मैले भन्दै आएको थ्री डी– डेब्ट, डेथ र डिजिटल ट्र्यापमध्ये यो विधेयकले डेब्ट ट्र्यापलाई सम्बोधन गर्छ । यसबाट श्रमिकहरु विदेश गएर कमाएपछि फर्किंदासम्म ऋण पनि मुक्त हुने र राज्यले प्रदान गर्दै आएको सामाजिक सुरक्षा, बिमाजस्ता अन्य सुविधाहरु पनि पाउने छन् ।
शरतसिंह भण्डारी
मन्त्री, श्रम, रोजगार तथा सामाजिक सुरक्षा
काठमाडौं– श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने श्रमिकहरुलाई विनाधितो ऋण उपलब्ध गराउनेसम्बन्धी कार्यविधि–२०८२ लाई टुंग्याउने तयारी गरेको छ । श्रममन्त्री शरतसिंह भण्डारीले आइतबार उक्त कार्यविधिको मस्यौदामाथि सरोकारवालाहरुसँग छलफल गरेका छन् ।
छलफलमा मन्त्री भण्डारीले वैदेशिक रोजगारमा जाने श्रमिकहरु मिटरब्याजीको चर्को ब्याजको पासोमा फसेकोप्रति चिन्ता व्यक्त गर्दै यो कार्यविधि लागू भए श्रमिकहरुले सहज र सरल तरिकाबाट विनाधितो ऋण पाउने विश्वास व्यक्त गरे । ‘मैले भन्दै आएको थ्री डी– डेब्ट, डेथ र डिजिटल ट्र्यापमध्ये यसले डेब्ट ट्र्यापलाई सम्बोधन गर्छ । यसबाट श्रमिकहरु विदेश गएर कमाएपछि फर्किंदासम्म ऋण पनि मुक्त हुने र राज्यले प्रदान गर्दै आएको सामाजिक सुरक्षा, बिमाजस्ता अन्य सुविधाहरु पनि पाउने छन्,’ मन्त्री भण्डारीले भने ।
उनले सरकारले वैदेशिक रोजगारीमा जानेलाई विनाधितो ऋण उपलब्ध गराउने नीति लिएअनुसार यो कार्यविधि लागू भए सहजै ऋण उपलब्ध हुने बताए । उनले सामाजिक सुरक्षा कोषमा आबद्ध बैंकहरुलाई प्राथमिकतामा राखेर काम गर्नुपर्ने सुझाव दिए । ‘बैंकहरुको पैसा नडुबोस्, विदेश जानेले सहज ऋण पाओस् र गाँउघरमा मिटरब्याजीहरुबाट जोगियोस् । यसको मुख्य उदेश्य यही हो,’ उनले भने ।
उक्त कार्यविधिको मस्यौदामा खाडी मुलुक जानेहरुलाई कम्तीमा दुई लाख रुपैयाँ र युरोपेली मुलुक जानेहरुलाई पाँच लाख रुपैयाँ उपलब्ध गराउन सकिने प्रावधान समेट्न प्रस्ताव गरिएको छ । छलफलमा सहभागी नेपाल राष्ट्र बैंकका प्रतिनिधि शौरभ पोखरेलले आफ्नोतर्फबाट सहजीकरणका लागि पूर्णसहयोग रहने प्रतिबद्धता व्यक्त गरे । उनले ऋण असुलीको विषयमा थप प्रस्ट हुन कार्यविधिमा सुधारको आवश्यकता रहेको सुझाव दिए ।
नेपाल बैंकर्स संघका अनिल शर्माले मन्त्री भण्डारीको नेतृत्वमा श्रम मन्त्रालयले राम्रो अवधारणा ल्याएको भन्दै यसलाई लागू गर्न बैंकहरुले पूर्ण सहयोग गर्ने बताए । श्रमसचिव डा. कृष्णहरि पुष्करले विगत लामो समयदेखि यो कार्यविधि अड्किएर बसेको भन्दै यसलाई टुंग्याएर छिट्टै लागू गर्नुपर्ने बताए । उनले विगतको अनुभवबाट पनि पाठ सिक्दै सहज र सरल तरिकाबाट कसरी ऋण उपलब्ध गराउने र रोजगारीमा गएकाहरुले पनि कसरी सहजै ऋण चुक्ता गर्ने भन्ने बाटो तय गर्नुपर्ने सुझाव दिए ।
