काठमाडौं- नेकपा एमालेको सक्रिय राजनीतिमा फर्किने पूर्वराष्ट्रपति विद्यादेवी भण्डारीको तयारी र उनलाई रोक्ने अध्यक्ष केपी शर्मा ओलीको कदमले पार्टीभित्र अन्तरसंघर्ष चुलिएको छ ।
पार्टी बैठकमै फरक मत दर्ज गर्न विद्यापक्षले राजनीतिक प्रतिवेदन लेखिरहेको छ । प्रतिवेदनको लेखनमा वरिष्ठ उपाध्यक्ष ईश्वर पोखरेल संलग्न छन् । भनिन्छ, विद्यापक्षले पोखरेललाई नै पार्टीको आगामी महाधिवेशनमा अध्यक्षमा अघि सार्ने छ । उनै पोखरेल फरक मतसहितको राजनीतिक प्रतिवेदन लेखनीमा छँदा अध्यक्ष ओलीले केन्द्रीय समिति बैठक स्थगित गरेका छन् । यही १३ भदौमा केन्द्रीय समिति बैठक बस्ने भनिएको थियो तर ओलीले विद्याको पार्टी सदस्यता पनि ‘पेण्डिङ’मा राखे । उनी देशकै उच्च तथा सम्मानित पदमा पुगेको व्यक्ति फेरि सक्रिय राजनीतिमा फर्किन नहुने तर्क गरिरहेका छन् । ओलीको यस्तो तर्कलाई कतिपयले भने पार्टी नेतृत्वमा तेहरिने चाहनामा विद्या बाधक बन्न सक्ने भयमिश्रित अभिव्यक्ति भन्दै आएका छन् । यो एमालेभित्र सिर्जित अन्तरसंघर्षको मूल कारण पनि हो ।
अर्को कारणको रूपमा विधानबाट दुई कार्यकाल र ७० वर्षे उमेरहद हटाउने निर्णय हो । पार्टीको ११औं महाधिवेशनमा ओलीलाई नै ल्याउनेगरी यसअघि नवौं र १०औं महाधिवेशनले विधानमा राखेको प्रावधान केन्द्रीय समिति बैठकले हटाएको थियो । त्यसप्रति वरिष्ठ उपाध्यक्ष पोखरेल, उपाध्यक्षहरू युवराज ज्ञवाली, सुरेन्द्र पाण्डे, स्थायी समिति सदस्य कर्णबहादुर थापालगायत नेताहरू असन्तुष्ट छन् । ज्ञवाली, पाण्डे र थापाले त केन्द्रीय समिति बैठकको निर्णयप्रति असहमति जनाउँदै ‘नोट अफ डिसेन्ट’ लेखेका छन् । तर पार्टीले जारी गरेको परिपत्रमा असहमति नसमेटिएपछि उनीहरू थप असन्तुष्ट बनेका छन् । फरक मत राख्नेमध्येका उपाध्यक्ष ज्ञवालीले प्रभावसँग भने, ‘हामीले जे फरक मत राखेका थियौं, त्यो सम्बोधन नभए निरन्तर बहस जारी रहन्छ ।’
उनले पूर्वराष्ट्रपति भण्डारीको सदस्यता नवीकरण नभएको अवस्थामा पार्टीले क्षति बेहोर्नुपर्ने चेतावनीसमेत दिए । पूर्वराष्ट्रपति भण्डारी स्वयं आफ्नो पार्टी सदस्यता नवीकरण नगरी पेण्डिङमा राखेको भन्दै अध्यक्ष ओलीसँग आक्रोशित छिन् । उनले यही ५ भदौमा काठमाडौंको थापागाउँमा सम्पर्क कार्यालय उद्घाटन गर्दै च्यासलले आफ्नो सदस्यता नै खाइदिएको आरोप लगाइन् । ओलीले भण्डारीको खण्डन भोलिपल्टै गरे । उनले त्यसबेला भने, ‘पार्टीले दुई–दुई पटकसम्म राष्ट्रपति बनायो । त्यस्तो व्यक्ति फर्केर पार्टीमा समस्या खडा गर्छ भन्ने कुरा कल्पनासमेत गरिएको थिइनँ । त्यसबेला सदस्यता परित्याग गरेर राष्ट्रपतिमा जाने, मलाई सदस्यता प्यारो राष्ट्रपतिमा जान्न भन्नुपथ्र्यो नि !’
तर पूर्वराष्ट्रपति भण्डारीले सदस्यता नवीकरण विधान महाधिवेशनले हल गर्ने आशा गरेकी छन् । यदि, महाधिवेशनले सदस्यता नवीकरणको सुनुवाइ नगरे मौन नबस्ने पक्षमा उनी देखिएकी छन् । यहीबीच यतिबेला ओलीले भण्डारीलाई राजनीतिमा फर्किन चाहेमा कसैले रोक्न नसक्ने पुरानो भिडियो सामाजिक सञ्जालमा भाइरल बनेको छ । पहिला राजनीतिमा आउन उत्प्रेरित गर्ने तर अहिले पार्टी राजनीतिको ढोका बन्द गरिदिए । यसप्रति भण्डालीले एमाले नजन्मिँदै आफू राजनीतिमा लागेको बताउने गरेकी छन् । उनको यो अभिव्यक्ति ओलीलक्षित हो । भण्डारीपक्षमा देशका विभिन्न जिल्लामा नेताहरू खुल्न थालेका छन् । हालै भोजपुर जिल्ला समिति र मोरङ जिल्ला समितिले भण्डारीको सदस्यता नवीकरण गर्नुपर्नेबारे निर्णय गरेर ओलीमाथि दबाब बढाएका छन् ।
पार्टी प्रचार विभाग प्रमुख राजेन्द्र गौतमले पार्टी अध्यक्ष ओली सकारात्मक भए दुई मिनेटमै भण्डारीको सदस्यता नवीकरण हुने बताउँछन् । गौतमको यो भनाइले ओली पूर्वराष्ट्रपति भण्डारीप्रति पेलान्को रणनीतिमा छन् । आफू भने पार्टी सत्तामा तेस्रो कार्यकाल पनि रहन उनले आफूपक्षको बहुमत रहेको पार्टीको सबै तहबाट दुई कार्यकाल र ७० वर्षे उमेरहदलाई जालजेलपूर्ण ढंगले हटाएको नेता कर्ण थापाले बताए । उनका अनुसार देशभरका विभिन्न जिल्लामा पूर्वराष्ट्रपति भण्डारीप्रति एमालेको ठूलो पंक्तिको समर्थन देखिँदै गएको छ ।
यसरी भण्डारी शक्तिको खेलमा देखिँदा ओली भने जसो गरेर भए पनि रोक्न तल्लीन छन् । जबकि, ओलीलाई यसअघि प्रधानमन्त्री छँदा राष्ट्रपतिको हैसियतमा रहेको बेला भण्डारीले संसद् विघटनसम्मको राजनीतिक घटनाक्रममा साथ दिएकी थिइन् । यतिबेला भने पूर्वराष्ट्रपतिको हैसियतमा राज्यले दिएको सेवासुविधा त्यागेर उनी राजनीतिक मैदानमा उत्रिएकी हुन् ।
-1755862759.jpeg)
