काठमाडौं– वैदेशिक रोजगार बोर्डका कार्यकारी निर्देशक राजनप्रसाद श्रेष्ठले ११ चैतबाट लकडाउन सुरु भएदेखि हालसम्म वैदेशिक रोजगार कल्याणकारी कोषको ८० लाख रुपैयाँ खर्च भएको बताएका छन् । बुधबार प्रभाव दैनिकसँगको कुराकानीमा मलेसिया र खाडी मुलुक बहराइन, साउदी र युएईका दूताबासलाई कोरोना भाइरस (कोभिड–१९) का कारण अलपत्र नेपाली श्रमिकको खाना र बासको व्यवस्थाका लागि उक्त रकम पठाइएको उनले बताए ।
उनले भने, ‘११ चैतदेखि लकडाउन सुरु भएदेखि यता कोषको ८० लाख खर्च भएको छ । जुन खर्च कोभिड–१९ कारण विदेशमा अलपत्र परेका नेपाली श्रमिकको खाना र बस्ने व्यवस्था गर्न विदेशीस्थित नेपाली नियोगहरुलाई पठाइएको हो ।’
विदेशस्थित राजदूताबासमार्फत कोभिड–१९ कारण अलपत्र नेपाली श्रमिकको खाना र बस्नका लागि भनेर पत्र आएसँगै लकडाउन अवधिभर चार देशका लागि भनेर रकमान्तर गरेको उनले बताएका छन् । उनका अनुसार कुन देशमा कति रकम पठाइयो भन्ने बारेमा ठ्याक्कै जानकार नरहेपनि केही दिनपछि प्रकाशन हुने वार्षिक प्रतिवेदनभित्र सबै समेटिनेछ । अलपत्र नेपालीका लागि पठाइएको उक्त ८० लाख रकम परराष्ट्र मन्त्रालयमार्फत नियोगलाई पठाइएको बताएका छन् । ‘नियोगमार्फत आधिकारीक पत्र आएसँगै परराष्ट्र मन्त्रालयले बोर्डलाई रकमान्तर गर्न सिफारिस गर्न माग गरेसँगै हामीले उक्त रकम पठाएका हौँ ।’
वैदेशिक रोजगार ऐन, ०६४ को दफा ७५ को २ मा श्रम स्विकृति लिएर वैदेशिक रोजगारीका क्रममा अलपत्र परेका नेपालीलाई फर्कन चाहेको खण्डमा सहयोग गर्नु भन्ने छ । यहीँ ऐनबमोजिम बोर्डले कोषको रकम अलपत्र नेपालीलाई खर्च गरेको कार्यकारी निर्देशक श्रेष्ठले बताए ।
कोषको ८० लाख रकमले कति नेपालीको उद्धार भयो भन्ने प्रश्नमा नियोगमार्फत पूर्ण विवरण आइनसकेको उनले बताएका छन् । कोषबाट पठाइएको उक्त रकमले केही नेपाली श्रमिकलाई फर्काइएको र अधिकांशलाई घर फिर्ती सेन्टरमा राखेर खाना, बस्नमा खर्च गरिएको उनले बताए । उनका अनुसार बोर्डले पठाइएको रकम के के शिर्षकमा खर्च भयो भन्ने सन्दर्भमा नियोगहरुस“ग ताकेता भइरहेको छ ।
उनले भने, ‘कोषमार्फत पठाइएको ८० लाख के के शिर्षकमा र कति नेपाली श्रमिकका लागि खर्च भयो भनेर नियोगसँग यकिन विवरण माग गरेका छाँ“ । नियोगले अब केही दिनमा उक्त समग्र विवरण पठाउने जनाएको छ ।’
आर्थिक वर्ष समाप्त भए पनि अझै अलपत्र परेर फर्कने चाहने नेपाली श्रमिकको उद्धार कोषबाटै गर्नुपर्ने भएकाले उक्त रकम पनि यसै आर्थिक वर्षभित्र समावेश गर्नुपर्नेजस्तो स्थिति सिर्जना भएको पनि उनले बताएका छन् । यद्यपि, कोषको रकमान्तर अझै हुन बाँकी रहेकाले यस विषयमा यकिन निर्णय हुन केही दिन समय लाग्ने उनले बताए ।
यसै सन्दर्भमा यस आर्थिक वर्षभित्र कोषको कति रकम खर्च भयो भन्ने प्रश्नमा करिब १५ दिनपछि प्रकाशन हुने वार्षिक प्रतिवेदनमा सबै विवरण राखिने उनले बताएका छन् । उनले भने, ‘यस आर्थिक वर्षभित्र कोषबाट कति रकम खर्च भयो भनेर अझै पूरा विवरण आउन बा“की रहेकाले अझै लगभग १५ दिन कुर्नै पर्ने हुन्छ । १५ दिनपछि बोर्डले आफ्नो वार्षिक प्रतिवेदन प्रकाशन गर्ने तयारीमा छ ।’
-1745656903.jpeg)