- साउदी, कतार, मलेसियालगायत मुलुकले भिसामा कडाइ गरेको भन्ने हल्लामात्र
- युएईले भिसा रोके पनि औपचारिक जानकारी दिएको छैन
- श्रमिक रोक्ने हल्लाबारे परराष्ट्र मन्त्रालयको चासो, सम्बन्धित मुलुकसँग बुझ्ने तयारी
काठमाडौं– संयुक्त अरब इमिरेट्स (युएई)ले नेपालीका लागि भिसा बन्द गरेसँगै अन्य मुलुकले पनि नेपालबाट श्रमिक लैजाने प्रक्रिया रोक्न थालेको भन्ने हल्लामा सत्यता नरहेको व्यवसायीहरुले बताएका छन् । युएईको काम रोकिए पनि अन्य मुलुकबाट भिसा आउने क्रम जारी रहेको उनीहरुले बताए ।
गत भदौ २३ र २४ गतेको जेन–जी आन्दोलनपछि (युएई)ले नेपालका लागि भिजिट र वर्किङ दुवै प्रकारका भिसा बन्द गरेको थियो । सेप्टेम्बर १५ बाट युएईले नेपालीहरुको प्रवेशमा कडाइ गर्दै भिसा रोेकेको हो । व्यवसायीहरुका अनुसार ७५ प्रतिशत प्रक्रिया सकिएकाहरुको मात्र भिसा आएको अवस्था छ ।
युएईले भिसा बन्दगरेसँगै साउदी अरेबिया, कतार, मलेसियालगायतका मुलुकले पनि कडाइ गरेको र श्रमिक लग्ने प्रक्रिया नै रोकिन सक्ने हल्ला फैलिएको थियो । यस्तो हल्ला निराधार भएको नेपाल वैदेशिक रोजगार व्यवसायी संघका अध्यक्षभुवनसिंह गुरुङले बताए । कुनै पनि मुलुकबाट श्रमिक नलग्ने भन्ने आधिकारिक जानकारी नआएको बताउँदै उनले भ्रमको पछि नलाग्न आग्रह गरे ।
‘युएईले आफ्नो आन्तरिक सुरक्षाका लागि भिसा रोकेको बुझिएको छ, तर अहिलेसम्म युएई सरकारले नेपाल सरकारलाई आधिकारिक जानकारी गराएको छैन,’ अध्यक्ष गुरुङले भने, ‘दूतावासबाट मन्त्रालय, मन्त्रालयबाट विभाग र विभागबाट हाम्रो संघमा जानकारी आउने हो । अहिलेसम्म त्यस्तो जानकारी आएको छैन तर युएईले भिसा दिएको स्थिति छैन । अरु मुलुकको हकमा कुनै समस्या छैन ।’
साउदीमा पनि कुनै समस्या नरहेको बुझिएको छ । केही दिनयता विभिन्न कारणले साउदीको दूतावास बन्द रहेको थियो । केही महिनायता विगतको तुलनामा साउदीले नेपाली श्रमिकलाई दिँदै आएको भिसाको संख्या पनि न्यून थियो । साउदीको भिसादर आधाले कम भएको व्यवसायीहरुले बताउँदै आएका थिए । तर जेन–जी आन्दोलनपछि उक्त विषयलाई साउदीले पनि युएईकै बाटो अपनाउन खोजेको भनेर हेर्न थालिएको थियो । साउदीको नेसनल डे, नेपालीहरुको घटस्थापनालगायतका सार्वजनिक बिदापछि बुधबार खुलेको दूतावासले ८०० को हाराहारीमा भिसा जारी गरिएको संघका तृतीय उपाध्यक्ष तथा साउदी संयोजक वैकुण्ठ पौडेलले जानकारी दिए ।
‘१२ सय हाराहारी भिसा ‘पेण्डिङ’मा रहेछ । आज सातदेखि ८०० भिसा दिएछ । साउदीले बन्द गर्ने कुनै कुरा भएको छैन,’ पौडेलले भने । साउदीले पारिवारिक र व्यावसायिक भ्रमणलगायतमा भने कडाइ गरिरहेको उनले बताए ।मलेसिया र कतारले पनि भिसा दिइरहेको व्यवसायीहरुले बताएका छन् । पछिल्लो समय मलेसियाले कम संख्यामा श्रमिक लग्न थालेकाले आन्दोलनसँग जोड्न नमिल्ने मलेसियामा कामदार पठाउँदै आएका व्यवसायीहरु बताउँछन् । कतारको हकमा विगतमा पनि प्रणालीमा समस्या हुँदा यस्तै सुस्त गतिमा भिसा जारी हुने गरेको बताइएको छ ।
श्रमिक लग्नै रोक्ने हल्ला आएपछि परराष्ट्र मन्त्रालयले यस विषयमा चासो देखाएको छ । यस विषयमा सम्बन्धित मुलुकसँग जानकारी लिने प्रक्रियामा रहेको मन्त्रालयका प्रवक्ता लोकबहादुर पौडेल क्षेत्रीले बताए । ‘विभिन्न हल्लाहरु आएको देखिन्छ । यस विषयमा हामीले सम्बन्धित मुलुकसँग बुझ्दैछौं,’ उनले भने ।
