पोखरा- पोखरामा २१ औँ संस्करणको खुल्ला नेपाल प्याराग्लाइडिङ च्याम्पियनसिप बुधबारदेखि सुरु भएको छ । नेपाल हवाई खेलकुद संस्था (ना) को आयोजनामा जोखिमयुक्त साे खेल प्रतियोगिता शनिबारसम्म चल्नेछ ।
प्रतियोगिताको उद्घाटन गर्दै पोखरा महानगरपालिकाका प्रमुख धनराज आचार्यदले पोखराको पर्यटनमा प्याराग्लाइडिङ मेरुदण्डका रूपमा रहेको बताए । अन्तर्राष्ट्रिय विमानस्थल सञ्चालनमा आएसँगै प्याराग्लाइडिङ विस्थापित हुने जोखिम बढे पनि यसलाई निरन्तरता दिन विभिन्न प्रयास भइरहेको उनको भनाई थियो ।
संकटनमा परेको प्याराग्लाईडिङ व्यवसायलाई पुनः सञ्चालन गर्न विभिन्न चरणमा छलफल भइरहेको जानकारी दिदैँ उनले थप व्यवस्थित बनाउन र सुरक्षा पक्षमा विशेष ध्यान दिँदै पर्यटकलाई गुणस्तरीय सेवा दिन व्यवसायीहरूलाई आग्रह गरे । पोखराको परिचय साहसिक पर्यटकीय क्षेत्रका रूपमा रहेकाले यसको गरिमा जोगाउन उनले अपिल समेत गरे ।
यसपटकको प्रतियोगिता एक्युरेसी विधामा मात्र केन्द्रित छ । प्रतियोगितामा नेपालसहित भारत, चीन, साउदी अरेबिया, उज्बेकिस्तान, इटाली र लेबनान गरी ७ देशका प्याराग्लाइडिङ पाइलटहरूले प्रतिस्पर्धा गरिरहेका छन् । सहभागी कुल ९० पाइलटमध्ये १४ जना महिला छन् ।
सहभागी खेलाडीहरूले सराङकोटबाट उडान भरेर फेवाताल किनारमा रहेको खपौडीमा अवतरण गर्ने तालिका रहेकाे छ ।प्रतियोगितामा उत्कृष्ट हुनेहरूका लागि आकर्षक पुरस्कारको व्यवस्था गरिएको छ । व्यक्तिगत तर्फ पुरुष विजेताले १ लाख ५० हजार रुपैयाँ पाउनेछन् भने दोस्रो हुनेले १ लाख र तेस्रो हुनेले ५० हजार रुपैयाँसहित मेडल र प्रमाणपत्र प्राप्त गर्नेछन् । महिला तर्फको प्रतिस्पर्धामा प्रथम हुनेले ७५ हजार, दोस्रो हुनेले ५० हजार र तेस्रो हुनेले २५ हजार रुपैयाँ पुरस्कार पाउनेछन् ।
यसैगरी, सामूहिक प्रतिस्पर्धामा (टिम इभेन्ट) पहिलो हुने टोलीलाई ७५ हजार, दोस्रो हुनेलाई ५० हजार र तेस्रो हुनेलाई २५ हजार रुपैयाँ पुरस्कार प्रदान गरिने आयोजकले जनाएको छ ।
