काठमाडौं– गएको आर्थिक वर्षमा वैदेशिक रोजगारीमा जाने अदक्ष श्रमिकको अनुपात बढेको छ । गत आर्थिक वर्ष २०८१/८२ मा वैदेशिक रोजगारीमा गएकामध्ये २७.०९ प्रतिशत अदक्ष श्रमिक रहेका छन् । जबकि, अघिल्लो आर्थिक वर्ष २०८०/८१ मा यस्तो अनुपात १९.६३ प्रतिशत रहेको थियो ।
सरकारले वैदेशिक रोजगारीमा जाने श्रमिकलाई सीप सिकाएर पठाउने बताइरहँदा सीप नसिकी जानेहरुको संख्या घट्नुको साटो बढेको छ । वैदेशिक रोजगार विभागको तथ्यांकअनुसार गत आवमा वैदेशिक रोजगारीमा गएकामध्ये ६०.३८ प्रतिशत दक्ष श्रमिक रहेका छन् । आर्थिक वर्ष २०८०/८१ मा दक्ष श्रमिकको हिस्सा ७१.७८ प्रतिशत रहेकोमा गत आवमा यो अनुपात घटेको पाइएको हो ।
रोजगारीका लागि जाने अति दक्ष श्रमिकको अनुपात भने क्रमशः बढेको देखिन्छ । आव २०७९÷८० मा ०.०३ प्रतिशतमात्र अति दक्ष श्रमिक रोजगारीमा गएका थिए । २०८०/८१ मा यस्तो अनुपात ०.०९ प्रतिशत र २०८१/८२ मा ०.११ प्रतिशत कायम भएको छ ।
रोजगारीमा जाने व्यावसायिक श्रमिकको संख्या पनि बर्सेनि बढ्दै गएको छ । गत आवमा ०.५२ प्रतिशत व्यावसायिक श्रमिक रोजगारीमा गएका छन् । २०८०/८१ मा ०.३७ प्रतिशत र २०७९÷८० मा यो भन्दा कम ०.१४ प्रतिशतमात्र व्यावसायिक श्रमिक रहेका थिए । यसका साथै अर्धदक्ष श्रमिकको संख्या पनि बर्सेनि बढ्दै गएको देखिएको छ । आर्थिक वर्ष २०८१/८२ मा ११.८८ प्रतिशत, २०८०/८१ मा ८.११ प्रतिशत र २०७९/८०मा ७.८ प्रतिशत अर्धदक्ष श्रमिक रोजगारीका लागि विदेसिएका थिए ।
गत आवमा नेपालीहरु वैधानिक माध्यमबाट १५१ मुलुकमा रोजगारीमा गएका छन् । युएई, साउदी अरब, कतार, कुवेत र मलेसियामा सबैभन्दा बढी श्रमिक जाँदा १२ वटा मुलुकमा एक जनामात्र श्रमिक गएका छन् । ४६ वटा मुलुकमा १० जनाभन्दा कम श्रमिक गएका छन् ।
गत एक वर्षमा म्यानपावर व्यवसायीले विभिन्न १८ वटा मुलुकमा श्रमिक पठाएका छन् । व्यक्तिगत श्रम स्वीकृति लिएर भने १४६ वटा मुलुकमा गएका छन् । उक्त अवधिमा १०० भन्दा बढी श्रमिक पठाउने म्यानपावरको संख्या ६३३ रहेको छ । ५३ वटा म्यानपावरले भने १० जनाभन्दा कम श्रमिक पठाएका छन् ।
-1752335779.jpg)
