दोहा– सरकारले १ भदौदेखि अन्तर्राष्ट्रिय हवाइ उडान सुचारु गर्ने निर्णय गरेसँगै खुसी भएका आप्रबासी नेपालीहरू सरकार त्यो निर्णयलाई पनि परिमार्जन गर्दै १६ भदौपछि मात्र अन्तर्राष्ट्रिय हवाइ सुचारु गर्ने जनाएपछि प्रायजसो खाडी मुलुकमा काम गर्ने तथा लामो समयदेखि कामविहीन भएर बसेका नेपालीहरू सरकारप्रति आक्रोशित भएका छन् ।
केही वर्षदेखि युएईमा कार्यरत काभ्रेका जयराम नेपाल भन्छन्, ‘कोरोनाका कारण कम्पनीले कामदार कटौती गरेपछि पाँच महिनादेखि स्वदेश फर्कने तयारीमा बसेको छु, तर सरकारले उडानको मिति सारेपछि घर फर्कने आसै मर्न थालेको छ ।’ आक्रोशित हुँदै अगाडि भने, ‘ठूलाहरूकै मात्र राज्य रहेछ । देशमा रोजगार नभएर लाख खर्च गरेर हजार कमाउन खाडी पसेका नेपालीको समस्या कहाँ देख्यो सरकारले ? आङ्खना बालबच्चा सन्तानसँगै भएपछि अरुको के मतलब सरकारलाई ?’
उनले भने, ‘कोरोनाबाट जोगिएर के फाइदा जब कोरोनाकै कारण अर्काको देशमा भोकभोकै सडकमा पुग्नुपर्ने अवस्था आउँछ भने । भोलिदेखि नै एयरपोर्ट खुलाउन आन्दोलन हुन्छ भने म मेरो सबै परिवारलाई सडकमा आन्दोलन गर्न जाऊ, भनिदिन्छु ।’
सरकारले दैनिक ५ सय जनाको कोटा तोकेर नेपालीलाई उद्दार गर्ने भनेपछि युएईमै कामविहीन भएर स्वदेश फर्किने पर्खाइमा रहेका हाङ राई भन्छन्, ‘कोटा तोकेर उद्धार गर्नुभन्दा विमानस्थल नै बन्द गरिदिए हुन्छ ।
६ महिनादेखि खाइ न पाइ अर्काको देशमा दुःख पाएर बसेको छु । मानसिक तनावले आफैँलाई सम्हाल्न गाह्रो भएको छ । देशले केही सहयोग गर्ला कि भन्ने आसा छ । सरकार भने कानमा तेल हालेर बस्छ ।’
यस्तै अर्का युवा अर्जुन बोहोरा भन्छन्, ‘युएईबाट मात्र स्वदेश फर्कने नेपालीको संख्या ४२ हजारभन्दा बढी छ अहिलेसम्म बल्ल बल्ल करिब १४ हजार जना मात्र फर्किएका छन् ।’
उनीहरूका अनुसार युएई सरकारले ओभर स्टे भन्दै धमधम जरिवाना लगाइरहेको छ ।
महँगो टिकट काटेर फर्किन्छु भन्दा पनि टिकट पाइँदैन । अन्य देशका सम्पूर्ण साथहरू आङ्खनो मुलुक फर्किसके रेमिट्यान्सले देशको अर्थतन्त्र धानेको हाम्रो सरकार वास्तै गर्दैन अब आन्दोलन गर्नबाहेक अर्को विकल्प नभएको उनीहरू बताउँछन् ।
उनीहरूले सरकारले चार्टर्ड उडानको नाममा ४ गुणा महँगो टिकट बेचेर नियमित उडान खुलाउन नचाहेको आरोप लगाएका छन् । चार्टर्ड उडानमार्फत अधिकांस पैसा हुने तथा कम्पनीले टिकट दिएकाहरू फर्किए पनि वास्तविक पीडित अझै खाडीमै स्वदेश फर्किने दिन गरेर प्रतिक्षा गरिरहेका छन् ।
