कुनै पनि हालतमा सिण्डिकेट मान्दैनौं: भुवनसिंह गुरुङ
सिण्डिकेट ल्याइए मलेसियाको रोजगारी नै बन्द गर्नुपर्छ: प्रेम कटुवाल
सिण्डिकेट ल्याउन खोज्ने व्यवसायीहरुको नाम सार्वजनिक गरौं: रोहन गुरुङ
कानुनले बर्जित गरेको सिण्डिकेट ल्याउन लाग्नेहरु सजायको भागीदार बन्नुपर्छ: जनक रावल
काठमाडाैं – नेपाल वैदेशिक रोजगार व्यवसायी संघले वैदेशिक रोजगार व्यवसायमा एकाधिकार (सिण्डिकेट) लागू हुन नदिने घोषणा गरेको छ । संघले बुधबार सिण्डिकेटविरुद्ध खबरदारी तथा विरोध कार्यक्रम नै राखेर यस्तो घोषणा गरेको हो ।
मलेसियामा रोजगारी खुलेसँगै त्यहाँ सीमित व्यवसायीले मात्र कामदार पठाउन पाउनेगरी सिण्डिकेट लागू गर्ने प्रयास भइरहेको भन्दै संघले विरोध जनाउँदै आएको छ । यस्तो आशंका व्यापक हुन थालेपछि संघले त्यसविरुद्ध खबरदारी गर्न विरोध कार्यक्रम आयोजना गरेको बताएको छ । वैदेशिक रोजगार व्यवसायलाई स्वस्थ प्रतिस्पर्धात्मक र मर्यादित बनाउन व्यवसायीको ऐक्यबद्धता जुटाउने उद्देश्य पनि उक्त कार्यक्रमको रहेको बताइएको छ ।
कार्यक्रममा संघका अध्यक्ष भुवनसिंह गुरुङले कुनै पनि हालतमा सिण्डिकेट मान्य नहुने बताए । उनले सिण्डिकेट ल्याउने सपना देख्नेहरुलाई व्यवसायबाट हात धुन तयार हुनसमेत चेतावनी दिए । ‘वैदेशिक रोजगार व्यवसायी संघ सिण्डिकेट ल्याउन खोज्नेहरुकाविरुद्ध जस्तोसुकै कदम चाल्न पनि तयार छ,’ गुरुङले भने । सबै व्यवसायीले निर्वाधरुपमा व्यवसाय गरेर जीविकोपार्जन गर्न पाउनुपर्ने भन्दै एकाधिकार ल्याउने सपना देखे उनीहरु स्वयंका लागि आत्मघाती हुने उनले बताए ।
संघका पूर्वअध्यक्ष रोहन गुरुङले सीमित व्यवसायीले मात्र काम गर्न पाउने भए मलेसियाको रोजगारी बन्द गरिनुपर्ने बताए । व्यवसायीहरुबीच अन्य कुरामा असहमति भए पनि सिण्डिकेटको विषयमा एक ढिक्का हुनुपर्नेमा उनले जोड दिए । यदि सिण्डिकेट लागू भए संघ जवाफदेही हुनुपर्ने भएकाले यसमा होसियार हुन वर्तमान कार्यसमितिलाई सुझावसमेत दिए ।
‘संघका साथीहरु कोही पनि सिण्डिकेटको पक्षमा हुनुहुन्न । उनहरु यो ल्याउन चाहनुहुन्न भन्ने सबैलाई थाहा छ । तर यदि सिण्डिकेट आइहाल्यो भने संघले नै हो जवाफ दिने,’ पूर्वअध्यक्ष गुरुङले भने । संघले ‘हामी सिण्डिकेट मान्दैनौं भनेर मात्र जिम्मेवारी पूरा नहुने उनको भनाइ छ । सिण्डिकेट ल्याउन खोज्नेहरु व्यवसायभित्रै रहेकाले प्रतिबद्धतापत्र लिएर नआउने मलेसिया काम गर्ने व्यवसायीहरुको नाम सार्वजनिक गर्न संघ उनले संघसँग माग गरे ।
संघका अर्का पूर्वअध्यक्ष प्रेम कटुवालले पनि सिण्डिकेट ल्याइए मलेसियाको रोजगारी नै बन्द गरिनुपर्ने बताए । यदि मलेसियालाई नेपाली कामदार चहिन्छ भने अन्य मुलुकमा जसरी काम हुन्छ त्यसैगरी काम गर्न पाउनुपर्ने उनको भनाइ छ ।प्रगतिशील वैदेशिक रोजगार व्यवसायी मञ्चका अध्यक्ष जनक रावलले अन्तर्राष्ट्रिय कानुनले बर्जित गरेको सिण्डिकेट ल्याउन कोही लागेको भए उनीहरु सजायको भागीदार हुन तयार भएर बस्न चेतावनी दिए । कार्यक्रममा आफ्नो मन्तव्य राख्ने क्रममा व्यवसायीहरुले सिण्डिकेट ल्याउन खोज्नेलाई भौतिक कारबाही गर्नसमेत पछि नपर्ने बताएका थिए ।
कार्यक्रममा संघका निवर्तमान अध्यक्ष राजेन्द्र भण्डारी, संघका पूर्वअध्यक्ष दानबहादुर तामाङ, वैदेशिक रोजगार व्यवसायी गणतान्त्रिक मञ्चका अध्यक्ष धनलाल जैसीलगायत संघका पदाधिकारी र व्यवसायीहरुको उपस्थिति थियो । उपस्थित व्यवसायीहरुले सिण्डिकेटविरुद्ध ऐक्यबद्धता जनाउँदै प्रतिबद्धतापत्रसमेत बुझाएका थिए ।
व्यवसायीको सुझाव
संघले कार्यक्रममा उपस्थित व्यवसायीहरुबाट सिण्डिकेटविरुद्ध कसरी जाने भनेर सुझाव संकलन गरेको थियो । नेपाल लोकतान्त्रिक वैदेशिक रोजगार व्यवसायी एसोसिएसनका कार्यवाहक महासचिव तुलसी पुरीले सिण्डिकेट लगाएर ल्याएको मागपत्र प्रमाणीकरण गरे मन्त्रालयदेखि विभागसम्म घेराउ गर्न सबै व्यवसायीहरु जानुपर्ने बताएका थिए ।
त्यस्तै संघका पूर्वप्रथम उपाध्यक्ष डिकबहादुर खत्रीले अन्तर्राष्ट्रिय श्रम संगठनलगायतका संस्थाका पदाधिकारीसँग यस विषयमा अन्तक्र्रिया गर्दा अझ प्रभावकारी हुने सुझाव दिएका थिए । गन्तव्य मुलुकसँग छलफल गरेर एमओयूमा पनि खबरदारी गर्नुपर्ने उनको भनाइ छ ।
‘क्युबिसी, गाम्कालगायत सबै सिण्डिकेटकै स्वरुप भएकाले यसबाट पाठ सिक्नुपर्छ । श्रम मन्त्रालय गएर मात्र पनि हुँदैन । परराष्ट्र मन्त्रालयसम्म गएर एकाधिकार स्वीकार्य हुँदैन भन्ने जानकारी गराउनुपर्छ,’ लक्की एचआर सोलुसनका ऋषि शर्माले भने । उपस्थित व्यवसायीले सिण्डिकेट ल्याए सरकारले त्यस्ता मुलुकमा कामदार नपठाउने प्रतिबद्धता व्यक्त गरेमात्र ढुक्क हुने स्थिति बन्ने बताएका थिए । नयाँ व्यवसायीलाई यस्ता किसिमका हल्लाले हतोत्साही बनाएकाले गैरकानुनी अभ्यास गर्न खोज्नेहरुलाई कारबाहीको दायरामा ल्याउनुपर्ने माग व्यवसायीहरुको छ ।
-1745656903.jpeg)