- गत आर्थिक वर्षको भन्दा करिब १९ हजार बढी
- जेठमा विदेसिनेको संख्या ७४ हजार ४६७ जना
- चालु आवमा वैदेशिक रोजगारीमा जानेको संख्या सबैभन्दा बढी मंसिर र सबैभन्दा कम असोजमा
काठमाडौं– चालु आर्थिक वर्षको ११ महिनामा वैदेशिक रोजगारीमा जाने युवाको संख्या सात लाख ६० हजार ३९१ पुगेको छ । यो संख्या गत आर्थिक वर्षभरिमा रोजगारीका लागि विदेसिएकाभन्दा करिब १९ हजारले बढी हो । गत आर्थिक वर्ष २०८०/८१ मा सात लाख ४१ हजार ९२७ जना रोजगारीका लागि विदेश गएको तथ्यांक छ ।
वैदेशिक रोजगार विभागले सार्वजनिक गरेको तथ्यांकअनुसार चालु आर्थिक वर्ष २०८१/८२ को साउनदेखि जेठसम्मको अवधिमा रोजगारीका लागि विदेसिएकामध्ये ८५ हजार २५६ जना महिला छन् । बाँकी छ लाख ७५ हजार १३५ जना पुरुष छन् । यो संख्या व्यक्तिगत, संस्थागत र श्रम स्वीकृति नवीकरण गरेर जानेहरुको हो ।
पछिल्लो ११ महिनामा संस्थागत माध्यमबाट तीन लाख २० हजार ५७९ जना रोजगारीमा गएका छन् । यसरी जानेमा दुई लाख ८९ हजार १७५ जना पुरुष र जना ३१ हजार ४४४ जना महिला छन् । विभागको तथ्यांकअनुसार एक लाख २० हजार ९०५ जना व्यक्तिगत श्रम स्वीकृति लिएर रोजगारीमा गएका छन् । जसमा ९४ हजार १८० जना पुरुष र २६ हजार ७२५ जना महिला छन् । यसैगरी ११ हजार ४३४ जना जिटुजी प्रणालीमार्फत गएका छन् । जसमा १० हजार ११४ जना पुरुष र एक हजार ३२० जना महिला छन् । यस अवधिमा पुनः श्रम स्वीकृति लिएर जानेहरु तीन लाख आठ हजार ६७ जना छन् । जसमा दुई लाख ८१ हजार ६६५ जना पुरुष र २६ हजार ४०२ जना महिला छन् ।
पछिल्लो महिना जेठमा रोजगारीका लागि विदेसिनेको संख्या ७४ हजार ४६७जना रहेको छ । जसमा ६६ हजार ३०२ जना पुरुष र आठ हजार १६५ जना महिला छन् । यो महिनामा खाडी मुलुक र मलेसिया नै श्रमिकहरुको प्रमुख पाँच श्रम गन्तव्य बनेको छ । सबैभन्दा बढी २४ हजार ७०४ जना संयुक्त अरब इमिरेट्स (युएई) गएका छन् । त्यसपछि साउदी अरबमा ११ हजार ९६१ जना, कतारमा ११ हजार ९१ जना, मलेसियामा सात हजार २३० र कुवेतमा चार हजार ६३० जना गएका छन् ।
जेठ महिनामा ३३ हजार ६३८ जना संस्थागत माध्यमबाट रोजगारीमा गएका छन् । जसमध्ये ३० हजार ९२२ जना पुरुष र दुई हजार ७१६ जना महिला रहेका छन् । आठ हजार ८६० जना पुरुष र तीन हजार ४५ जना महिला गरी कूल ११ हजार ९०५ जना व्यक्तिगत श्रम स्वीकृति लिएर गएका तथ्यांक छ । जेठमा संस्थागतभन्दा व्यक्तिगत माध्यमबाट रोजगारीमा जाने महिलाको संख्या बढी देखिएको छ । त्यसैगरी जिटुजीमार्फत इजरायल र कोरियामा एक हजार १७१ जना गएका छन् । जसमध्ये एक हजार ५७ पुरुष र ११४ जना महिला छन् ।
जेठमा सबैभन्दा बढी ४२ हजार ८८२ जना दक्ष श्रमिक रोजगारीमा गएका छन् । त्यसपछि सीप नै नसिकी २० हजार ५७१ जना गएका छन् । १० हजार ४९२ जना अर्धदक्ष, ३४९ जना व्यावसायिक र ७३ जना उच्च दक्ष श्रमिक रोजगारीमा गएका छन् ।विभागको तथ्यांकअनुसार चालु आवको साउनमा ५९ हजार ५७५, भदौमा ५७ हजार ४९३, असोजमा ५३ हजार ५२५, कात्तिकमा ७० हजार ९९०, मंसिरमा ८४ हजार २२६, पुस ६७ हजार २५८, माघमा ७२ हजार ४४१, फागुनमा ६८ हजार ९६३, चैतमा ७३ हजार ४०३ र वैशाखमा ७८ हजार ५० जना रोजगारीका लागि विदेसिएका छन् ।
यो संख्या व्यक्तिगत, संस्थागत, पुनः श्रम स्वीकृति लिने र जिटुजीमार्फत जानेहरुको हो । चालु आवमा सबैभन्दा बढी मंसिरमा र सबैभन्दा कम असोजमा वैदेशिक रोजगारीका लागि युवाहरु विभिन्न मुलुक गएको तथ्यांक छ ।
