काठमाडौं– गैरआवासीय नेपाली संघ (एनआरएनए) का क्षेत्रीय संयोजकहरुले सरकारलाई विदेशमा रहेका नेपालीको उद्धार चाँडो गर्न आग्रह गरेका छन् । शनिबार संघको क्षेत्रीय संयोजकहरुले संयुक्त रूपमा विज्ञप्ति निकाल्दै सरकारलाई हवाइ शुल्क तिर्न सक्ने र नसक्ने सबैको उद्धार चाँडो गर्न आग्रह गरेका हुन् ।
अमेरिका क्षेत्रका संयोजक राजन त्रिपाठी, युरोप क्षेत्र संयोजक नारायण आचार्य, मध्यपूर्व क्षेत्रका संयोजक प्रवीण गुरुङ र अफ्रिका क्षेत्र संयोजक रोशन थापाले जारी गरेको विज्ञप्तिमा उद्धार कार्य चाँडोभन्दा चाँडो अघि बढाउन आग्रह गरिएको छ । उनीहरुले विश्वका विभिन्न देशमा अलपत्र परी फर्कनका लागि पर्खाइमा रहेका सबै नेपालीको उद्धार चाँडो हुनुपर्ने पनि विज्ञप्तिमा भनिएको छ ।
विज्ञप्तिमा नोबेल कोरोना भाइरस (कोभिड–१९) को महामारीले रोजगारी गुमेकादेखि विभिन्न प्रयोजनले विदेश गएका तर आन्तरिक बन्दाबन्दी तथा नियमित अन्तर्राष्ट्रिय उडान नहुँदा अलपत्र परेका श्रम गन्तव्य मुलुकदेखि विभिन्न देशमा रहेका नेपाली घर फर्कने प्रतिक्षामा रहेको उल्लेख छ ।
नेपाल सरकारले म्यानमार, संयुक्त अरब इमिरेट्स र कुवेतबाट पहिलो चरणमा नेपालीको उद्धार गरिसकेको र अन्य देशमा उद्धारको पर्खाइमा रहेकाहरुलाई पीडाको अनुभूति हुन नदिन एनआरएनएका क्षेत्रीय संयोजकहरुले सरकारलाई अनुरोध गरेका छन् । विदेशबाट नेपालीको उद्धारपछि क्वारेन्टिन, बसोबास र घरसम्म पुग्ने सहज वातावरण निर्माण गर्न पनि आग्रह गरिएको छ ।
उनीहरुले वैदेशिक रोजगारी कल्याणकारी कोषमा भएको ६ अर्बभन्दा बढी रकमसमेत प्रयोग गरी बेखर्ची र अप्ठ्यारोमा परेकालाई नेपाल लैजान अनुरोध गरेका छन् । कोभिड–१९ को महामारीमा कतिपय ट्राभल कम्पनीहरु कमाउ धन्दामा व्यस्त भएको भन्दै सरकारले यसतर्फ पनि ध्यान दिन जरुरी रहेको विज्ञप्तिमा भनिएको छ ।
५ सय बढीको उद्धार
एनआरएनएले सरकारले बिहीबारसम्म विदेशबाट ५ सयभन्दा बढी नेपालीको उद्धार गरिएको जनाएको छ । एनआरएनएका अनुसार कुवेत सरकारको सहयोगमा २९९ जना, म्यानमारबाट २६ जना, खाडी मुलुक दुबईबाट १६८ जना, अस्ट्रेलियाबाट ११ जना, जापानबाट ७ जना, कुवेतबाट २९९ जना गरी ५ सय ११ जनालाई उद्धार गरिसकिएको छ ।
कुवेतका घर फिर्ति शिबिरमा थप २ हजार ९ सय ९१ जना रहेकाले उनीहरुलाई उद्धार गर्न हरेकदिन दुई उडान गरी फर्काउने तयारी भइरहेको एनआरएनएले जनाएको छ । विभिन्न मुलुकबाट कुल ५० हजार ९३ जनाले निवेदन दिएकामा प्राथमिकताका आधारमा परराष्ट्र मन्त्रालयले चार्टर्ड विमानमार्फत २४ हजार १४८ जनालाई मात्र फिर्ता ल्याउने भनेको छ ।
