहमा अर्यालकाे नाम चर्चामा छ । यस्तै परराष्ट्रमा शिशिर खनालकाे नाम चर्चामा रहेकाे छ ।
