काठमाडौं– मलेसियास्थित नेपाली दूताबासले मलेसियाबाट फर्कने नेपालीको सूची सार्वजनिक गरेको छ । बिहीबार दूताबासले १ असार (जुन १५) मा नेपाल एयरलायन्सको विमानमार्फत फर्कन लागेका १ हजार ५ जना नेपालीको सूची सार्वजनिक गरेको हो ।
नोबेल कोरोना भाइरस (कोभिड–१९) को महामारीमा परेका उनीहरूलाई १ असारमा त्रिभुवन अन्तर्राष्ट्रिय विमानस्थलमा अवतरण गर्ने दूताबासले जनाएको छ । दूताबासका अनुसार मलेसियाबाट स्वदेश फर्किन चाहनेहरूले आफैँले टिकट काटेर फर्किन लागेका हुन् ।
सरकारले जारी गरेको १५ प्राथमिकताका आधारमा फाराम भरेर फर्कन चाहनेहरू आफैँले टिकट काट्नु पर्ने यसअघि नै दूताबासले जारी गरेको थियो । प्राथमिकताका आधारमा फर्कन चाहनेहरूको विवरण संख्या पूरा आएसँगै दूताबासले बिहीबार नै फर्कनेहरूको सूची सार्वजनिक गरेको हो ।
स्वास्थ्य रिपोर्ट अनिवार्य दूताबासले स्वदेश फर्किनु अगाडि ७ दिनको कोभिड–१९ को स्वास्थ्य रिपोर्ट अनिवार्य बुझाउनुपर्ने जनाएको छ । दूताबासका अनुसार चेकजाँचपश्चात् मात्र फर्कने अनुमति दिने र यदि रिपोर्टमा प्रमाणपत्र कोभिड–१९ संक्रमण देखिएमा उतैको अस्पतलामा बस्नुपर्नेछ ।
फर्कनुअघि कोभिड–१९ जाँचका लागि मलेसियाका ९ स्वास्थ्य संस्थाहरूलाई खटाएको छ । कोभिड–१९ को संक्रमण परीक्षणका लागि क्वालालाम्पुर र सेलांगर, जोहोर, मेलाका, नेजेरी सेम्बिलान, पुलाओ पिनाङ, पेर्लिस, पेराक, साबा र साराबाकमा दूताबासले ती स्वास्थ्य संस्थालाई खटाएको छ ।
छ मुलुकबाट फर्कदैै
१ असारमा मलेसियासँगै खाडी मुलुक साउदी अरब, ओमन र अन्य तीन देशहरू रहेका छन् । कम्बोडिया, सिंगापुर र माल्दिभ्समा रहेका नेपाली सोही दिन फर्क“दै छन् । तर, त्यहाँ रहेको नेपाली दूताबासले भने ती देशबाट कतिको संख्यामा उक्त दिन फर्कँदै छन् भन्नेबारेमा सूची सार्वजनिक गरेको छैन ।
महँगो भाडा
सरकारले विदेशबाट फर्कनेहरूको भाडादर पनि तोकिसकेको छ । फर्कनेहरू आफैँले महँगो टिकट काटेर स्वदेश फर्कनुपर्ने छ । सरकारले जारी गरेको सूचीमा मलेसिया (क्वालालाम्पुर) बाट नेपालीले ५ सय २० डलर अर्थात् लगभग साढे ६२ हजार, ओमनमा रहेकाले ५ सय १० डलर (६१ हजार २ सय), माल्दिभ्समा रहेकाले ५ सय ५ डलर (६० हजार ६ सय), कुवेतमा रहेकाले ५ सय ७० डलर (६८ हजार ४ सय रूपैयाँ) मा महँगो टिकट खरिद गर्नु पर्नेछ ।
बंगालादेशमा रहेका फर्कन चाहने नेपालीले १ सय ६५ डलर (१९ हजार ८ सय), नयाँ दिल्लीमा रहेकाले २ सय ५ (२४ हजार ६ सय), मुम्बईमा रहेकाले ३ सय १० डलर (३७ हजार २ सय), बैंग्लोरमा रहेकाले ३ सय ३५ डलर (४० हजार २ सय), बैंककमा रहेकाले ३ सय ९० (४६ हजार ८ सय), आबुधाबीमा रहेकाले ५ सय डलर (६० हजार) मा टिकट खरिद गर्नुपर्ने सरकारले जारी गरेको सूचीमा उल्लेख छ ।
त्यस्तै, दुबईमा रहेका फर्कन चाहने नेपालीले ५ सय डलर (६० हजार), सारजाँहमा रहेकाले ५ सय डलर (६० हजार), दोहामा रहेकाले ५ सय ४५ डलर (६५ हजार ४ सय), बहराइनमा रहेकाले ५ सय ४५ डलर (६५ हजार ४ सय), हङकङमा रहेकाले ५ सय ५० (६६ हजार), साउदीमा रहेकाले ५ सय ९० डलर (७० हजार ८ सय), रियाद ६ सय ३० डलर (७५ हजार ६ सय), जेद्धामा रहेकाले ७ सय ५० डलर (९२ हजार ४ सय) मा टिकट खरिद गर्नुपर्ने बताइएको छ ।
त्यस्तै, जोर्डनमा रहेकाले ८ सय १५ डलर (९७ हजार ८ सय), साइप्रसमा रहेकाले ८ सय ७५ (१ लाख ५ हजार), जापानको नारितामा रहेकाले ९ सय ३५ (१ लाख १२ हजार २ सय) मा टिकट खरिद गरेपछि फर्कन पाउनेछन् ।
सरकारले ३२ जेठदेखि ११ असारसम्म २४ हजार नेपाली ल्याउने जनाए पनि फर्कनेहरूले भाडादर उच्च भएको भन्दै त्यसको विरोध प्रदर्शन गरिरहेका छन् । उनीहरूले सरकारले चार्टर्ड फ्लाइटमा महँगो भाडादर तोकिएको भन्दै विरोध सुरु गरेका हुन् ।
