नेपाली कम्युनिस्ट आन्दोलनले केपी ओलीलाई निरन्तर एमालेको अध्यक्ष चाहिरहेको छ । त्यसैले एमाले नेतृत्वमा उहाँ विकल्पविहीन हुनुहुन्छ ।
विष्णु रिजाल
ओलीनिकट नेता
- ओली र भण्डारी आसन्न महाधिवेशनमा अध्यक्षका मुख्य दाबेदार
- नेतृत्वमा ‘ह्याट्रिक’ गर्ने दाउमा ओली, ओलीको निरन्तरतामा ‘ब्रेक’ लगाउने अभियानमा पूर्वराष्ट्रपति भण्डारी
- ओलीनिकट नेताहरु आक्रामक, ओली विकल्पहीन भएको दाबी
- उपमहासचिव प्रदीप ज्ञवाली भन्छन्– विद्या भण्डारीलाई भावी अध्यक्षको रूपमा चर्चा गर्नु असान्दर्भिक
काठमाडौं– नेकपा एमालेको ११औं महाधिवेशनको मिति टुंगो नलाग्दै भावी नेतृत्वको लडाइँ सुरु भएको छ । नेतृत्वमा वर्तमान अध्यक्षसमेत रहेका प्रधानमन्त्री केपी शर्मा ओलीले ‘ह्याट्रिक’ मार्न चाहेका छन् । त्यही भएर उनले भन्दै आएका छन्– ७० वर्षे उमेर हद र दुई कार्यकालको एजेण्डा पुरानो भइसक्यो ।
ओलीनिकट नेताहरूका अनुसार ओली आगामी महाधिवेशनमा अध्यक्षका निर्विकल्प नेता हुन् । यस्तो दाबीलाई खारेज गर्नेगरी पूर्वराष्ट्रपति विद्यादेवी भण्डारी पार्टी नेतृत्वका लागि अघि बढेकी छन् । उनलाई रोक्न ओली पक्षले भरमग्दुर प्रयास गरिरहेको छ ।ओलीनिकट नेता विष्णु रिजालले ओली विकल्पविहीन नेतृत्व भएको दाबी गरेका छन् । उनले शनिबार ओलीकै गृहजिल्ला झापा पुगेर भने, ‘नेपाली कम्युनिस्ट आन्दोलनले केपी ओलीलाई निरन्तर एमालेको अध्यक्ष चाहिरहेको छ ।’
पार्टी उपमहासचिव प्रदीप ज्ञवालीले त भण्डारीलाई भावी अध्यक्षको रूपमा चर्चा गर्नु असान्दर्भिक भएको तर्क गरेका छन् । तर, भण्डारीपक्ष शक्ति आर्जन गर्दै अघि बढेको छ । पार्टीको जनवर्गीय संगठनहरूमा ओलीविरुद्ध विद्रोह गराउँदै आएका छन् । यसबाट ओली थप रुष्ट बन्दै गएका छन् । यस्तोमा एमालेमा २० वर्ष कसैले आश नगरे हुन्छ भनेर चेतावनीपूर्ण भाषा बोलिरहेका छन् ।ओलीको यस्तो अभिव्यक्ति एमालेभित्र बढ्दो ध्रुवीकरण र पार्टी अन्तरसंघर्षलक्षित थियो । लगत्तै केही सञ्चारमाध्यमलाई अन्तर्वार्ता दिँदै पूर्वराष्ट्रपति भण्डारीले ओलीका भनाइको काउन्टर गरेकी थिइन् । उनको भनाइ थियो, ‘मेरो मातृ पार्टी एमाले हो । महाधिवेशनमा पार्टीको नेतृत्व निर्माण गर्न प्रक्रिया हुन्छ । अहिलेको नेतृत्वको उमेर र स्वास्थ्य अवस्था देखेर उहाँका अनुयायी पनि चिन्तित छन् । एमाले नेतृत्वमा मेरो नाम पनि विभिन्न ढंगले बाहिर आइरहेको छ । समयमै महाधिवेशन हुनु राम्रो हुन्छ ।’
पार्टी नेतृत्वमा पुरुषमात्रै होइन कि महिला पनि आउन सक्छन् । त्यसको प्रमाणित गर्नुपर्ने बेला आएको छ ।
पद्मा अर्याल
सचिव, नेकपा एमाले
दुईपटकको राष्ट्रपतीय कार्यकाल पूरा गरेलगत्तै भण्डारीले एमालेको पार्टी सदस्यता नवीकरण गराएकी थिइन् । यसपछि पूर्वराष्ट्रपति सक्रिय दलीय राजनीतिमा फर्किनु उचित हो कि होइन भन्ने बहस चलेको थियो । प्रथम राष्ट्रपति डा. रामवरण यादव र उपराष्ट्रपति परमानन्द झा कार्यकालको समाप्तिपछि सक्रिय दलीय राजनीतिमा फर्किएनन् ।तर, दोस्रो राष्ट्रपति विद्यादेवी भण्डारी र उपराष्ट्रपति नन्दबहादुर पुन भने दुवै सक्रिय राजनीतिमा फर्किएका छन् । पुन आफ्नै पार्टी नेकपा माओवादी केन्द्रको उपाध्यक्ष भइसकेका छन् भने भण्डारी आगामी महाधिवेशनमा पार्टी अध्यक्षको प्रत्याशी बन्ने तयारीमा लागेकी छन् ।
एमालेको ११औं महाधिवेशन २०८३ मंसिरभित्र हुनुपर्ने हो । तर, विधान महाधिवेशन आगामी भदौको २१, २२ र २३ गते बोलाइएको छ । विधान महाधिवेशन भएको छ महिनाभित्र पार्टी महाधिवेशन गर्ने प्रचलन एमालेमा छ । त्यसो हुनाले चुनाव यही वर्ष हुने सम्भावना रहेको नेता पद्मा अर्यालले प्रभावसँग बताइन् । अर्याल भण्डारीनिकट सचिव मानिन्छिन् । उनले भण्डारीलाई नेतृत्वमा समर्थन गर्ने आशयमा भनिन्, ‘पार्टी नेतृत्वमा पुरुषमात्रै होइन कि महिला पनि आउन सक्छन् । त्यसको प्रमाणित गर्नुपर्ने बेला आएको छ ।’
उनले पार्टी नेतृत्व परिवर्तन सहज बनाउन वर्तमान अध्यक्ष ओलीले नै सल्लाह गर्नुपर्ने, त्यसो नभए समय र सन्दर्भअनुसार प्रतिस्पर्धा हुने संकेत गरेकी छन् । तर, अहिलेदेखि नै तयारी नगरे महाधिवेशनको छोटो अवधिमामात्रै परिणाम ननिस्किने भएकाले यस्तो गृहकार्य प्रारम्भ गरिएको हो । दुई वर्ष अवधिलाई योजनाबद्ध उपयोग गर्ने र पार्टी महाधिवेशनबाट अध्यक्ष ओलीको नेतृत्व परिवर्तन गर्न हरसम्भव सबै उपाय अवलम्बन गर्ने बताइएको छ ।
भण्डारीले आफ्ना पक्षधर कार्यकर्तालाई असुरक्षा सिर्जना नगर्नसमेत सुझाएकी छन् । उनको भनाइ छ– एमाले पंक्तिबाट मलाई नेतृत्वमा आउनुपर्छ भनेर इच्छा व्यक्त गर्नेलाई खतरा किन ? त्यस्तालाई त झन् थप जिम्मेवारी पो दिइनुपर्छ ।गत माघ १४ गते विराटनगरमै भण्डारीले पार्टी नेतृत्वमा तयार रहेको बताएकी थिइन् । ‘म खोपीको देउता भएर अँध्यारो कोठामा बस्दिनँ । मेरो अभियानले काठमाडौंमा भुइँचालो गएको छ,’ उनको भनाइ थियो ।
तर, ओलीले भण्डारीलाई नेतृत्वमा अहिलेदेखि नै अस्वीकार गर्दै आएका छन् । उनले नेतृत्वको विकल्पलाई अस्वीकार गरेका छन् । सोही कारण उनले पार्टी विधानमा सक्रिय पदका लागि ७० वर्षे उमेर हद र दुई कार्यकाल अध्यक्षको प्रावधान हटाइसकेका छन् । राजनीतिक विश्लेषक भीम भुर्तेलको विश्लेषणमा ओलीको तेहेरिने इच्छासामु भण्डारीको अभियानले खासै ठूलो अर्थ राखेको छैन । तर, ओलीकै गृहप्रदेश कोशी, गण्डकीलगायत विभिन्न जिल्लामा भण्डारीले आफ्नो पक्षमा माहोल बनाउँदै लगेकी छन् । भण्डारी राष्ट्रपति हुनुअघि एमाले उपाध्यक्ष थिइन् ।
