काठमाडौं- नेकपा एमालेको जारी एघारौँ महाधिवेशनमा पाँचथरबाट तीन जना नेताले केन्द्रीय सदस्यमा प्रतिस्पर्धा गर्दैछन् । आदिवासी जनजाति क्लस्टरबाट अइन्द्रसुन्दर नेम्बाङ र आदिवासी जनजाति महिला क्लस्टरबाट भूमिका सुब्बा तथा आशारत्न जबेगु केन्द्रीय सदस्य पदका उम्मेदवार छन् ।
नेम्बाङ यसअघि पनि केन्द्रीय सदस्य थिए । उनी संविधानसभा सदस्यसमेत हुन् । अध्यक्ष केपी शर्मा ओली प्यानलबाट उनको केन्द्रीय सदस्यमा उम्मेदवारी छ । सुब्बा एमालेको राष्ट्रिय जनसांस्कृतिक महासंघकी अध्यक्ष हुन् । जनवादी कलाकार सुब्बा प्रभावशाली उम्मेदवार मानिन्छन् । उनी लामो समयदेखि एमाले राजनीतिमा क्रियाशील छिन् । सुब्बा पनि ओली प्यानलमै अँटिएकी छिन् । उनी पूर्वमन्त्री वसन्तकुमार नेम्बाङकी श्रीमती हुन् ।
जबेगु चाहिँ कोशी प्रदेशको पूर्वसांसद् हुन् । सांसदको रूपमा छँदा कानुन निर्माणमा उनले निर्वाह गरेको भूमिका प्रशंसायोग्य मानिन्छ । उनी पनि एमाले राजनीतिमा लामो समयदेखि क्रियाशील छिन् ।
पूर्वराज्यमन्त्री जबेगुको नाम कतै नदेखिएपछि
सर्वोच्च अदालतको फैसलापछि नेकपा एमाले र तत्कालीन नेकपा माओवादी (केन्द्र) मिलेर बनेको नेकपा विघटन हुँदा माओवादीबाट राज्यमन्त्री भइसकेका नेता श्रीप्रसाद जबेगु एमालेसँगै रहे । उनी प्रचण्डले नेतृत्व गरेको आफ्नै माओवादी पार्टीमा फर्किन मानेनन् ।
त्यसबेला जबेगुले आफूलाई प्रचण्डले अवसर नदिएको गुनासो गरे । उनै जबेगुलाई एमाले अध्यक्ष केपी शर्मा ओलीले १०औँ महाधिवेशनपछि केन्द्रीय सदस्य बनाए । यसपटक भने केन्द्रीय सदस्यमा समेटेनन् । २०७९ मा भएको प्रतिनिधिसभा निर्वाचन र प्रदेशसभा निर्वाचनमा कतै पनि प्रत्यक्षतर्फ उम्मेदवार हुन टिकट दिएनन् । यद्यपि, कोशी प्रदेश सांसदको लागि समानुपातिक सूचीको शीर्षस्थानमा नाम राखेको चर्चा चल्यो । तर, जबेगुले त्यसबेला पनि समानुपातिक सांसद बन्न पाएनन् ।
एकातिर प्रदेश सांसद हुन नपाएको र अर्कातिर पार्टी केन्द्रीय सदस्यमा पनि टिकट नपाएको प्रसङ्गलाई जोडेर प्रचण्ड नेतृत्वको नेपाली कम्युनिस्ट पार्टीका नेताहरूले जबेगुलाई हियाउन थालेका छन् । युवा नेता अशोक राईले सामाजिक सञ्जाल फेसबुकमा लेखेका छन्, ‘पाँचथरको श्रीप्रसाद जबेगु दाइको माया लागेर मरेँ म । के गर्नु ? ७९ को समानुपातिक पनि चिप्लियो, यो पटक त केन्द्रीय सदस्य पनि चिप्लियो भन्छ त !’ राई जबेगुका पूर्वकार्यकर्ता हुन् ।
जबेगु तत्कालीन माओवादीमा छँदा एकपटक राज्यमन्त्री र अर्कोपटक मन्त्रिपरिषद्मा प्रतिनिधित्व गर्न पाउनेगरी राज्यमन्त्री भएका थिए । २०७० को संविधानसभामा उनी समानुपातिक तर्फबाट माओवादी सभासद थिए । त्यसैबेला जबेगुले राजकीय पदमा पुग्ने अवसर पाएका थिए ।
